ހދ. ހަނިމާދޫގައި 4 ފުރޮޅުލީ އުނޅަދު ދުއްވުމުގެ ލައިސަންސް ދޫކުރުމަށް ޑްރައިވިންގ ޓްރެކްއެއްް އެޅުމުގެ މަސައްކަތް ބަޔަކާއި ޙަވާލުކޮށްފިއެވެ. މި މަސައްކަތް ހަވާލުކޮށްފައިވަނީ މިނެޓް ޕްލަސް ފްރައިވެޓް ލިމިޑެޓާއެވެ.
ހަނިމާދޫ ކައުންސިލުން ވިދާޅުވީ، މިއީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމް.ޓީ.ސީ.ސީގެ ޢިޖްތިމާއީ ޒިންމާގެ ދަށުން ކުރިއަށްގެންދާ މަސައްކަތެއްކަމަށެވެ. އެގޮތުން މި މަޝްރޫޢަށް އެމް.ޓީ.ސީ.ސީއިން 8 ލައްކަ ރުފިޔާއަށްވުރެ ބޮޑު ޢަދަދެއް ހޭދަކުރާނެކަމަށް ކައުންސިލުން މަޢުލޫމާތުދެއްވައެވެ.
މިއީ އެމް.ޓީ.ސީ.ސީއާއި، ހަނިމާދޫ ކައުންސިލާއި ގުޅިގެން ކުރިއަށްގެންދާ ޕްރޮޖެކްޓެކެވެ. މި މަސައްކަތް ނިންމުމަށް ދީފައިވާ މުއްދަތަކީ 25 ދުވަހެވެ.
ހަނިމާދޫގައި މިހާރު ދޫކުރަނީ 2 ފުރޮޅުލީ އުޅަނދުގެ ލައިސަންސް އެކަންޏެވެ. އެގޮތުން ރަށާއި އަދި ކައިރި ރަށްރަށުގެ މީހުންވެސް ލައިސަންސް ނަގަން އަންނަކަމަށް ކައުންސިލުން ވިދާޅުވެއެވެ. 4 ފުރޮޅުލީ އުޅަނދު ދުއްވުމުގެ ލައިސަންސް ދޫކުރުމަށް އަޅާ ޑްރައިވިންގ ޓްރެކް ނިންމައި ސެޕްޓެމްބަރ ހިސާބުގައި ލައިސަންސް ދޫކުރަން ފެށޭނެކަމަށް ކައުންސިލުން ފާހަގަކުރައްވައެވެ.