އުތުރު ކޮރެޔާއިން ދުރުރާސްތާގެ މިސައިލެއް ޓެސްޓުކޮށް، ދެކުނު ކޮރެޔާއާއި ޖަޕާނަށް ފުރައްސާރަކޮށްފިއެވެ. އުތުރު ކޮރެޔާއިން މިސައިލް ޓެސްޓު ހަދާފައި މި ވަނީ އެ ޤައުމުގެ އަމަލުތަކުގެ ސަބަބުން ސަރަޙައްދީ ސުލްޙަމަސަލަސް ކަމަށް ކުރިމަތިވެފައި އޮތް ނުރައްކަލާ ގުޅޭ ގޮތުން މަޝްވަރާ ކުރެއްވުމަށް ދެކުނު ކޮރެޔާއާއި ޖަޕާނުގެ އިސްވެރިން ބައްދަލުކުރައްވާނެ ކަން އިޢުލާނު ކޮށްފައިވާ ދަނޑިވަޅެއްގައެވެ.
ދެކުނު ކޮރެޔާއާއި ޖަޕާނުގެ އިސްވެރިން ބައްދަލުކުރައްވާފައި ވަނީ ލިތުއޭނިޔާގެ ވެރިރަށް ވިލްނިޔަސްގައި ކުރިއަށްދިޔަ ނޭޓޯގެ މެންބަރު ޤައުމުތަކުގެ އިސްވެރިންގެ ބައްދަލުވުމުގެ ހަވާސާގައެވެ. އުތުރު ކޮރެޔާއިން ދުރުރާސްތާ މިސައިލްގެ ޓެސްޓު ފެށުމާ އެކު ދެކުނު ކޮރެޔާއާއި ޖަޕާނުގެ އަސްކަރިއްޔާއިން އެ ޤައުމުތަކުގެ ވައިގެ ދިފާޢީ ނިޒާމުތައް ތައްޔާރީ ހާލަތަކަށް ގެނައެވެ.
އުތުރު ކޮރެޔާއިން މިސައިލް ޓެސްޓެއް ހަދާފައި މި ވަނީ އެމެރިކާގެ އަސްކަރިއްޔާއަށް އެ ޤައުމުން ނުރައްކާތެރި އިންޒާރެއް ދީފައިވާ ދަނޑިވަޅެއްގައި ކަން ފާހަގަކުރެވެއެވެ. އެމެރިކާގެ ޖާސޫސީ މަތިންދާބޯޓުތައް އުތުރު ކޮރެޔާގެ ވައިގެ ސަރަޙައްދުގެ ތެރެއަށް ވަންނަމުންދާ ކަމަށް ތުހުމަތުކޮށް، އެ ފަދަ މަތިންދާބޯޓުތަކަށް ހަމަލަދީ ވައްޓައިލާނެ ކަމުގެ އިންޒާރު އެ ޤައުމުން ވަނީ ދީފައެވެ.
އެމެރިކާގެ އަސްކަރިއްޔާގެ ނިއުކްލިޔަރ ސަބްމެރިނެއް ދާދިފަހުން ދެކުނު ކޮރެޔާގައި ބަނދަރުކުރުމާ ގުޅިގެން ވެސް އުތުރު ކޮރެޔާއިން ވަނީ ނުރުހުން ފާޅުކޮށްފައެވެ. އެއީ، ކްރޫޒް މިސައިލް ހަމަލަ ދިނުމުގެ ގާބިލުކަން ލިބިފައިވާ ސަބްމެރިނެއް ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. އެ ކަމާ ދެކޮޅަށް ވެސް ފިޔަވަޅުތަކެއް އަޅާނެ ކަމުގެ އިންޒާރު އުތުރު ކޮރެޔާއިން ދީފައިވެއެވެ.
