ރަޝިޔާގެ އަސްކަރިއްޔާއިން މެދުކެނޑުމެއް ނެތި ޔޫކްރެއިންގެ ބަނދަރުމަތީ ރަށްތަކަށް ދެމުންދާ ހަމަލަތަކާ ގުޅިގެން ދުނިޔޭގެ އެކި ކަންކޮޅުތަކުގައި ހައިހޫނުކަމާ ކުރިމަތިލާން ޖެހިފައިވާ މީހުންގެ ޢަދަދު އިތުރުވާނެ ކަމަށް ބުނެ، އ.ދއިން އިންޒާރު ކޮށްފިއެވެ. ރަޝިޔާގެ އަސްކަރިއްޔާއިން ހަމަލަތައް އަމާޒު ކުރަމުން ދަނީ ބްލެކް ސީ ނުވަތަ ކަޅު ކަނޑުގެ އައްސޭރިފަށުގައިވާ ޔޫކްރެއިންގެ ބަނދަރުމަތީ ރަށްތައް ކަމުގައިވާ މިކޮލައިފާއި އަދިއްސާއަށެވެ.
ރަޝިޔާގެ ހަމަލަތައް ފަށާފައި މި ވަނީ، ޔޫކްރެއިނުގައި ހައްދާ ގޮވާމުގެ ބާވަތްތައް އެކްސްޕޯޓު ކުރުމަށް ރަޝިޔާއާ އެކު ހަދާފައިވާ އެއްބަސްވުމަށް އަމަލުކުރުން ހުއްޓައިލާފައިވާ ދަނޑިވަޅެއްގައެވެ. ރަޝިޔާއާއި ޔޫކްރެއިނާ ދެމެދު މި އެއްބަސްވުން ހަދާފައި ވަނީ 2022 ވަނަ އަހަރުގެ ފެބުރުވަރީ މަހު ރަޝިޔާ ސިފައިން ޔޫކްރެއިނަށް އަރައި ފެށި ހަނގުރާމައާ ގުޅިގެން ޔޫކްރެއިންގައި އުފައްދާ ގޮވާމުގެ ބާވަތްތައް އެކްސްޕޯޓު ކުރުމަށް ހުރަސްއެޅުމުންނެވެ. އެއްބަސްވުން އެކުލަވައިލުމުގައި މެދުވެރިއެއްގެ ދައުރު އަދާކޮށްފައި ވަނީ ތުރުކީވިލާތާއި އ.ދއިންނެވެ.
ރަޝިޔާ-ޔޫކްރެއިން ހަނގުރާމަ ފެށުމުގެ ކުރިން ޔޫކްރެއިނަކީ ދުނިޔޭގެ ބާޒާރަށް އެންމެ ގިނައިން ގޮވާމުގެ ބާވަތްތައް ފޯރުކޮށްދޭ ޤައުމެވެ. ނަމަވެސް، ހަނގުރާމަ ފެށުމާ އެކު ދުނިޔޭގެ ބާޒާރުގައި ގޮވާމުގެ ސްޓޮކް ހުސްވާން ފަށައި، ގޮވާމާއި އެހެނިހެން ކާބޯތަކެތީގެ އަގުތައް އުފުލެން ފެށިއެވެ. އަދި، ގިނަ ޤައުމުތަކެއްގައި އެތަކެއް ސަތޭކަ މީހުންނަށް ކާބޯތަކެތީގެ ރައްކާތެރިކަން ކަށަވަރުކޮށްދޭން ހުރަސްތައް ކުރިމަތިވިއެވެ.
ޔޫކްރެއިންގެ ބަނދަރުމަތީ ރަށްތަކަށް ރަޝިޔާއިން މެދުކެނޑުމެއް ނެތި ހަމަލަދޭން ފެށުމާ ގުޅިގެން ދުނިޔޭގެ އެކި ކަންކޮޅުތަކުގައި ހައިހޫނުކަމާ ކުރިމަތިލާން ޖެހިފައިވާ އެތަކެއް މިލިޔަން މީހުންގެ ފުރާނައަށް ނުރައްކާވުމުގެ ފުރުޞަތު ބޮޑުވެފައިވާ ކަމުގައި އ.ދއިން ބުނެއެވެ. ނުރައްކާ އެންމެ ބޮޑުވެފައި ވަނީ ފަގީރު ޤައުމުތަކުގައި މިހާރު ވެސް ހައިހޫނުކަމާ ކުރިމަތިލާން ޖެހިފައިވާ މީހުންނަށެވެ.
