ދެކުނު އެފްރިކާގެ އެންމެ ބޮޑު ރަށް ކަމުގައިވާ ޖޮހެނެސްބަރގްގެ މަގެއްގެ ދަށުގައި ބާރުގަދަ އެއްޗެއް ގޮވައި އެކަކު މަރުވެއްޖެއެވެ. އިތުރު 41 މީހަކު ޒަޚަމުވި މި ހާދިސާގެ ތަހުޤީޤު ކުރަމުންދާ ފަރާތްތަކުން ބުނީ، ގޮވާފައި ވަނީ މަގުގެ ދަށުގައި ވަޅުލާފައިވާ ގޭސް ހޮޅިއެއްގައި ކަމަށް ބެލެވޭ ކަމުގައެވެ. ނަމަވެސް، މި ހާދިސާ ހިނގަން މެދުވެރިވި ސަބަބު އަދި ކަށަވަރު ކުރެވިފައެއް ނުވެއެވެ.
މި ހާދިސާ ހިނގާފައި ވަނީ މަގުގައި ކާރޫބާރޫ ބޮޑު ވަގުތެއްގައެވެ. އަދި، ހާދިސާ ހިނގި ވަގުތު މަގުގައި ދުއްވާފައި ދިޔަ އަދި ޕާކުކޮށްފައިވާ އުޅަނދުފަހަރަށް ބޮޑެތި ގެއްލުންތަކެއް ލިބުނެވެ. އަދި، މަގުގެ ތާރުގަނޑު ވެސް ވަނީ ވަރަށް ބޮޑަށް ކަނޑައިގެން ގޮސްފައެވެ. މި ހާދިސާ ހިނގާފައިވާ ގައުޓެންގް ޕުރޮވިންސުގައި ގޭހުގެ ޚިދުމަތް ފޯރުކޮށްދޭ ކުންފުނިން ބުނީ، އެ ކުންފުނިން ގޭސް ފޯރުކޮށްދިނުމަށް ބޭނުންކުރާ ހޮޅިއެއް ގޮވާފައިވާ ކަމަށް ނުބެލެވޭ ކަމުގައެވެ.
ގުއަޓެންގް ޕްރޮވިންސުގެ ގަވަރުނަރު ޕަންޔާޒާ ލެސޫފީ ވިދާޅުވީ އެ ސަރަޙައްދުގައި މި ފަދަ ދެވަނަ ހާދިސާއެއް ހިނގާފާނެ ކަމުގެ ބިރު އޮތުމާއެކު، ކަމާ ބެހޭ މާހިރުން ގެނެސްގެން ތަހުޤީޤު ކުރަމުންދާ ކަމުގައެވެ. އަދި، ގޭސް ހޮޅުތަކާއި ކޭބަލްތަކުގެ ސަބަބުން އިތުރަށް މި ފަދަ އިތުރު ހާދިސާއެއް ހިނގާފާނެތޯ ބަލައި މި ފަދަ ހާދިސާއެއް ތަކުރާރުވިޔަ ނުދިނުމަށް މަސައްކަތް ކުރަމުންދާ ކަމުގައެވެ.
މި ހާދިސާއާ ގުޅިގެން އެ މަގުގައި ޢާންމުން ދިރިއުޅޭ ޢިމާރާތްތައް ވެސް ވަނީ ވަގުތީ ގޮތުން ހުސްކޮށްފައެވެ. އަދި، އެ ސަރަޙައްދުގައި ދިރިއުޅޭ ރައްޔިތުން ރައްކާތެރި ހިސާބުތަކަށް ބަދަލުކޮށްފައެވެ. މި ހާދިސާގައި ބައެއް ޢިމާރާތްތަކަށް ވެސް ވަނީ ގެއްލުން ލިބިފައެވެ. 34 އެއްގަމު އުޅަނދަށް ވެސް މި ހާދިސާގައި ވަނީ ގެއްލުންވެފައެވެ. އޭގެ ތެރޭގައި ގިނައީ މިނީބަހާއި ޓެކްސީއެވެ.
މި ހާދިސާގައި މަރުވި އެކެއްގެ ހަށިގަނޑު ފެނިފައިވާއިރު، ޒަޚަމުވި 40އެއްހާ މީހުންގެ ތެރެއިން 12 މީހެއްގެ ހާލު ސީރިޔަސް ކަމުގައި ޖޮހެނެސްބަރގްގެ އެމަރޖެންސީ މެނޭޖްމެންޓް ސަރވިސަސްގެ ތަރުޖަމާނު ރޮބަރޓް މުލައުދްޒީ ވިދާޅުވިއެވެ. އިތުރު 36 މީހަކަށް ފަރުވާ ދިނުމަށް ފަހު ހޮސްޕިޓަލުން ދޫކޮށްލާފައިވާ ކަމުގައި ވެސް އޭނާ ވިދާޅުވިއެވެ.