އަޅުވެތިކޮށްފައިވާ ހުޅަނގު އައްސޭރިއަށް ޔަހޫދީ އަސްކަރިއްޔާގެ ޖައްބާރު ސިފައިން އަރައި ހިންގި ލާއިންސާނީ އުދުވާންތަކެއްގައި ފަލަސްޠީނުގެ ދެ ޒުވާނުން ޝަހީދުކޮށްލައިފިއެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ ޝަހީދުކޮށްލާފައިވާ އެއް ކުއްޖަކީ އުމުރުން 17 އަހަރުގެ މުޙައްމަދު ފުޢާދު އަޠަލްބާޔިދު ކަމުގައެވެ. އޭނާ ޝަހީދުކޮށްލާފައި ވަނީ އޭނާގެ ބޮލަށް ބަޑި ޖަހައިގެންނެވެ.
މުޙައްމަދަކީ ރާމަاللهގެ އުތުރުން އޮންނަ އަލްޖަލްޒޫން ރެފިއުޖީ ކޭމްޕުގައި ދިރިއުޅޭ ކުއްޖެއް ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ބުންޏެވެ. އޭނާ ޝަހީދުކޮށްލާފައި ވަނީ ރާމަاللهއާ އިންވެގެން އޮންނަ އުންމު ޞަފާގައި ޔަހޫދީ ޓެރެރިސްޓު ސިފައިންނާއި ފަލަސްޠީނުގެ ރައްޔިތުންނާ ދެމެދު ހިނގި ކުރިމަތިލުންތަކެއްގެ ތެރެއިންނެވެ.
މުޙައްމަދު ޝަހީދުވީ އިސްތިޝާރީ ހޮސްޕިޓަލަށް ގެންގޮސް ފަރުވާދެމުން ދަނިކޮށް ކަމުގައި ވެސް ފަލަސްޠީނުގެ ޞިއްޙަތާ ބެހޭ ވުޒާރާއިން ބުންޏެވެ. އުންމު ޞަފާގައި ހިނގި ކުރިމަތިލުންތަކުގައި ޔަހޫދީ ޖައްބާރު ސިފައިން ފަލަސްޠީނުގެ ޢާންމުންނަށް ހަމަލަދޭން އަސްލު ވަޒަނާއި، ކަރުނަ ގޭހާއި ކަރަންޓު ބޮން ބޭނުންކޮށްފައިވާ ކަމުގައި ވެސް އެ ވުޒާރާއިން ބުންޏެވެ.
މުޙައްމަދުގެ ކުށަކީ، ހަމަނުޖެހުންތަކުގެ ތެރޭގައި ޔަހޫދީ ޓެރެރިސްޓު ސިފައިންނާ ދިމާލަށް ގައު އުކުމެވެ. ޔަހޫދީ އިސްރާޢީލުގެ އަސްކަރިއްޔާއިން ވަނީ ޖައްބާރު އަސްކަރިއްޔާގެ ސިފައިންނާ ދިމާލަށް ގައު އުކި ބަޔަކަށް ބަޑިން ހަމަލަދީފައިވާ ކަން ކަށަވަރުކޮށްދީފައެވެ. އަދި، އެ ހަމަނުޖެހުންތަކުގައި ފަލަސްޠީނުގެ ޒުވާނަކު ޝަހީދުވެފައިވާ ކަން ވެސް ޔަހޫދީ އަސްކަރިއްޔާއިން ކަށަވަރުކޮށްދެއެވެ.
މި މަހުގެ ކުރީކޮޅު ވެސް ޔަހޫދީ ޓެރެރިސްޓު ސިފައިން ވަނީ އުންމު ޞަފާގައި ޔަހޫދީންގެ އަޅުވެތިކަމާ ދެކޮޅަށް އަޑުއުފުލަމުން ދިޔަ ފަލަސްޠީނުގެ ޒުވާނުންނަށް ބަޑިން ހަމަލަދީފައެވެ. އެ އުދުވާންތަކުގައި އުމުރުން 24 އަހަރުގެ ޖަވާދު ހަމްދާން ޞާލިޙު ވަނީ ޝަހީދުކޮށްލާފައެވެ.
ފަލަސްޠީނުގެ ދެވަނަ ޒުވާނާ ޝަހީދުކޮށްލާފައި ވަނީ ހުޅަނގު އައްސޭރީގެ ނާބުލުސްއަށް ޔަހޫދީ ޖައްބާރު ސިފައިން އަރައި ހިންގި ލާއިންސާނީ ޖަރީމާތަކެއްގައެވެ. އެ އުދުވާންތަކުގައި އެކަކު ޝަހީދުވެ، އިތުރު މީހަކު ޒަޚަމުވެފައިވާ ކަމުގައި ފަލަސްޠީނުގެ ރެޑް ކްރެސެންޓުން ހާމަކުރެއެވެ. ޔަހޫދީ އިސްރާޢީލުން ބުނީ ސިފައިންގެ މީހެއްގެ ގައިގައި ކާރަކުން ޖައްސަން އުޅުނު ބަޔަކަށް ހަމަލަދީފައިވާނެ ކަމުގައެވެ. ޝަހީދުކޮށްލާފައި ވަނީ ކާރު ދުއްވަން އިން ޒުވާނާއެވެ.
އެ ހަމަލާގައި ޝަހީދުކޮށްލާފައި ވަނީ އުމުރުން 18 އަހަރުގެ ފައުޒީ މުޚްލަފާ ކަމުގައި ފަލަސްޠީނުގެ މީޑިޔާއިން ރިޕޯޓުކުރެއެވެ. ވަފާ ނޫސް އޭޖެންސީން ވަނީ ޔަހޫދީ ސިފައިން ހަމަލަދީފައިވާ އުޅަނދުގެ ވީޑިޔޯތައް ޢާންމުކޮށްފައެވެ. މި އަހަރުގެ މިހާތަނަށް ޔަހޫދީ ޓެރެރިސްޓު ސިފައިން ހުޅަނގު އައްސޭރިއާއި ބައިތުލްމަޤްދިސްގައި ހިންގާފައިވާ ލާއިންސާނީ ޖަރީމާތަކުގައި ފަލަސްޠީނުގެ ގިނަ ޢަދަދެއްގެ ބަޔަކު ޝަހީދުކޮށްލާފައިވެއެވެ.
މި މަހުގެ ކުރީކޮޅު ޔަހޫދީ ޓެރެރިސްޓު ސިފައިން ވަނީ ހުޅަނގު އައްސޭރީގެ ޖިނީން ރެފިއުޖީ ކޭމްޕުގައި ވެސް ލާއިންސާނީ ޖަރީމާތަކެއް ހިންގައި، ފަލަސްޠީނުގެ 12 މީހުން ޝަހީދުކޮށްލާފައެވެ. އެ މީހުން ޖިނީނަށް އަރާފައި ވަނީ ބަރުހަތިޔާރާއި އަސްކަރީ ޑްރޯންތަކާއި ހެލިކޮޕްޓަރުތަކާ އެކުގައެވެ. އެ އުދުވާންތަކުގައި ރެފިއުޖީ ކޭމްޕުގެ ބޮޑު ބައެއް ވަނީ ސުންނާފަތިކޮށްލާފައެވެ. އެ އުދުވާންތަކުގައި 100 އަށްވުރެ ގިނަ މީހުން ޒަޚަމުކޮށްލާފައިވާއިރު، ޖަރީމާތަކާ ގުޅިގެން ގިނަ ޢަދަދެއްގެ ބަޔަކު ވަނީ ޖިނީން ދޫކޮށް އެހެން ސަރަޙައްދުތަކަށް ހިޖުރަކޮށްފައެވެ.
މި އަހަރުގެ ފެބުރުވަރީ މަހު ޔަހޫދީ ޖައްބާރު ސިފައިން ވަނީ ނާބުލުސްއަށް އަރައި ވެސް ލާއިންސާނީ ޖަރީމާތަކެއް ހިންގާފައެވެ. އެ ޖަރީމާތަކުގައި ފަލަސްޠީނުގެ 11 މީހުން ޝަހީދުކޮށްލާފައިވާއިރު، އިތުރު 80 މީހަކު ވަނީ ޒަޚަމުކޮށްލާފައެވެ. އަދި، އޭގެ މަހެއްހާ ދުވަސް ކުރިން ޖިނީނަށް އަރައި ޔަހޫދީ ޓެރެރިސްޓު ސިފައިން ވަނީ ފަލަސްޠީނުގެ 10 މީހުން ޝަހީދުކޮށްލާފައެވެ. އެ މީހުންގެ ލާއިންސާނީ ޖަރީމާތަކާއި ހަނގުރާމައިގެ ކުށްތައް ހުއްޓުވަން މުޅި ބައިނަލްއަޤުވާމީ މުޖުތަމަޢު ވަނީ ނުކުޅެދިފައެވެ.