ޖަޕާންގެ ހުޅަނގުދެކުނުގައިވާ ސަރަޙައްދުތަކަށް ބޯކޮށް ވާރޭވެހި ފެންބޮޑުވުމާ ގުޅިގެން ހިނގި އެކި ހާދިސާތަކުގައި ދެ މީހަކު މަރުވެއްޖެވެ. ފެންބޮޑުވުމާ ގުޅިގެން އެ ސަރަޙައްދުގެ ބައެއް ކޯރުތައް ފުރިގެން ބަންޑުންވެފައިވާއިރު، ބައެއް ސަރަޙައްދުތަކުގެ ބިންގަނޑު ކެނޑި، ކިސަޑު ފޭބުމުގެ ހާދިސާތައް ވެސް ވަނީ ހިނގާފައެވެ.
ސަގާ ކިޔާ ރަށެއްގެ ބިންގަނޑު ކަނޑައިގެން ގޮސް ހިނގި ނުރައްކާތެރި ހާދިސާއެއްގައި ޢިމާރާތެއް ވެއްޓި 77 އަހަރުގެ އަންހެނެއް މަރުވެފައިވާ ކަމުގައި އޮފިޝަލުން ވިދާޅުވެއެވެ. އެ ހާދިސާގައި އެ އަންހެންމީހާގެ ފިރިމީހާއަށް ވެސް ބޮޑެތި އަނިޔާތަކެއް ލިބުނެއެވެ. އޭނާއަށް ހޮސްޕިޓަލުގައި އެޑްމިޓުކޮށްގެން މިހާރު ފަރުވާދެމުންދާ ކަމުގައި ސަގާގެ އޮފިޝަލުން ވިދާޅުވެއެވެ.
ދެވަނަ މީހަކު މަރުވެފައި ވަނީ ފުކުއޯކާ ސަރަޙައްދުގެ ރަށެއް ކަމުގައިވާ ކުރުމޭއިންނެވެ. އެއީ، 70 އަހަރުގެ ފިރިހެނެކެވެ. އޭނާ ވެސް މަރުވީ ބިންގަނޑު ކެނޑުމުގެ ހާދިސާއެއްގައެވެ. އެ ހާދިސާގައި އިތުރު ނުވަ މީހަކަށް ބޮޑެތި އަނިޔާތަކެއް ލިބި، ހޮސްޕިޓަލުގައި އެޑްމިޓުކޮށްގެން ފަރުވާދެމުންދާ ކަމުގައި ކުރުމޭގެ އޮފިޝަލުން ވިދާޅުވެއެވެ.
ޖަޕާންގެ ހުޅަނގުދެކުނުގެ ސަރަޙައްދުތަކަށް ކުރަމުންދާ ވިއްސާރައިގެ ސަބަބުން ހިނގާފައިވާ ތަފާތު އެކި ހާދިސާތަކުގައި މަރުވެފައިވާ މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައި އޮފިޝަލުން ވިދާޅުވެއެވެ. ފެންބޮޑުވުމާ ގުޅިގެން މަރުވެފައިވާ މީހުންގެ ޢަދަދު ފަހަކަށްވުރެ އިތުރުވެފައިވާ ކަމަށް ކްޔޯދޯ ނިއުސް އޭޖެންސީން ރިޕޯޓުކުރެއެވެ. ނަމަވެސް، ޖަޕާނުގެ އެއްވެސް ރަސްމީ އިދާރާއަކުން އެ ޢަދަދު ކަށަވަރުކޮށްދީފައެއް ނުވެއެވެ.
