ނޭޓޯގެ ޤައުމުތަކުން "ނިއުކްލިޔަރ ޓެރެރިޒަމަށް" ހިތްވަރުދެމުންދާ ކަމަށް ތުހުމަތުކޮށް، ރަޝިޔާއިން ނޭޓޯއަށް ވަރަށް ބޮޑަށް ފާޑުކިޔައިފިއެވެ. ނޭޓޯއިން ނިއުކްލިޔަރ ޓެރެރިޒަމަށް ހިތްވަރުދޭ ކަމަށް ރަޝިޔާއިން ތުހުމަތުކޮށްފައި މި ވަނީ، ރަޝިޔާގެ ރަށެއްގައި އޮންނަ ނިއުކްލިޔަރ ހަކަތަ އުފައްދާ ޕްލާންޓެއް ހުންނަ ސަރަޙައްދަކަށް ނުރައްކާތެރި ޑްރޯން ހަމަލައެއް ދިނުމާ ގުޅިގެންނެވެ. އެ ހަމަލަދީފައި ވަނީ ޔޫކްރެއިނުން ކަމަށް ރަޝިޔާއިން ތުހުމަތު ކުރެއެވެ.
ޑްރޯން ހަމަލަ ދީފައި ވަނީ ރަޝިޔާގެ ހުޅަނގުގައި އޮންނަ ކުރްސްކް ސަރަޙައްދުގެ ރަށެއް ކަމުގައިވާ ކުރްޗިއަތަފަށެވެ. އެއީ، ރަޝިޔާއާއި ޔޫކްރެއިން ގުޅޭ ސަރަޙައްދީ ރޮނގު ކައިރީގައި އޮންނަ ރަށެކެވެ. ކުރްސްކުގެ ގަވަރުނަރު ރަމަން ސްޓްރަވޮއިތް ވިދާޅުވީ ޑްރޯން ހަމަލަ އަރާފައި ވަނީ ކުރްޗިއަތަފުގައި ޢާންމުން ދިރިއުޅޭ އެޕާޓްމަންޓް ޢިމާރާތަކަށް ކަމުގައެވެ. އެ ޢިމާރާތަކީ ކުރީގެ ރޫސީ ވިލާތުގެ ޒަމާނުގައި ބިނާކޮށްފައިވާ ނިއުކްލިޔަރ ހަކަތަ އުފައްދާ ޕްލާންޓެއް ކައިރީގައި ހުންނަ ޢިމާރާތެއް ކަމުގައި އޭނާ ވިދާޅުވިއެވެ.
މި ހަމަލާގައި އެއްވެސް މީހެއްގެ ފުރާނައަށް ނުރައްކާވެފައެއް ނުވެއެވެ. އަދި، ނިއުކްލިޔަރ ޕްލާންޓަށް ވެސް އެއްވެސް ވަރެއްގެ ގެއްލުމެއް ލިބިފައި ނުވާ ކަމުގައި ސްޓްރަވޮއިތް ވިދާޅުވިއެވެ. ކުރްޗިއަތަފަށް ދިން ޑްރޯން ހަމަލާއާ ގުޅިގެން ޔޫކްރެއިނުން ވަކި އެއްޗެއް ހާމަކޮށްފައެއް ނުވެއެވެ. ރަޝިޔާގެ ރަށްތަކަށް އަމާޒުކޮށްދޭ ޑްރޯން ހަމަލަތަކާ ގުޅޭ ގޮތުން ވާހަކަދެއްކުމަށް ޔޫކްރެއިނުން މީގެ ކުރިން ވެސް ވަނީ ދެކޮޅު ހަދާފައެވެ.
މީގެ ކުރިން ވެސް ރަޝިޔާގެ ރަށްތަކަށް ޑްރޯން ހަމަލަތައް އަމާޒުކޮށްފައިވެއެވެ. މޭ މަހުގެ ތެރޭގައި ރަޝިޔާގެ ރިޔާސީ ގަނޑުވަރު – ކްރެމްލިނަށް ދެ ޑްރޯން ބޭނުންކޮށްގެން ހަމަލަދޭން މަސައްކަތް ކޮށްފައިވެއެވެ. ނަމަވެސް، ރަޝިޔާއިން ވަނީ އެ ދެ ޑްރޯން ދިފާޢުކޮށް ވައްޓައިލާފައެވެ. އެއް ޑްރޯންގެ ސަބަބުން ކްރެމްލިންގެ ޢިމާރާތެއްގެ ފުރާޅަށް ކޮންމެ ވެސް ވަރެއްގެ ގެއްލުންތަކެއް ލިބުނުއިރު، އެއީ އެމެރިކާއިން އަޑީގައި އޮވެގެން ޔޫކްރެއިނުން ދީފައިވާ ހަމަލައެއް ކަމަށް ރަޝިޔާއިން ވަނީ ތުހުމަތު ކޮށްފައެވެ.
ކުރްޗިއަތަފުގައި ހުންނަ ނިއުކްލިޔަރ ޕްލާންޓް ކައިރިއަށް ޑްރޯން ހަމަލައެއް ދިނުމާ ގުޅިގެން ރަޝިޔާއިން ވަނީ ހުޅަނގުގެ ބާރުތަކަށް ވަރަށް ބޮޑަށް ފާޑުކިޔާފައެވެ. "ޔޫކްރެއިނަށް ޑްރޯންތައް ފޯރުކޮށްދޭ ޤައުމުތަކަށް ހީވާ ކަހަލަ، ނިއުކްލިޔަރ ޕްލާންޓަށް ގެއްލުންވެ، ނިއުކްލިޔަރ ކާރިސާއެއް ކުރިމަތިވެއްޖެ ނަމަ، އެ މީހުންނަށް މާސްއަށް ހިޖުރަ ކުރާނެ ވަގުތު ވާނެހެން. ވަގުތެއް ނުވާނެ. ނޭޓޯގެ މެންބަރު ޤައުމުތަގެ ރައްޔިތުން ދަންނަންވާނެ އެ ޤައުމުތަކުގެ ވެރިން ނިއުކްލިޔަރ ޓެރެރިޒަމަށް ހިތްވަރުދެމުންދާ ކަން،" މި ކަމާ ގުޅޭ ގޮތުން މަޒާޖީ ގޮތަކަށް ވާހަކަފުޅު ދައްކަވަމުން ރަޝިޔާގެ ޚާރިޖީ ވުޒާރާގެ ތަރުޖަމާނު މަރިޔާ ޒަޚަރްވާ ވިދާޅުވިއެވެ.
ޑްރޯން ހަމަލައާ ގުޅިގެން ކްރެމްލިންގެ ތަރުޖަމާނު ދްމީތްރީ ޕިސްކޯފް ވިދާޅުވީ ރަޝިޔާގެ ވައިގެ ދިފާޢީ ނިޒާމު ވަރަށް ފުރިހަމަށް މަސައްކަތް ކުރަމުންދާ ކަމުގައެވެ. އަދި، ރަޝިޔާގެ ރަށްތަކަށް ހަމަލަދޭން ބޭނުންކުރަމުންދާ ޑްރޯންތައް ދިފާޢުކޮށް ނައްތައިލަމުންދާ ކަމަށާއި، މި ކަމުގެ ފަހަތުގައި އޮތީ ޔޫކްރެއިން ކަން އެއީ ސިއްރެއް ނޫން ކަމުގައި ވެސް އޭނާ ވިދާޅުވިއެވެ.