އޭޝިޔާގެ އެކި ކަންކޮޅުތަކަށް މިހާރު ކުރަމުންދާ ވިއްސާރައިގައި 100 އަށްވުރެ ގިނަ މީހުން މަރުވެ، އެތަކެއް ހާސް ބަޔަކު ރައްކާތެރި ހިސާބުތަކަށް ބަދަލުކުރަން ޖެހިއްޖެއެވެ. ވިއްސާރައިގައި ފެންބޮޑުވެ، ބިންގަނޑު ކެނޑުމުގެ ހާދިސާތައް ހިނގައި، ބޮޑެތި ގެއްލުންތައް ލިބިފައިވާ ބައެއް ޤައުމުތަކުގެ ތެރޭގައި އިންޑިޔާ، ޗައިނާ އަދި ޖަޕާން ހިމެނެއެވެ.
ބައެއް ޤައުމުތަކަށް ނުރައްކާތެރި ތޫފާންތައް އަރާފައިވާއިރު، އިތުރު ޤައުމުތަކަށް ތޫފާންތަކާ ކުރިމަލިތާން ޖެހޭނެ ކަމުގެ އިންޒާރު މޫސުމާ ބެހޭ އިދާރާތަކުން ދަނީ ކުރަމުންނެވެ. މި ގޮތުން، ދެކުނު ކޮރެޔާގެ ވެރިރަށް ސޯލް އަދި އެ ރަށް ކައިރީގައި އޮތް ހިސާބުތަކަށް ނުރައްކާތެރި ތޫފާނެއް އަރާފައިވާއިރު، ފިލިޕީންސާ ދިމާލަށް ވެސް ތޫފާނެއް ދަތުރު ކުރަމުންދާ ކަމުގައި އެ ޤައުމުގެ މޫސުމާ ބެހޭ އިދާރާއިން ވަނީ އިންޒާރު ކޮށްފައެވެ.
ޖަޕާނަށް ބޯކޮށް ވާރޭވެހި، ފެންބޮޑުވެ ހިނގި އެކި ހާދިސާތަކުގައި މަރުވި މީހުންގެ ޢަދަދު ވަނީ އަށަކަށް އަރާފައެވެ. ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ ޖަޕާނުގެ ރަށެއް ކަމުގައިވާ ކްޔޫޝޫއަށެވެ. އެ ރަށުގައި ރެކޯޑު މިންވަރަކަށް ފެންބޮޑުވެފައިވާއިރު، ގެއްލިފައިވާ ކަމަށް ބެލެވޭ ބައެއް މީހުން ހޯދުމަށް މަސައްކަތް ކުރަމުންދާ ކަމުގައި އޮފިޝަލުން ވިދާޅުވެއެވެ. ކްޔޫޝޫގެ ދެ ޕްރިފެކްޗަރެއްގައި ދިރިއުޅޭ 420,000 އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.
ދުނިޔޭގެ މޫސުމާ ބެހޭ އިދާރާ – ވޯލްޑް މީޓިއޮރޮލޮޖިކަލް އޮގަނައިޒޭޝަން (ޑަބްލިޔު.އެމް.އޯ)ގެ ޑިރެކްޓަރ ފޯރ ހައިޑްރޮލޮޖީ، ވޯޓަރ އެންޑް ކްރަޔޮސްފިޔަރ ސްޓެފަން އޫލެންބްރޫކް ވިދާޅުވީ މޫސުމީ ބަދަލުތަކާ އެކު ފެންބޮޑުވުމުގެ ނުރައްކާ ދުނިޔޭގެ އެކި ކަންކޮޅުތަކަށް އިތުރު ވެފައިވާ ކަމުގައެވެ. ޖަޕާން ފަދަ ކުރިއަރާފައިވާ ޤައުމުތަކަށް މި ފަދަ ކާރިސާތަކަށް ވަރަށް ބޮޑަށް ތައްޔާރުވެފައިވާ ކަމުގައި ވެސް އޭނާ ވިދާޅުވިއެވެ.
