ކްރައިމިޔާގައި އޮންނަ ރަޝިޔާގެ އަސްކަރިއްޔާގެ ހަތިޔާރު ގުދަނަކަށް ދިން ޑްރޯން ހަމަލައަކާ ގުޅިގެން ރަޝިޔާގެ ކްރަސްނަދަރާއި ޔޫކްރެއިންގެ ކްރައިމިޔާ ގުޅައިދޭ "ކިއެރްޗް ބުރިޖު" ވަގުތީ ގޮތުން ބަންދުކޮށްފިއެވެ. ހަތިޔާރު ގުދަނަށް ދިން ހަމަލައާ ގުޅިގެން، އެ ތަން ވަށައިގެން ފަސް ކިލޯމީޓަރުގެ ސަރަޙައްދެއް ވަނީ ހުސްކޮށްފައެވެ. އަދި، އެ ސަރަޙައްދުގައި ދިރިއުޅޭ މީހުން ރައްކާތެރި ހިސާބުތަކަށް ބަދަލުކޮށްފައެވެ.
2018 ވަނަ އަހަރު ހުޅުވާފައިވާ ކިއެރްޗް ބުރިޖަކީ ރަޝިޔާއާއި ކްރައިމިޔާއާ ދެމެދު އެއްގަމާއި ރޭލު ދަތުރުފަތުރުގެ ޚިދުމަތް ފޯރުކޮށްދިނުމަށް ހުޅުވާފައިވާ ބުރިޖެކެއެވެ. އެ ބުރިޖަކީ ޔޫކްރެއިންގައި ހަރަކާތްތެރިވާ ރަޝިޔާގެ ފައުޖުތަކަށް ހަތިޔާރާއި އެހެނިހެން ސާމާނު ފޯރުށްދޭން ބޭނުން ކުރާ މައި އެއް މަގެވެ. ބުރިޖު ވަގުތީ ގޮތުން ބަންދުކުރަން ޖެހުމަކީ، ޔޫކްރެއިންގައި ހަނގުރާމަ ކުރަމުންދާ ރަޝިޔާގެ ސިފައިންނަށް ހަތިޔާރާއި އެހެނިހެން ސާމާނު ފޯރުކޮށްދިނުމަށް އޮތް ހުރަހެކެވެ.
ޔޫކްރެއިނުން ބުނީ ކްރައިމިޔާގެ ރަށެއް ކަމުގައިވާ އޮކްތިޔަބްރްސްކޭގައި ހުންނަ ރަޝިޔާގެ އަސްކަރިއްޔާއިން ތެޔޮ ރައްކާކުރާ ގުދަނަކާއި ހަތިޔާރު ގުދަނަކަށް ޑްރޯން ހަމަލައެއް ދީފައިވާނެ ކަމުގައެވެ. އެއީ ކްރައިމިޔާގެ މެދުތެރޭގައި އޮންނަ ރަށެކެވެ. ކްރައިމިޔާއަކީ މިހާރު ރަޝިޔާގެ ބައެއް ކަމުގައި ރަޝިޔާއިން ގަބޫލު ކުރި ނަމަވެސް، ރަޝިޔާގެ އިސްތިޢުމާރީ ސިފައިންނާ ދެކޮޅަށް ފަށާފައިވާ ކައުންޓަރއޮފެންސިވް ނުވަތަ ރައްދު ހަމަލާގެ އަސްކަރީ ކެމްޕޭންގެ ދަށުން އެ ސަރަޙައްދު ވެސް މިނިވަން ކުރަން ޔޫކްރެއިނުން ދަނީ މަސައްކަތް ކުރަމުންނެވެ.
ކްރައިމިޔާގައި ހުންނަ ރަޝިޔާގެ ގަވަރުނަރު ސިރްގިޔޭ އަކްސްޔޯނަފް ވިދާޅުވީ ޑްރޯން ހަމަލައާ ގުޅިގެން ހަތިޔާރު ގުދަނުގައި ހުރި ހަތިޔާރުތައް ގޮވާފައިވާ ކަމުގައެވެ. ނަމަވެސް، މި ހާދިސާގައި އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމަށާއި، އެއްވެސް ގެއްލުމެއް ވެސް ނުލިބޭ ކަމުގައި އޭނާ ވިދާޅުވިއެވެ. އޭނާ ފަހުން ވިދާޅުވީ ޑްރޯން ހަމަލައާ ގުޅިގެން ރޭލު ދަތުރުފަތުރަށް ހުރަސް އެޅުނު ކަމުގައެވެ.
ޑްރޯން ހަމަލާގައި އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމަށް އަކްސްޔޯނަފް ވިދާޅުވި ނަމަވެސް، މި ހަމަލާގައި 12 މީހަކު ޒަޚަމުވި ކަމުގައި ރަޝިޔާގެ މީޑިޔާތަކުން ރިޕޯޓު ކުރެއެވެ. އަދި، ހަތަރު މީހަކަށް ހޮސްޕިޓަލުގައި އެޑްމިޓުކޮށްގެން ފަރުވާދޭން ޖެހުނު ކަމަށް ވެސް މީޑިޔާތަކުން ބުނެއެވެ. ޑްރޯން ހަމަލައާ ގުޅިގެން ކިއެރްޗު ބުރިޖުގައި ދަތުރުފަތުރު ކުރުން ވަގުތީ ގޮތުން މެދުކަނޑައިލި ނަމަވެސް، ބުރިޖު މިހާރު ވަނީ ޢާންމު ދަތުރުފަތުރަށް ހުޅުވައިލާފައެވެ.
ހުސްވި ހަފުތާގައި ވެސް ކްރައިމިޔާ ބުރިޖުގެ ނަމުން މަޝްހޫރު އެ ބުރިޖަށް ހަމަލައެއް ދީފައިވާ ކަން ފާހަގަކުރެވެއެވެ. އެ ހަމަލައާ ގުޅޭ އިތުރު މަޢުލޫމާތު ރަޝިޔާއިން ހާމަކޮށްފައި ނުވި ނަމަވެސް، ބުރިޖަށް ގެއްލުންތަކެއް ލިބިފައިވާ ކަން ފޮޓޯތަކުންނާއި ވީޑިޔޯތަކުން ހާމަވެއެވެ. ޔޫކްރެއިންގެ ރައީސް ވޮލޮޑޮމީރް ޒެލެންސްކީ ދެކެވަޑައިގަންނަވާ ގޮތުގައި އެ ބުރިޖަކީ އަސްކަރީ އަމާޒެކެވެ. ސަބަބަކީ، އެއީ ޔޫކްރެއިންގައި ތިބި ރަޝިޔާގެ އިސްތިޢުމާރީ ސިފައިންނަށް ހަތިޔާރު ފޯރުކޮށްދޭން ބޭނުންކުރާ މައި މަގަކަށްވުމެވެ.
ހުސްވި 2022 ވަނަ އަހަރުގެ އޮކްޓޫބަރު މަހުގެ ތެރޭގައި އެ ބުރިޖަށް އަމާޒުކޮށް ނުރައްކާތެރި ބޮމުގެ ހަމަލައެއް ދީފައިވެއެވެ. އެ ހަމަލާގައި ބުރިޖަށް ލިބުނު ގެއްލުންތައް މަރާމާތު ކުރުމަށް ފަހު މި އަހަރުގެ ފެބުރުވަރީ މަހު އެ ތަން ވަނީ އަލުން ހުޅުވާފައެވެ. އެ ހާދިސާ ހިނގަން މެދުވެރިވި ސަބަބު ރަޝިޔާއިން އަދިވެސް ސާފުކޮށްދީފައެއް ނުވެއެވެ.