އުތުރު ކޮރެޔާއިން އަނެއްކާ ވެސް ކްރޫޒް މިސައިލްތަކެއް ޓެސްޓުކޮށް، ދެކުނު ކޮރެޔާއާއި ޖަޕާނަށް ފުރައްސާރަކޮށްފިއެވެ. ދެކުނު ކޮރެޔާގެ އަސްކަރިއްޔާއިން ބުނީ އުތުރު ކޮރެޔާއިން ޓެސްޓު ކުރަން އުދުއްސައިލި މިސައިލްތައް ވެއްޓިފައި ވަނީ ކޮރެޔަން ޕެނިންސިޔުލާގެ ހުޅަނގު ފަރާތުން ކަނޑަށް ކަމުގައެވެ.
ޖުލައި 19 ވަނަ ދުވަހު ވެސް އުތުރު ކޮރެޔާއިން ވަނީ ދެ މިސައިލެއް ޓެސްޓުކޮށް، ނުވަތަ އަޖުމަ ބަލާފައެވެ. އުތުރު ކޮރެޔާއިން ޓެސްޓުކޮށްފައި ވަނީ އިންޓަރކޮންޓިނެންޓަލް ބެލިސްޓިކް މިސައިލް (އައި.ސީ.ބީ.އެމް)ތަކެވެ. އެއީ، އެ ޤައުމުން މިހާތަނަށް އަޖުމަބަލާފައިވާ އައި.ސީ.ބީ.އެމްތަކުގެ ތެރެއިން އެންމެ ދުރު ރާސްތާއަކަށް ދަތުރުކޮށްފައިވާ މިސައިލްތަކެވެ.
އޭގެ ފަހުން އުތުރު ކޮރެޔާއިން ކްރޫޒް މިސައިލްތަކެއް ޓެސްޓުކޮށް، ނުވަތަ އަޖުމަ ބަލާފައި މި ވަނީ އެ ޤައުމާއި އެމެރިކާއާ ދެމެދު އޮތް ނުތަނަވަސް ގުޅުންތައް އިތުރަށް ހޫނުވެފައިވާ ދަނޑިވަޅެއްގައެވެ. ދެ ޤައުމުން ވެސް ދަނީ އަސްކަރީ ބާރުވެރިކަމާއި ހަތިޔާރުތަކުގެ ކުޅަދާނަކަން އަނެއް ޤައުމަށް ދައްކަމުންނެވެ. ދާދި ފަހުން އެމެރިކާގެ ޖާސޫސީ މަތިންދާބޯޓުތަކެއް އުތުރު ކޮރެޔާގެ ވައިގެ ސަރަޙައްދަށް ވަދެފައިވާ ކަމަށް ތުހުމަތުކޮށް، އުތުރު ކޮރެޔާއިން ވަނީ އެ ފަދަ އުޅަނދު ފަހަރަށް ހަމަލަދޭނެ ކަމުގެ އިންޒާރު ދީފައެވެ.
ޖުލައި 19 ވަނަ ދުވަހު އުތުރު ކޮރެޔާއިން މިސައިލް ޓެސްޓުތައް ހަދާފައި ވަނީ އެމެރިކާގެ އަސްކަރީ ސަބްމެރިނެއް ދެކުނު ކޮރެޔާގައި ބަނދަރުކުރުމާ ގުޅިގެންނެވެ. އެމެރިކާގެ އަސްކަރީ މަނަވަރުތަކާއި ސަބްމެރިންތައް ދެކުނު ކޮރެޔާއަށް ފޮނުވުމާ ދެކޮޅަށް އުތުރު ކޮރެޔާއިން ވަނީ އިންޒާރުދީފައެވެ. އަދި، އެ ފަދަ އަމަލުތަކުގެ ބަދަލުގައި ނިއުކްލިޔަރ ހަތިޔާރު ބޭނުން ކުރާނެ ކަމުގެ އިންޒާރު ވެސް އުތުރު ކޮރެޔާއިން ދީފައިވެއެވެ.
