ޔޫކްރެއިންގެ ދެކުނުގައި އޮންނަ އަރިއަޚަފަށް ރަޝިޔާއިން ދިން މިސައިލް ހަމަލަތަކެއްގައި ޢާންމުންގެ ހަތް މީހުން މަރުވެއްޖެއެވެ. މި ހަމަލަތައް އަމާޒުކޮށްފައި ވަނީ ހަނގުރާމައިގެ ސަބަބުން ހާލުގައި ޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދޭ މަރުކަޒަކަށް ކަމުގައި ޔޫކްރެއިނުން ބުނެއެވެ. މި ހާދިސާގައި އިތުރު 13 މީހަކު ޒަޚަމުވި ކަމުގައި ޔޫކްރެއިންގެ ޕްރޮސިކިޔުޓަރ ޖެނެރަލްގެ އޮފީހުން ބުންޏެވެ.
އަރިއަޚަފުގެ ގަވަރުނަރު ޔޫރީ މަލަޝްކޯ ވިދާޅުވީ އިންސާނީ އެހީދޭ މަރުކަޒަކަށް ހަމަލަދީ ރަޝިޔާއިން ހަނގުރާމައިގެ ކުށެއް ހިންގާފައިވާ ކަމުގައެވެ. އެ މަރުކަޒު ހުންނަނީ އަރިޚަފުގައި ޢާންމުން ދިރިއުޅޭ ހިސާބެއްގައެވެ. މި ހާދިސާގައި މަރުވި މީހުންގެ ތެރޭގައި 43 އަހަރާއި 45 އަހަރާއި 47 އަހަރުގެ ތިން އަންހެނުންނާއި 47 އަހަރުގެ ފިރިހެނެއް ހިމެނޭ ކަމުގައި މަލަޝްކޯ ވިދާޅުވިއެވެ. މި ހަމަލާގައި ދެ ފަންގިފިލައަށް ނަގާފައިވާ އެ ޢިމާރާތް ވަނީ މުޅިން ސުންނާފަތިވެފައެވެ.
އަރިއަޚަފަކީ ޔޫކްރެއިންގެ ދެކުނުގައި ޒަޕޮރީޜިޔާ ސަރަޙައްދުގައި އޮންނަ ރަށެކެވެ. އެ ހިސާބުގައި ރަޝިޔާއާއި ޔޫކްރެއިންގެ ފައުޖުތަކުން ވަނީ ވަރުގަދައަށް ހަނގުރާމަ ކުރަމުންނެވެ. ޒަޕޮރީޜިޔާގެ ބޮޑު ބައެއް ރަޝިޔާ ސިފައިންގެ ބާރުގެ ދަށުގައި އޮތް ނަމަވެސް، ޔޫކްރެއިން ފަށާފައިވާ ކައުންޓަރއޮފެންސިވް ނުވަތަ ރައްދު ހަމަލާގެ އަސްކަރީ ކެމްޕޭނުގެ ދަށުން އެ ސަރަޙައްދުގައި ހަރަކާތްތެރިވާ ރަޝިޔާގެ ފައުޖުތަކާ ދެކޮޅަށް ވަރުގަދަ ހަމަލަތަކެއް ދަނީ ދެމުންނެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ރަޝިޔާގެ ސިފައިން ވަނީ ޔޫކްރެއިންގެ ބައެއް ސަރަޙައްދުތަކަށް އަތްގަދަކޮށްފައެވެ. އޭގެ ތެރޭގައި އިރުމަތީގައިވާ ދޮންބާސްގެ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާ ހިމެނެއެވެ. ރަޝިޔާގެ އިސްތިޢުމާރީ ސިފައިންގެ އަތްދަށުން މިނިވަންކަން ހޯދަން ޔޫކްރެއިނުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ހިންގަމުންނެވެ.