ސޫދާންގެ އަސްކަރިއްޔާއާއި ރެޕިޑް ސަޕޯޓް ފޯސަސް (އާރް.އެސް.އެފް)ގެ ފައުޖުތަކާ ދެމެދު ހިނގަމުންދާ އަސްކަރީ ކުރިމަތިލުންތަކުގެ ތެރެއިން ދީފައިވާ ރޮކެޓް ހަމަލަތަކެއްގައި ޢާންމުންގެ 16 މީހުން މަރުވެއްޖެއެވެ. ރޮކެޓް ހަމަލަތައް ދީފައި ވަނީ ސޫދާނުގެ ހުޅަނގުގައިވާ ދާރްފޫރުގެ ވެރިރަށް ނަޔާލާގައެވެ.
މި ކަމުގެ މަޢުލޫމާތު މީޑިޔާއާ ހިއްސާކޮށްފައި ވަނީ ދާރްފޫރުގެ ބާ ކައުންސިލުންނެވެ. އެ ކައުންސިލުން ބުނީ ރޮކެޓް ހަމަލަތަކުގައި މަރުވެފައިވާ މީހުންގެ ޢަދަދު 16 އަށް އަރާ ކަމަށާއި، ހަމަލާގައި އެއް ޢާއިލާއަކަށް ނިސްބަތްވާ ގިނަ ޢަދަދެއްގެ މެންބަރުން މަރުވި ކަމުގައެވެ. ހަމަލަތަކުގައި ގިނަ ޢަދަދެއްގެ ބަޔަކު ޒަޚަމުވި ކަމުގައި ވެސް އެ ކައުންސިލުން ބުންޏެވެ.
ހުޅަނގު ދާރްފޫރުގައި ވެސް އަސްކަރިއްޔާއާއި އާރް.އެސް.އެފްގެ ފައުޖުތަކުން ޢާންމު ރައްޔިތުންނަށް ހަމަލަދެމުންދާ ކަމަށާއި، ހުޅަނގު ދާރްފޫރުގެ އަލް-ޖުނައިނާގައި ސްނައިޕަރ ބަޑިން ދިން ހަމަލައެއްގައި ޢާންމުންގެ އެކަކު މަރުވެފައިވާ ކަމުގައި ވެސް އެ ކައުންސިލުން ބުންޏެވެ. އަސްކަރިއްޔާއާއި އާރް.އެސް.އެފާ ދެމެދު މި ވަގުތު އެންމެ ބޮޑަށް ހަމަލަ ބަދަލު ކުރަމުން ދަނީ ދާރްފޫރުގައެވެ.
ސޫދާންގެ ދާޚިލީ ހަނގުރާމައިގެ ދެ ކޮޅުގައި ތިބީ އަސްކަރިއްޔާގެ އިސްވެރިޔާ ޖެނެރަލް ޢަބްދުލް ފައްތާޙް އަލް-ބުރުހާނާއި އާރް.އެސް.އެފްގެ އިސްވެރިޔާ ޖެނެރަލް މުޙައްމަދު ހަމްދާން ދަގަލޯއެވެ. ވެރިކަން ހިންގުމާ ގުޅޭ ގޮތުން އުފެދުނު ޚިޔާލު ތަފާތުވުންތަކެއްގައި އާރް.އެސް.އެފްގެ ފައުޖުތަކުން ވަނީ އޭޕްރިލް މަހުގެ 15 ވަނަ ދުވަހު ވެރިރަށް ޚަރްތޫމަށް އަރައި އެ ރަށް ހިފަން މަސައްކަތް ކޮށްފައެވެ.
މި ހަމަނުޖެހުންތަކުގައި މަރުވެފައިވާ މީހުންގެ ޢަދަދު 3,000 އަށްވުރެ މައްޗަށް އަރާފައިވާ ކަމަށް ތަފާސްހިސާބުތަކުން ދައްކައެވެ. ނަމަވެސް، އެ ޢަދަދު 3,000 އަށްވުރެ އިތުރުވާނެ ކަމަށް ބެލެވޭ ކަމުގައި ދުނިޔޭގެ ޞިއްޙަތު ޖަމުޢިއްޔާ – ވޯލްޑް ހެލްތް އޮގަނައިޒޭޝަން (ޑަބްލިޔު.އެޗް.އޯ)އިން ބުނެއެވެ. ހަމަލަ ބަދަލުކުރަމުންދާ ސަރަޙައްދުތަކުގައި ހުރި ގިނަ ޞިއްޙީ ޚިދުމަތްދޭ ތަންތަން ބަންދުކޮށްފައިވާއިރު ހަމަނުޖެހުންތަކުގައި ޒަޚަމުވެފައިވާ މީހުންނަށް ފަރުވާދިނުމަށް ވަނީ ހުރަސް އެޅިފައެވެ.
2.2 މިލިޔަން މީހުން އަމިއްލަ ވަޒަނާއި ގެދޮރު ދޫކޮށް ރައްކާތެރި ހިސާބުތަކަށް ބަދަލުވެފައިވާ ކަމުގައި ރިޕޯޓުތައް ބުނެއެވެ. އޭގެ ތެރެއިން 645,000 ރެފިއުޖީން އަވައްޓެރި ޤައުމުތަކަށް ހިޖުރަކޮށްފައިވާ ކަމުގައި ހިޖުރަކުރާ މީހުންނާ ބެހޭ ބައިނަލްއަޤުވާމީ ޖަމުޢިއްޔާ – އިންޓަރނޭޝަނަލް އޮގަނައިޒޭޝަން ފޯ މައިގްރޭޝަން (އައި.އޯ.އެމު)ން ބުނެއެވެ. ސޫދާނުގައި އިންސާނީ އެހީއަށް ޖެހި، ރައްކާތެރިކަމަށް ބޭނުން ޖެހިފައިވާ މީހުންގެ ޢަދަދު 25 މިލިޔަނަށް އަރާފައިވާ ކަމުގައި އ.ދއިން ބުނެއެވެ.