އުތުރު ކޮރެޔާއިން އައި.ސީ.ބީ.އެމެއް ޓެސްޓު ކުރުމާ ގުޅިގެން އެ ކަމާ މެދު ކަންބޮޑުވުން ފާޅުކޮށް އެއީ ބޮޑު ނުރައްކަލެއްގެ ގޮތުގައި އެމެރިކާއާއި ދެކުނު ކޮރެޔާގެ އިތުރުން ޖަޕާނުން ވެސް ވަނީ ސިފަކޮށްފައެވެ. މި ކަން ކުށްވެރިކޮށް އެމެރިކާއާއި ޖަޕާނާއި ދެކުނު ކޮރެޔާއިން ނެރުނު ބަޔާނެއްގައި ބުނީ ޕްޔޮންގްޔެންގާ ދެކޮޅަށް ބައިނަލްއަޤުވާމީ މުޖުތަމަޢުން އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށި ކުރަން މަސައްކަތް ކުރާނެ ކަމުގައެވެ.
މި ގޮތުން، އުތުރު ކޮރެޔާގެ ރައްޔިތުން ބޭރު ޤައުމުތަކުގެ ވަޒީފާ އަދާކޮށްގެން ޤައުމަށް ފައިސާ ފޮނުވަން ހުރަސް އަޅާނެ ކަމަށާއި، އެ ޤައުމުން ހަތިޔާރު އުފައްދަން ފައިސާ ހޯދާ މަގުތައް ބަންދު ކުރާނެ ކަމުގައެވެ. އަދި، ސައިބަރ ހަރަކާތްތައް ހުއްޓުވަން ފިޔަވަޅުތަކެއް އަޅާނެ ކަމުގައެވެ.
މި ކަމާ ގުޅޭ ގޮތުން އެމެރިކާއިން ބުނީ، ޖަޕާނާއި ދެކުނު ކޮރެޔާގެ މިނިވަންކަމާއި ސިޔާދަތު ހިމާޔަތް ކުރަން އެހީތެރިވެދިނުމުގައި އެ ޤައުމުން ދެމި އޮންނާނެ ކަމުގައެވެ. އަދި، އެ ޤައުމުތަކުގެ މިނިވަންކަމާއި ސިޔާދަތަށް ނުރައްކާވެއްޖެ ހާލަތެއްގައި، އެ ކަން ދިފާޢުކުރަން އެމެރިކާގެ އަސްކަރިއްޔާގެ ފުރިހަމަ ބާރާއި ވަސީލަތްތައް ބޭނުންކުރަން ފަސް ނުޖެހޭނެ ކަމުގައެވެ.
މި އަހަރުގެ އޭޕްރީލް މަހު އުތުރު ކޮރެޔާއިން ވަނީ ހަކަތައިގެ ގޮތުގައި "ސޮލިޑް-ފިޔުލް" ބޭނުންކުރާ އައި.ސީބީ.އެމެއް ވެސް ޓެސްޓުކޮށްފައެވެ. މަސްރަޙު ދިރާސާކުރާ ފަރާތްތަކުން ބުނާ ގޮތުގައި، އުތުރު ކޮރެޔާއިން އުފައްދާފައިވާ އައި.ސީ.ބީ.އެމްތައް ބޭނުންކޮށްގެން އެމެރިކާއަށް ހަމަލައެއް ދިނުމުގެ ގާބިލުކަން އެ ޤައުމުން ވަނީ ހޯދާފައެވެ. އަދި، އެ މިސައިލްތައް ފަރުމާކޮށްފައި ވަނީ ނިއުކްލިޔަރ ބޮން އުފުލޭ ގޮތަށް ކަމުގައި ވެސް އެ ފަރާތްތަކުން ބުނެއެވެ.