"ނަމަވެސް، ފަގީރު ޤައުމުތަކުން ފެންބޮޑުވުމުގެ ހާދިސާތަކަށް ތައްޔާރުވެފައިވާ މިންވަރު ކުޑަ. ޢާންމުންނަށް އިންޒާރުދޭނެ ވަސީލަތްތައް ގާއިމުކޮށްފައެއް ނެތް. ފެން ހިންދާ ނިޒާމުތަކާއި، ފެންބޮޑުވުމުގެ ނުރައްކާ ކުޑަކުރާނެ ނިޒާމުތައް ގާއިމުކޮށްފައެއް ނެތް. މިއީ ވަރަށް ކަންބޮޑުވާ މައްސަލައެއް،" އޫލެންބްރޫކް ވިދާޅުވިއެވެ.
ދެކުނު ކޮރެޔާގެ ވެރިރަށް ސޯލްއަށް ކުރަމުންދާ ވިއްސާރައާ ގުޅިގެން 135 މީހުން ރައްކާތެރި ހިސާބުތަކަށް ބަދަލުކޮށްފައިވާ ކަމުގައި އެ ޤައުމުން ބުނެއެވެ. ފެންބޮޑުވުމާ ގުޅިގެން 4,000 އަށްވުރެ ގިނަ ގޭބީސީން ކަރަންޓުގެ ޚިދުމަތް ވެސް ވަނީ މެދުކެނޑިފައެވެ. ބޮޑުވަޒީރު ހަން ޑޮކް-ސޫ ވިދާޅުވީ އެންމެ ބޮޑު އިސްކަމެއް ދޭ ކަމަކީ ޢާންމު ރައްޔިތުންގެ ފުރާނަ ސަލާމަތް ކުރުމަށް ކަމުގައެވެ.
ފެންބޮޑުވުމާ ގުޅިގެން ދެން އެންމެ ބޮޑަށް އަސަރު ކުރަމުން ދަނީ ޗައިނާގެ އިތުރުން އިންޑިޔާގެ އުތުރުގެ ސަރަޙައްދުތަކަށެވެ. ފެންބޮޑުވުމާ ގުޅިގެން ހިނގާފައިވާ އެކި ހާދިސާތަކުގައި މިހާތަނަށް 100 އެއްހާ މީހުންގެ ފުރާނަ ގެއްލިފައިވާ ކަމުގައި އިންޑިޔާއިން ބުނެއެވެ. ފެންބޮޑުވުމާ ގުޅިގެން ވެރިރަށް ނިއު ދިއްލީގައި ދަތުރުފަތުރުގެ ބައެއް ޚިދުމަތްތައް ވެސް ވަނީ މެދުކަނޑައިލާފައެވެ.
ފެންބޮޑުވުމާ ގުޅިގެން ޗައިނާގައި ވެސް ގިނަ ޢަދަދެއްގެ ބަޔަކު މަރުވެފައިވާ ކަމުގައި އެ ޤައުމުން ބުނެއެވެ. ފެންބޮޑުވުމުގެ އަސަރު އެންމެ ބޮޑަށް ކޮށްފައިވާ ހުޅަނގުދެކުނު ޗޮންގްޗިންގުގައި ގިނަ ޢަދަދެއްގެ ޢިމާރާތަށް ގެއްލުންވެފައިވާ ކަމަށާއި، ބައެއް ޢިމާރާތްތައް ވެއްޓިފައިވާ ކަމުގައި ވެސް އެ ޤައުމުން ބުނެއެވެ.
ކެމްބޯޑިޔާގެ ވެރިރަށް ޕްނޮމް ޕެއިންގައި ވެސް ފެންބޮޑުވެފައިވާއިރު، ވިއްސާރައިގެ އަސަރު އެ ރަށުގެ 14 ޑިސްޓްރިކްޓަކަށް ކުރަމުންދާ ކަމުގައި އެ ޤައުމުން ބުނެއެވެ. ފިލިޕީންސްގެ ވެރިރަށް މައިނީލާގައި ވެސް ފެންބޮޑުވެ، އެއްގަމު ދަތުރުފަތުރަށް ހުރަސްއެޅުމުގައި ކަމުގައި އެ ޤައުމުން ރިޕޯޓު ކުރެއެވެ. އަދި، ބޯކޮށް ވާރޭވެހުމާ ގުޅިގެން ވައިގެ ދަތުރުފަތުރަށް ވެސް ހުރަސް އެޅުނެވެ.