ރަޝިޔާއަށް ވާގިވެރިވާ ޤައުމެއް ކަމުގައިވާ ބެލަރޫސަށް ދޭން ކޮންމެ ހަމަލައަކީ ސީދާ ރަޝިޔާއަށްދޭ ހަމަލައެއްގެ ގޮތުގައި ދެކޭނެ ކަމަށް ވިދާޅުވެ ރަޝިޔާގެ ރައީސް ވްލަޑިމިޔަރ ޕުޓިން ނޭޓޯގެ މެންބަރު ޤައުމެއް ކަމުގައިވާ ޕޮލެންޑަށް އިންޒާރު ދެއްވައިފިއެވެ. ބެލަރޫސަކީ ޕޮލެންޑާ ސަރަޙައްދީ އިން ހިއްސާކުރާ ޤައުމެކެވެ. ޕުޓިން ޕޮލެންޑަށް އިންޒާރު ދެއްވާފައި މި ވަނީ، ބެލަރޫސްއާއި ޕޮލެންޑު ގުޅޭ ސަރަޙައްދީ ރޮނގު ކައިރިއަށް އިތުރު ސިފައިންނާއި ހަތިޔާރު ފޮނުވަން ޕޮލެންޑުން މަސައްކަތް ފެށުމާ ގުޅިގެންނެވެ.
ބެލަރޫސާ ގުޅޭ ސަރަޙައްދީ ރޮނގު ކައިރިއަށް އިތުރު ސިފައިންނާއި ހަތިޔާރު ފޮނުވަން ޕޮލެންޑުން ނިންމާފައި ވަނީ ރަޝިޔާގެ ކުލީ ސިފައިންގެ ކުންފުނި – ވާގްނަރ ގުރޫޕުގެ ފައުޖުތައް ބެލަރޫސްއަށް ފޮނުވުމާ ގުޅިގެންނެވެ. ވާގްނަރގެ ކުލީ ސިފައިން މިހާރު ތިބީ ޕޮލެންޑުގެ ސަރަޙައްދީ ރޮނގު ކައިރީގައިވާ ބެލަރޫސްގެ އަސްކަރީ މަރުކަޒެއްގައެވެ. މީގެ އިތުރުން، ބެލަރޫސްއަށް ރަޝިޔާއިން ވަނީ އެ ޤައުމުގެ ނިއުކްލިޔަރ ހަތިޔާރު ވެސް ފޮނުވާފައެވެ.
ޕޮލެންޑުން ބެލަރޫސްގެ ބިންތައް ހިފަން އުޅޭ ކަމަށް ތުހުމަތުކޮށް ވާހަކަފުޅު ދައްކަވަމުން ޕުޓިން ވިދާޅުވީ ޕޮލެންޑުން އަދި ނޭޓޯގެ ފައުޖުތަކުން ބެލަރޫސަށް ހަމަލައެއް ދީފިނަމަ، އެ ޤައުމުގެ މިނިވަންކަމާއި ސިޔާދަތު ހިމާޔަތް ކުރަން ރަޝިޔާއިން ތެދުވާނެ ކަމުގައެވެ. އަދި، ރަޝިޔާގެ އަސްކަރިއްޔާގެ ފުރިހަމަ ބާރު ބޭނުން ކުރަން ފަސް ނުޖެހޭނެ ކަމުގައެވެ. އޭނާ ޕޮލެންޑަށް އިންޒާރު ދެއްވާފައި ވަނީ ރަޝިޔާގެ ސަލާމަތީ މަޖިލީހުގެ ބައްދަލުވުމެއްގައި ވާހަކަފުޅު ދައްކަވަމުންނެވެ. ރަޝިޔާގެ ދައުލަތުގެ މީޑިޔާއިން ވަނީ އެ ބައްދަލުވުން ލައިވްކޮށް ދުރަށް ފޮނުވާފައެވެ.