މި ކަމާ ގުޅޭ ގޮތުން އ.ދގެ އިންސާނީ އެހީއާ ބެހޭ އިދާރާ – އޮފީސް ފޯ ދަރ ކޯޑިނޭޝަން އޮފް ހިޔުމެނިޓޭރިޔަން އެފެއާޒްގެ އިސްވެރިޔާ މާޓިން ގްރިފިތްސް ވިދާޅުވީ ރަޝިޔާގެ އަމަލުތަކުގެ ސަބަބުން ގިނަ ޢަދަދެއްގެ ބަޔަކު ހައިހޫނުކަމާ ކުރިމަތިލާން ޖެހޭނެ ކަމުގައެވެ. އަދި، ބަނޑުހައިހޫނުކަމުގައި ގިނަ ޢަދަދެއްގެ ބަޔެއްގެ ފުރާނަ ގެއްލިގެންދާނެ ކަމުގައެވެ.
އަދިއްސާގެ ގަވަރުނަރު އަލިވް ކިޕަރް ވިދާޅުވީ ރަޝިޔާގެ ބައެއް ހަމަލަތައް ގޮވާމުގެ ބާވަތްތައް ރައްކާކުރާ ގުދަންތަކަށް އަމާޒު ކުރަމުންދާ ކަމުގައެވެ. އެއް ހަމަލައެއްގައި 100 ޓަނުގެ ފެހި އޮށާއި 20 ޓަނުގެ ހިމަ ގޮދަން ރައްކާކޮށްފައި ހުރި ގުދަނަކަށް ގެއްލުންވެ، އެ ތަނުގައި ރައްކާކޮށްފައި ހުރި ކާބޯތަކެތި ހަލާކުވެފައިވާ ކަމުގައި ވެސް އޭނާ ވިދާޅުވިއެވެ. އެ ހަމަލާގައި ދެ މީހަކު ޒަޚަމުވި ކަމުގައި ވެސް އޭނާ ވިދާޅުވިއެވެ.
ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވީ މިކޮލައިފާއި އަދިއްސާއަށް ރަޝިޔާއިން ދީފައިވާ ހަމަލަތަކުގައި މިހާތަނަށް 20 މީހަކު ޒަޚަމުވެފައިވާ ކަމުގައެވެ. އަދި، އެ ސަރަޙައްދުތަކަށް ރަޝިޔާއިން ދެމުންދާ ހަމަލަތަކީ ޓެރެރިސްޓު ހަމަލަތަކެއްގެ ގޮތުގައި އޭނާ ވަނީ ސިފަ ކުރައްވާފައެވެ.
ރަޝިޔާއިން ބުނީ ޔޫކްރެއިންގެ ބަނދަރުތަކަށް ހަމަލަދޭން ފަށާފައި ވަނީ ރަޝިޔާގެ ކްރަސްނަދަރު ސަރަޙައްދާއި ޔޫކްރެއިންގެ ކްރައިމިޔާ ގުޅައިދޭ "ކިއެރްޗް ބުރިޖަށް" އަމާޒުކޮށް ދިން ހަމަލަތަކުގެ ބަދަލު ހިފުމުގެ ގޮތުން ކަމުގައެވެ. ކްރައިމިޔާއަކީ 2014 ވަނަ އަހަރު ރަޝިޔާއިން އަތްގަދަކޮށްފައިވާ ޔޫކްރެއިންގެ ދެކުނުގައިވާ ކަޅު ކަނޑުގެ އައްސޭރިފަށުގައި އޮންނަ ސަރަޙައްދެކެވެ. ކިއެރްޗް ބުރިޖަށް ދީފައި ވަނީ ޓެރެރިސްޓު ހަމަލައެއް ކަމަށާއި އޭގެ ފަހަތުގައި އޮތީ ޔޫކްރެއިން ކަމަށް ރަޝިޔާއިން ތުހުމަތު ކުރި ނަމަވެސް ޔޫކްރެއިނުން ދަނީ އެ ކަން ދޮގު ކުރަމުންނެވެ.
ޔޫކްރެއިންގައި ހައްދާ ގޮވާމުގެ ބާވަތްތައް އެކްސްޕޯޓު ކުރުމުގެ ފުރުޞަތު ދިނުމަށް ހަދާފައިވާ އެއްބަސްވުމަށް ރަޝިޔާއިން އަލުން ރުޖޫއަވާނީ އެ ޤައުމުން ހުށަހަޅާފައިވާ ޝަރުޠުތައް ފުރިހަމަވުމުން ކަމުގައި ރައީސް ވްލަޑިމިޔަރ ޕުޓިން ވަނީ ވިދާޅުވެފައެވެ. ރަޝިޔާއިން ހުށަހަޅާފައިވާ މައިގަނޑު ޝަރުޠަކީ، އެ ޤައުމުގައި އުފައްދާ ގޮވާމުގެ ބާވަތްތަކުގެ އިތުރުން އެހިނިހެން ކާބޯތަކެއްޗާއި ގަސްކާނާގެ ބާވަތްތައް އެކްސްޕޯޓު ކުރުމަށް މިހާރު ހުރި ހުރަސްތައް ނައްތައިލުމެވެ. އަދި، އެ ކަންކަމާ ގުޅޭ ގޮތުން ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވައިލުމެވެ.