"ތާނަވާ" ކާނިވާ ކާމިޔާބު ކަމާއިއެކު ނިންމާލައިފި
-
މިއީ ދިވެހި އަދަބިއްޔާތާއި ސަޤާފަތް މި ދާއިރާއިން ރާއްޖޭގައި ބޭއްވި ފުރަތަމަ ކާނިވާ
-
މި ކާނިވާ ކުރިއަށް ގެންގޮސްފައިވަނީ ހުޅުމާލެ ސެންޓްރަލް ޕާކުގައި
-
މި ކާނިވަލުގައި 30 އަކަށް ސްޓޯލް ވަނީ ބަހައްޓާފައި
މިނިސްޓްރީ އޮފް އިކޮނޮމިކް ޑިވެލޮޕްމަންޓުން އިސްނަގައިގެން ބިޒްނަސް ސެންޓަރ ކޯޕަރޭޝަން،ބީސީސީން ރާއްޖޭގައި ބޭއްވި ދިވެހި އަދަބީ ކާނިވަލް "ތާނަވާ" ކާމިޔާބުކަމާއެކު ނިންމާލައިފިއެވެ.
ހުޅުމާލޭ ސެންޓްރަލް ޕާކުގައި ބުރާސްފަތި ދުވަހާއި ހުކުރު ދުވަހު ކުރިއަށްދިޔަ މި އަދަބީ ކާނިވަލަކީ މިފަދަ ގޮތަކަށް ދިވެހި އަދަބިއްޔާތާއި ސަޤާފަތާއި ގުޅޭ މަޢުޟޫއަކަށް ބިނާކޮށް، ރާއްޖޭގައި ބޭއްވި ފުރަތަމަ ކާނިވަލެވެ.
މިކާނިވަލުގެ މައިގަނޑު ބޭނުމަކީ ދިވެހި ލިޔުންތެރިންނާއި އަދަބިއްޔާތަށް ޚިދުމަތްކުރައްވާ ބޭފުޅުންގެ އަގުވަޒަންކޮށް އެފަރާތްތަކުން ކުރައްވަމުންދާ މަސައްކަތް އާންމުންނަށް ފަސޭހައިން ބަލާލެވޭނެފަދަ މާހައުލެއް ޤާއިމްކުރުން ކަމަށް ބީސީސީން ބުނެއެވެ.
މި ކާނިވަލުގައި 30 އަކަށް ސްޓޯލް ހުރިއިރު، އެ ސްޓޯލްތަކުން ދިވެހި ލިޔުންތެރިންގެ ފޮތްތަކާއި، ދިވެހި ސަޤާފަތާއި އަދަބިއްޔާތާ ގުޅުންހުރު ބައެއް ތަކެތިވެސް ލިބެން ހުއްޓެވެ. މިކާނިވަލްގައި ބައިވެރިވި ވިޔަފާރިތަކުން ވަނީ މިއީ ކާމިޔާބު ކާނިވަލެއްގެ ގޮތުގައި ސިފަކޮށްފައެވެ. އަދި ކުރިއަށް އޮތް ތަނުގައިވެސް މިފަދަ ކާނިވަލްތައް ބޭއްވުމަކީ މުހިންމު ކަމެއްގެ ގޮތުގައި އެ ވިޔަފާރިތަކުން ވަނީ ފާހަގަކޮށްފައެވެ. ދިވެހި ސަޤާފަތާއި އަދަބިއްޔާތާއި ގުޅުންހުރި ތަކެތި މާކެޓް ކުރުމަށް ކުރިން ފަހި ފުރުސަތުތަކެއް ލިބިފައި ނެތް ނަމަވެސް މިއީ އެ ވިޔަފާރިތައް ޕްރޮމޯޓްކުރުމަށް ބޭއްވުނު މުހިންމު ހަރަކާތެއްގެ ގޮތުގައި ވިޔަފާރިތަކުން ފާހަގަކުރިއެވެ.
ދިވެހި އަދަބާއި ގުޅުންހުރި އެކި ހަރަކާތްތަކާއި ދިވެހި ސަޤާފަތާއި ގުޅޭ އެކި ފަންނުވެރިންގެ މަސައްކަތްތައް ފެނިގެންދިޔަ މި ކާނިވަލުގައި، ދިވެހި ސަޤާފީ ހެދުންތަކާއި ރަސްރަސްކަލުން ތުރުކުރެއްވި ހެދުންކޮޅުތައް ފެނިގެންދިޔަ ފެޝަން ޝޯވއެއްވެސް ކުރިއަށްދިޔައެވެ.
ބީސީސީން ބުނީ، އާންމުންގެ ބޮޑު ތަރުހީބެއް މިކާނިވަލަށް ލިބުނު ކަމަށެވެ. މި ކާނިވާ ކުރިއަށް ގެންގޮސްފައިވަނީ ހުޅުމާލެ ސެންޓްރަލް ޕާކުގައެވެ.