ބެލަރޫސްގެ ސަރަޙައްދީ ރޮނގު ކައިރިއަށް އިތުރު ސިފައިންނާއި ހަތިޔާރު ފޮނުވައި ސަލާމަތީ ފިޔަވަޅުތައް ވަރުގަދަ ކުރަން ނިންމާފައި ވަނީ، ވާގްނަރ ގުރޫޕުގެ ކުލީ ސިފައިންގެ ނުރައްކާ އެ ޤައުމަށް ކުރާނެ ކަމަށް ބެލެވޭތީ ކަމުގައި ވޯސޯގެ ސަލާމަތީ ކޮމިޓީން ބުންޏެވެ. ބެލަރޫސްގެ ބިންތައް ހިފަން ޕޮލެންޑުން ބޭނުންވާ ކަމަށް ޕުޓިން ކުރެއްވި ތުހުމަތުތައް ވެސް އެ ކޮމިޓީން ދޮގު ކުރިއެވެ. އަދި، މި ތުހުމަތުތަކާ ގުޅިގެން ވޯސޯގައި ހުންނަވާ ރަޝިޔާގެ ސަފީރު ހާޒިރުކޮށް އެ ކަމާ މެދު ސުވާލު ކުރާނެ ކަމަށް ޕޮލެންޑުގެ ބޮޑުވަޒީރު މަތެއުޝާ މޮރަވިއެޓްޒްކިއެގޯ ވިދާޅުވިއެވެ.
ވާގްނަރ ގުރޫޕުގެ ކުލީ ސިފައިންގެ ފައުޖުތައް ބެލަރޫސަށް ފޮނުވާފައި ވަނީ، އެ ގުރޫޕުގެ އިސްވެރިޔާ ޔެވްގެނީ ޕްރިގޮޜިންގެ އަމުރައް ރަޝިޔާ ސަރުކާރާއި އަސްކަރިއްޔާއާ ދެކޮޅަށް އެ ގުރޫޕުން ފެށި ބަޣާވާތް ނާކާމިޔާބުވުމާ ގުޅިގެންނެވެ. އެ ގުރޫޕުން ވަނީ ރަޝިޔާގެ ދެކުނަށް އަރައި ރަސްތޮފާއި ވަރޯނިޝް ކިޔާ ދެ ރަށް ހިފައި، އެ ދެ ރަށުގައިވާ އަސްކަރީ މަރުކަޒުތައް އެ ގުރޫޕުގެ ބާރުގެ ދަށަށް ގެންގޮސްފައެވެ.
ވާގްނަރ ގުރޫޕުން ފެށި ބަޣާވާތް ހުއްޓައިލާފައި ވަނީ ބެލަރޫސުން މެދުވެރިއްގެ ގޮތުގައި ކުރި މަސައްކަތުންނެވެ. އަދި، ޕުޓިންގެ ސަރުކާރާ އެކު ހެދި އެއްބަސްވުމެއްގެ ދަށުން ވާގްނަރ ގުރޫޕުގެ ކުލީ ސިފައިން ވަނީ ބެލަރޫސްއަށް ފޮނުވައިލާފައެވެ. ޕޮލެންޑުން ބުނީ ބެލަރޫސްގެ ސިފައިންނަށް ތަމްރީނު ދިނުމުގެ މަސައްކަތް ވާގްނަރގެ ކުލީ ސިފައިން ފަށާފައިވާ ކަމުގައެވެ.
ރަޝިޔާގެ އަސްކަރިއްޔާއާއި ވާގްނަރ ގުރޫޕުގެ އަމަލުތަކާ އެކު ޕޮލެންޑުގެ މިނިވަންކަމާއި ސިޔާދަތަށް ނުރައްކާވެފައިވާ ކަމަށް އެ ޤައުމުން ގަބޫލުކުރާއިރު، ބެލަރޫސާއި ޕޮލެންޑު ގުޅޭ ސަރަޙައްދީ ރޮނގު ކައިރިއަށް އިތުރު ސިފައިންނާއި ހަތިޔާރު ފޮނުވަން އެހީތެރިކަން ފޯރުކޮށްދޭނެ ކަމަށް ޖަރުމަނުވިލާތުން ވެސް ވަނީ ބުނެފައެވެ. އަދި، ނޭޓޯއިން ވެސް ވަނީ އެ ގުޅުމުގެ އިރުމަތީގައިވާ ޤައުމުތަކަށް އިތުރު ސިފައިންނާއި ހަތިޔާރު ފޮނުވާނެ ކަމަށް ބުނެފައެވެ.