ނޭޕާލްގައި ހުންނަ ދުނިޔޭގެ އެންމެ އުސް ފަރުބަދަ – މައުންޓް އެވަރެސްޓް ކައިރިން ދަތުރުކުރި ހެލިކޮޕްޓަރެއް ވެއްޓި އޭގައި ތިބި ހަ މީހުން މަރުވެއްޖެއެވެ. މަނަންގް އެއަރއިން އޮޕަރޭޓްކުރާ ހެލިކޮޕްޓަރު ވެއްޓިފައި ވަނީ މައުންޓް އެވަރެސްޓަށް އެރުމަށް ދަތުރުކުރާ ފަތުރުވެރިން މަޑުކުރާ ލޫކްލާ ކިޔާ ރަށުން ފުރައިގެން ވެރިރަށް ކަތްމަންޑޫއަށް ދަތުރުކުރި މަގުމަތީގައެވެ.
މި ހާދިސާގައި މަރުވެފައި ވަނީ ހެލިކޮޕްޓަރުގެ ޕައިލެޓާއި މެކްސިކޯގެ ފަސް ފަތުރުވެރިންނެވެ. ހެލިކޮޕްޓަރު ދުއްވަން އިން ޕައިލެޓަކީ ނޭޕާލުގެ ރައްޔިތެކެވެ. ހެލިކޮޕްޓަރު ވެއްޓުނީ ލޫކްލާއިން ފުރިތާ އަށް ވަރަކަށް މިނެޓު ފަހުން ކަމުގައި ނޭޕާލުގެ ސިވިލް އޭވިއޭޝަން އޮތޯރިޓީ (ސީ.އޭ.އޭ.އެން)އިން ބުނެއެވެ. މި ހާދިސާގައި ހެލިކޮޕްޓަރަށް ވަނީ ބޮޑެތި ގެއްލުންތަކެއް ލިބިފައެވެ.
ހެލިކޮޕްޓަރު ވެއްޓުމާ ގުޅިގެން އޭގައި ދަތުރުކުރި މީހުން ހޯދުމަށް އިތުރު ދެ ހެލިކޮޕްޓަރު ފޮނުވާފައިވެއެވެ. ނަމަވެސް، މޫސުން ތަން ނުދިނުމުގެ ސަބަބުން ހެލިކޮޕްޓަރު ވެއްޓުނު ސަރަޙައްދަށް ދަތުރު ކުރުމަށް ހުރަސްތަކެއް ކުރިމަތިވި ކަމުގައި އޮފިޝަލުން ވިދާޅުވިއެވެ. ނަމަވެސް، މި ހާދިސާގައި މަރުވި މީހުންގެ ހަށިތައް މިހާރު ކަތްމަންޑޫއަށް ގެންގޮސްފައިވާ ކަމުގައި ތްރީބުވަން ބައިނަލްއަޤުވާމީ ވައިގެ ބަނދަރުގެ ޖެނެރަލް މެނޭޖަރު ޕްރަތާބް ބާބޫ ތިވާލީ ވިދާޅުވިއެވެ.
ހެލިކޮޕްޓަރު ވެއްޓި މެކްސިކޯގެ ފަތުރުވެރިންތަކެއް މަރުވުމާ ގުޅިގެން ނޭޕާލުގެ ބޮޑުވަޒީރު ޕުޝްޕާ ކަމަލް ދަހަލް ވަނީ ހިތާމާފާޅުކުރައްވާ ކަމުގައި ވިދާޅުވެފައެވެ. ނޭޕާލަކީ ފަރުބަދަމަތީ ޤައުމެކެވެ. އަދި، އެއްގަމު ދަތުރުފަތުރަށް ޚާއްޞަކޮށް ގިނަ މަގުތައް ހަދާފައި ނެތްއިރު، ހެލިކޮޕްޓަރު ދަތުރުފަތުރުގެ ސިނާއަތަކީ އެ ޤައުމުގައި ވަރަށް ބޮޑު ވިޔަފާރިއެކެވެ.
ނަމަވެސް، ނޭޕާލަކީ ވައިގެ ދަތުރުފަތުރުގެ ސަލާމަތީ ކަންކަން ދަށް ޤައުމެކެވެ. އަދި، ވައިގެ ދަތުރުފަތުރުގެ އެކްސިޑެންޓުތައް ގިނަ ޤައުމެކެވެ. މި އަހަރުގެ މޭ މަހުގެ ތެރޭގައި ހެލިކޮޕްޓަރެއް ވެއްޓި އެކަކު މަރުވެ އިތުރު ހަތަރު މީހަކަށް އަނިޔާވިއެވެ. އެ ހާދިސާ ހިނގާފައި ވަނީ އެ ޤައުމުގެ އުތުރުގެ ސަރަޙައްދުގައެވެ.
މީގެ އިތުރުން، 2015 ވަނަ އަހަރު އެ ޤައުމަށް ކުރިމަތިވި ބިންހެލުމާ ގުޅިގެން ހާލުގައި ޖެހުނު މީހުންނަށް އިންސާނީ އެހީ ފޯރުކޮށްދޭން ބޭނުންކުރި ބައެއް ހެލިކޮޕްޓަރުތައް ވެއްޓި ގިނަ ޢަދަދެއްގެ ބަޔަކު މަރުވެފައިވެއެވެ. ނޭޕާލްގައި ގިނަ ޢަދަދެއްގެ މަތިންދާބޯޓު އެކްސިޑެންޓުތައް ވެސް ހިނގާފައިވާ ކަން ފާހަގަކުރެވެއެވެ.
މި އަހަރުގެ ޖަނަވަރީ މަހު ފަތުރުވެރިންގެ މެދުގައި މަގުބޫލު ރަށެއް ކަމުގައިވާ ޕުކަރާއަށް ދަތުރުކުރި މަތިންދާބޯޓެއް ވެއްޓުނު ހާދިސާގައި އޭގައި ދަތުރުކުރި 72 މީހުން މަރުވިއެވެ. 2018 ވަނަ އަހަރު ޔޫ.އެސް-ބަންގްލާ އެއަރލައިންސްގެ މަތިންދާބޯޓެއް ވެސް ވެއްޓިފައިވެއެވެ. އެ ހާދިސާގައި 51 މީހުން މަރުވެ، އިތުރު 20 މީހަކަށް ބޮޑެތި އަނިޔާތަކެއް ލިބުނެވެ.
ނޭޕާލްގައި ހިނގާފައިވާ އެންމެ ނުރައްކާތެރި ވައިގެ އެކްސިޑެންޓު ހިނގާފައި ވަނީ 1992 ވަނަ އަހަރުއެވެ. ޕާކިސްތާން އިންޓަރނޭޝަނަލް އެއަރލައިންސްގެ މަތިންދާބޯޓެއް ވެއްޓުނު އެ ހާދިސާގައި މަތިންދާބޯޓުގައި ދަތުރުކުރި 168 މީހުން ވަނީ މަރުވެފައެވެ. އެ މަތިންދާބޯޓު ވެއްޓިފައި ވަނީ ކަތްމަންޑޫ ވައިގެ ބަނދަރުގައި ޖައްސަން އުޅުމުގެ ތެރޭގައެވެ.