ބަހުގެ ހަމަތަކާ އެއްގޮތަށް ލިޔުންތައް ލިޔުއްވައިދެއްވާ: ޑރ. އަޝްރަފް

ދިވެހި ބަހާއި ޤައުމަށްޓަކައި ބަހުގެ ހަމަތަކާ އެއްގޮތަށް ލިޔުންތައް ލިޔުމަށް ދިވެހި ބަހުގެ އެކެޑަމީގެ ރައީސް ޑރ. އަޝްރަފް ޢަބްދުއްރަހީމް އިލްތިމާސްކުރައްވައިފިއެވެ. އަޝްރަފް މިކަމަށް އިލްތިމާސްކުރެއްވީ ރާއްޖޭގައި ފާހަގަކުރާ ދިވެހި ލިޔުންތެރިންގެ ދުވަހުގެ މުނާސަބަތުގައި ދެއްވި ޚިޠާބުގައެވެ.

ދިވެހި ބަހުގެ އެކެޑަމީގެ ރައީސް ޑރ. އަޝްރަފް ޢަބްދުއްރަހީމް ވިދާޅުވީ ޒަމާނަށް އަންނަމުންދާ ބަދަލާއެކު މިހާރު ނިކުންނަނީ އެންމެ މަޖައްލާއެއް ނޫންކަމަށެއެވެ. މިހާރު އެތައް ނޫހަކާއި އެތައް މަޖައްލާއެއް ނެރެމުން އަންނަކަމަށެއެވެ. ކުރީގެ ޙާލަތާއި މިހާރުގެ ޙާލަތު ފާހަގަކުރައްވައި އަޝްރަފް ވިދާޅުވި މިއީ އޮންލައިން ޒަމާނެއް ކަމަށާއި މިއީ ފަންނިއްޔާތުގެ ތަނަވަސް ޒަމާނެއް ކަމަށެއެވެ.

އެގޮތުން އޮންލައިންކޮށް ނެރެވޭ އެތައް ނޫހެއް މިއަދު ރާއްޖޭގައި ނެރެމުން އަންނަ ކަމަށެވެ. ޗާޕުކޮށްގެން ނެރޭ ނޫހާއި މަޖައްލާގެ ޢަދަދު މަދުނަމަވެސް އޮންލައިނުގެ ހޮޅުއަށިތަކުގައި ޒަމާނީ ވަޞީލަތްތަކުގެ ބޭނުންހިފައިގެން ތައްޔާރުކޮށްފައިވާ ނޫސްތަކާއި މަޖައްލާތާކައި އަމިއްލަ ބްލޮގުތަކާއި ބޮޑެތި ވެބްސައިޓްތައް ވަރަށް ގިނަ ކަމަށެއެވެ. އަޝްރަފް ވިދާޅުވީ، އަމިއްލަ ފޯނު މެދުވެރިކޮށް މިއިން ކޮންމެ ވަޞީލައްތެއްގައި ހުންނަ ލިޔުންތަކަށް ފަސޭހަކަމާއެކު ވާސިލްވެވޭކަމަށާއި އިތުރު ބުރައެއް އުފުލަން ނުޖެހި ލިޔުންތައް ކިޔާލަން ބޭނުންވާ ފަރާތްތަކަށް އެ ފުރުޞަތު ހުޅުވިފައިވާ ކަމަށެއެވެ.

މި ޚިޠާބުގައި އަޝްރަފް ވަނީ ދެކަމަކަށް އަލިއަޅުއްވައިލައްވައިފައެވެ. އެއްކަމެއްގެ ގޮތުގައި ފާހަގަކުރެއްވީ ލިޔުންތެރިންނަކީ އަންނަން އޮތް ޖީލަށް ޤައުމު ގެންގޮސްދިނުމުގައި މުހިންމު ދައުރެއް އަދާކުރާ ބައެއްކަމެވެ. އަޝްރަފް ވިދާޅުވީ، ލިޔުންތެރިން ލިޔާ ލިޔުންތައް ލިޔަންވާނީ ފިތުނަޔާއި ހަސަދަވެރިކަމުން އެއްކިބާވެ ތިބެ، ތެދުވެރިކަމާ އެކުގައި ކަމަށެއެވެ. އަދި ވަކި އަތަކަށް ބުރަނުވާގޮތަށް ޒާތީ ނުވާނެ ފަދަގޮތަކަށް ކަމަށް އަޝްރަފް ވަނީ ފާހަގަކޮށްފައެވެ.

ދެވަނަ ކަމަކަށް އަޝްރަފް ފާހަގަކުރެއްވީ ލިޔާ ލިޔުންތައް ހުންނަންވާނީ އަޅުގަނޑުމެންގެ ދިވެހި ބަހުންކަމެވެ. އަޅުގަނޑުމެންނަކީ ދިވެހިން ކަމަށްވުމުން އަޅުގަނޑުމެންގެ ލިޔުންތައް ހުންނަންވާނީ ރީތި ދިވެހި ބަހުންކަމަށާއި ދިވެހި ހަމަތަކަށް ފޭތޭ ނަލަނަލަ ދިވެހިން ބަހުންކަމަށެވެ.

ލިޔުންތެރިންގެ ކިބައިން ފަހަކަށް އައިސް ފެންނަ ނުރަނގަޅު ސިފެއް ފާހަގަކުރައްވައި ޑރ. އަޝްރަފް ވިދާޅުވީ، ބައެއް ލިޔުންތެރިންގެ ވިސްނުން ހުންނަގޮތުން ދިވެހި ބަހާއި ބީރެއްޓެހި ދިވެހި ބަހުގެ ޒަމާންވީ ހަމަތަކަށް ނުފެތޭ އިބާރަތްތަކާއި ލިޔުންތައް ގިނަވަމުން ދާކަމަށެއެވެ. ބަހުގެ އުސްތާޛުން ޒަމާނުންސުރެ ގެންގުޅުއްވަމުން ގެންދެވި ބަހުގެ ރީތި ހަމަތައް ދޫކޮށްލައި އަމިއްލަ ވަންތަކަން އިޚްތިޔާރުކުރަމުން ދާކަން ފާހަކުރެވޭކަން އަޝްރަފް ވިދާޅުވިއެވެ.

މި ޚިޠާބު ނިންމަވާލައްވަމުން އަޝްރަފް ވަނީ ލިޔުންތެރިން ލިޔާ ލިޔުންތައް ބަހުގެ ހަމަތަކާ އެއްގޮތަށް ލިޔުއްވުމަށް އިލްތިމާސްކުރައްވައިފައެވެ. މި ކަމަކީ ޤައުމާއި ބަހަށްޓަކައި ކުރެވޭ މުހިންމު ކަމެއްކަން އަޝްރަފް ވަނީ ފާހަގަކުރައްވައިފައެވެ.

ރާއްޖޭގެ ލިޔުންތެރިންގެ ދުވަސް ފާހަގަކުރަނީ ކޮންމެ އަހަރެއްގެ ޖުލައި މަހުގެ 8 ވަނަ ދުވަހުއެވެ. އެއީ ރާއްޖޭގައި ޗާޕުކޮށްގެން އެންމެ ފުރަތަމަ މަޖައްލާއެއް ނެރުނު ދުވަހެވެ. އެގޮތުން މި ދުވަސް އެންމެ ފުރަތަމަ ރާއްޖޭގައި ފާހަގަކޮށްފައިވަނީ 1993 ވަނަ އަހަރު ޖުލައިމަހުގެ 8 ވަނަ ދުވަހުއެވެ.