ހޮޅުދޫ މަގުހެދުމުގެ ތެރެއިން ފާރެއް ވެއްޓި އަނިޔާވި 3 މީހުން ފަރުވާއަށްފަހު ދޫކޮށްލައިފި

ނ. ހޮޅުދޫ މަގުހެދުމުގެ މަސައްކަތުގެ ތެރެއިން ފާރެއްވެއްޓި އަނިޔާވި 3 މީހުންނަށް އުނގޫފާރު ރީޖިނަލް ހޮސްޕިޓަލުގައި ފަރުވާ ދިނުމަށްފަހު ދޫކޮށްލައިފިއެވެ.

މި ޙާދިސާ ހިނގާފައިވަނީ މިދިޔަ އަންގާރަ ދުވަހުއެވެ. ހޮޅުދޫ މަގު ހެދުމުގެ މަސައްކަތް ކުރަމުންދަނިކޮށް އާރް.ޑީ.ސީގެ 3 މުވައްޒަފެއްގެ ގަޔަށް ފާރު ވެއްޓުނީ، މަގުގެ ފާރާ ކައިރިން ވަޅު ކޮންނަމުންދަނިކޮށެވެ. އަނިޔާވި 3 މީހުންނަކީވެސް ހޮޅުދޫއަށް ނިސްބަތްވާ 3 މީހުންނެވެ.

އެ 3 މީހުންވެސް ވަނީ ހަމަ އެދުވަހު ފަރުވާ ދިނުމަށްޓަކާ ރ. އުނގޫފާރު ރީޖަނަލްހޮސްްޕިޓަލަށް ގެންގޮސްފައެވެ. އަދި އޭގެތެރެއިން ދެ މީހަކަށް ފަރުވާ ދިނުމަށްފަހު ވަނީ ހަމަ އެރޭ ހޮސްޕިޓަލުން ދޫކޮށްލާފައެވެ. ފާރު ވެއްޓި އަނިޔާވި ތިން މީހުންގެ ތެރެއިން އެކެއްގެ ބޯ ފަޅައިގެން ގޮސްފައިވާއިރު، އެކެއްގެ ކޮނޑަށް އަދި އަނެއް މީހާގެ އުނގަނޑަށް ވަނީ އަނިޔާވެފައެވެ.

ޕީއެސްއެމް ނިއުސްއަށް މައުލޫމަތު ދެއްވަމުން ހޮޅުދޫ ކައުންސިލުގެ ރައީސް ރިޟުވާން މުޙައްމަދު ވިދާޅުވީ، ހާލުބޮޑުވެ ހޮސްްޕިޓަލުގައި އެޑްމިޓްކުރި މީހާ މިއަދު ވަނީ ދޫކޮށްލާފައެވެ. އަދި ތިން މީހުންގެ ޙާހާލުވެސް މިހާރު ރަނގަޅު ކަމުގައި ކައުންސިލުން ވަނީ ވިދާޅުވެފައެވެ.

އަނިޔާ ލިބުނު 3 މީހުންގެ ތެރެއިން އުނަގަނޑަށް އަނިޔާ ލިބުނު މީހާވަނީ މިއަދު މެންދުރުގެ ވަގުތެއްގައި ހޮސްޕިޓަލުން ދޫކޮށްލާފައެވެ. އަދި ހަވީރުގެ ވަގުތެއްގާވަނީ ހޮޅުދޫއަށް ގޮސްފައެވެ.

ބެލެވޭ ގޮތުގައި ފާރު ވެއްޓުނީ ފާރުގެ އެއްފަރާތަށް ވެލިއަޅާފައި ހުއްޓާ ފާރާ ވަރަށް ކައިރިން ކޮންނުމުގެ ސަބަބުން ފާރު އަރިއަޅާލައިގެންނެވެ. ފާރުގެ މަގުމައްޗަށް ވެއްޓުނު ބައި ނަގާ މިހާރު ސާފުކޮށްފައިވާކަމަށްވެސް ހޮޅުދޫ ކައުންސިލުން ވިދާޅުވެއެވެ.