އުތުރު ކޮރެޔާއިން މީގެ ކުރިން އަޖުމަ ބަލާފައިވާ ދުރުރާސްތާ މިސައިލްތަކާ އަޅައިބަލާއިރު، މި ފަހުން ޓެސްޓު ކުރި މިސައިލަކީ އެންމެ ދުރުރާސްތާއަކަށް ދަތުރުކޮށްފައިވާ މިސައިލް ކަމުގައި ޖަޕާނުން ބުންޏެވެ. ޖަޕާނުގެ ސީފް ކެބިނެޓް ސެކްރެޓަރީ ހިރޯކަޒު މަތުސުނޯ ވިދާޅުވީ އުތުރު ކޮރެޔާގެ މިސައިލް 74 މިނެޓަށް ވައިގެ ތެރޭގައި ދަތުރުކޮށްފައިވާ ކަމަށާއި، 6,000 ކިލޯމީޓަރު މަތިން 1,000 ކިލޯމީޓަރު ދުރަށް އެ މިސައިލް ދަތުރުކޮށްފައިވާ ކަމުގައެވެ.
މި އަހަރުގެ އޭޕްރީލް މަހު އުތުރު ކޮރެޔާއިން ވަނީ ހަކަތައިގެ ގޮތުގައި "ސޮލިޑް-ފިޔުލް" ބޭނުންކުރާ އިންޓަރކޮންޓިނެންޓަލް ބެލިސްޓިކް މިސައިލް (އައި.ސީބީ.އެމް)އެއް ވެސް ޓެސްޓުކޮށްފައެވެ. މަސްރަޙު ދިރާސާކުރާ ފަރާތްތަކުން ބުނާ ގޮތުގައި، އުތުރު ކޮރެޔާއިން އުފައްދާފައިވާ އައި.ސީ.ބީ.އެމްތައް ބޭނުންކޮށްގެން އެމެރިކާއަށް ހަމަލައެއް ދިނުމުގެ ގާބިލުކަން އެ ޤައުމުން ވަނީ ހޯދާފައެވެ. އަދި، އެ މިސައިލްތައް ފަރުމާކޮށްފައި ވަނީ ނިއުކްލިޔަރ ބޮން އުފުލޭ ގޮތަށް ކަމުގައި ވެސް އެ ފަރާތްތަކުން ބުނެއެވެ.
އުތުރު ކޮރެޔާއިން އެންމެ ފަހުން ޓެސްޓު ކުރި މިސައިލް ވެއްޓިފައި ވަނީ ޖަޕާނުގެ ޚާއްޞަ އިޤުތިޞާދީ ސަރަޙައްދު ކައިރިއަށެވެ. އެ މިސައިލް ވެއްޓުނީ ކޮރެޔާ ޕެނިންސިޔުލާގެ އިރުމަތިން 550 ކިލޯމީޓަރު ދުރަށް ކަމުގައި ޖަޕާނުން ބުންޏެވެ. މި މިސައިލް ޓެސްޓާ ގުޅިގެން ދެކުނު ކޮރެޔާގެ ރައީސް ޔުން ސުކް ޔޯލް ވަނީ އެ ޤައުމުގެ ޤައުމީ ސަލާމަތާ ބެހޭ ކައުންސިލުގެ ކުއްލި ބައްދަލުވުމެއް ބާއްވަވާފައެވެ.
އަދި، ޖަޕާނުގެ ބޮޑުވަޒީރު ފުމިޔޯ ކިޝިދާ ވެސް ވަނީ، އުތުރު ކޮރެޔާގެ އަމަލުތައް ވަރަށް ގާތުން ބަލައި، ތައްޔާރީ ހާލަތެއްގައި އޮތުމަށް އެ ޤައުމުގެ އަސްކަރިއްޔާއަށް އިރުޝާދު ދެއްވާފައެވެ. ވިލްނިޔަސްގައި ކިޝިދާއާއި ސުކް ޔޯލް ބޭއްވެވި ބައްދަލުވުމުގައި އޮސްޓްރޭލިޔާއާއި ނިއު ޒިލެންޑުގެ އިސްވެރިން ބައިވެރިވެ ވަޑައިގަންނެވި ކަމުގައި މަތުސުނޯ ވިދާޅުވިއެވެ.