ކުރުމޭގެ އިތުރުން ފުކުއޯކާގެ އެހެން ރަށެއް ކަމުގައިވާ ހިރޯކަވާއިން މަރުވެފައިވާ އިތުރު ދެ މީހެއްގެ ހަށިގަނޑު ފެނިފައިވާ ކަމަށް ކުރުމޭގެ އޮފިޝަލުން ވިދާޅުވެއެވެ. އަދި، ކުރުމޭއާ އިންވެގެން އޮންނަ އޯއިތާއިން ވެސް މަރުވެފައިވާ އަންހެނެއްގެ ހަށިގަނޑު ފެނިފައިވާ ކަމަށް އެ ސަރަޙައްދުގެ އޮފިޝަލުން ވަނީ ވިދާޅުވެފައެވެ.
މޫސުން ގޯސްވެ ބޯކޮށް ވާރޭވެހޭނެ ކަމަށް ލަފާކޮށް ޖަޕާނުގެ ހުޅަނގުދެކުނުގައިވާ ސަރަޙައްދުތަކުގައި ދިރިއުޅޭ ދެ މިލިޔަނަށް ވުރެ ގިނަ މީހުންނަށް ރައްކާތެރި ކަމުގެ ފިޔަވަޅުތައް އެޅުމަށް އެ ޤައުމުގެ މޫސުމާ ބެހޭ އިދާރާއިން ވަނީ އިރުޝާދުދީފައެވެ. އެ ސަރަޙައްދުތަކުގެ ތެރޭގައި ފުކުއޯކާއާއި ސަގާއާއި އޯއިތާގެ އިތުރުން ހިރޮޝީމާއާއި ޔަމަގޫޗީ ވެސް ހިމެނެއެވެ. އެ ސަރަޙައްދުތަކުގައި ދިރިއުޅޭ 420,000 އަށްވުރެ ގިނަ މީހުންނަށް ރައްކާތެރި ހިސާބުތަކަށް ބަދަލުވުމަށް ވެސް ވަނީ އިރުޝާދުދީފައެވެ.
ފެންބޮޑުވުމާއި ބިންގަނޑު ކެނޑުމުގެ ސަބަބުން ގެއްލުން ލިބިފައިވާ ސަރަޙައްދުތަކުގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމާ ގުޅޭ ކަންކަން ވިލަރެސްކުރުމަށް ޚާއްޞަ ޓާސްކްފޯހެއް އެކުލަވައިލާފައިވާ ކަމުގައި ޖަޕާނުގެ ބޮޑުވަޒީރުގެ އޮފީހުން ބުންޏެވެ.
ޖަޕާން ސަރުކާރުގެ ތަރުޖަމާނު ހިރޯކާޒޫ މަތްސުނޯ ވިދާޅުވީ، ވިއްސާރައިގެ ސަބަބުން ލިބިފައިވާ ގެއްލުމުގެ އަގު އަންދާޒާ ކުރަން މަސައްކަތް ކުރަމުންދާ ކަމުގައެވެ. އަދި، ހާލުގައި ޖެހިފައިވާ މީހުން ސަލާމަތްކޮށް، ފުރާނައަށް ނުރައްކާވެފައިވާ މީހުން ރައްކާތެރިކުރަން މަސައްކަތް ކުރަމުންދާ ކަމުގައެވެ.
2021 ވަނަ އަހަރު ވެސް ޖަޕާނަށް ބޯކޮށް ވާރޭވެހުމުގެ ސަބަބުން ހިނގި ނުރައްކާތެރި ބިންގަނޑު ކެނޑުމުގެ ހާދިސާއެއްގައި 27 މީހުން މަރުވިއެވެ. އެ ހާދިސާ ހިނގާފައި ވަނީ އެ ޤައުމުގެ މެދުތެރޭގައިވާ ރިސޯޓު ރަށެއް ކަމުގައިވާ އަތާމީގައެވެ. އަދި، 2018 ވަނަ އަހަރު ޖަޕާނުގެ ހުޅަނގުގައިވާ ސަރަޙައްދުތަކުގައި ފެންބޮޑުވެ ބިންގަނޑު ކެނޑުމާ ގުޅިގެން 200 އަށްވުރެ ގިނަ މީހުން މަރުވިއެވެ.