އުތުރު އެފްރިކާގެ ޤައުމެއް ކަމުގައިވާ އަލްޖަޒާއިރުގެ ޖަންގަލިތަކުގައި ރޯވެފައިވާ އަލިފާންގަނޑުތައް ޢާންމުން ވަޒަންވެރިވެފައިވާ ސަރަޙައްދުތަކަށް ފެތުރި 34 މީހުން މަރުވެއްޖެއެވެ. އެ ޤައުމުގެ 16 ޕުރޮވިންސެއްގެ 97 އަށްވުރެ ގިނަ ސަރަޙައްދުގެ ޖަންގަލިތަކުގައި ރޯވެފައިވާ ކަމުގައި އެ ޤައުމުގެ ދާޚިލީ ވުޒާރާއިން ބުނެއެވެ.
ޖަންގަލިތަކުގައި ރޯވެފައިވާ އަލިފާންގަނޑުތައް ޢާންމުން ދިރިއުޅޭ ސަރަޙައްދުތަކާއި ދަނޑުބިންތަކަށް ފެތުރިފައިވާއިރު، އަލިފާންގަނޑުތައް ނިއްވަން 8,000 އަށްވުރެ ގިނަ މީހުންގެ މައްޗަށް އެކުލެވިގެންވާ ޓީމުތަކުން ދަނީ މަސައްކަތް ކުރަމުންނެވެ. އަލިފާންގަނޑުތައް އެންމެ ބޮޑަށް ފެތުރެމުން ދަނީ ފިނާޔާ، ބިޖާޔާ، ޒަބަރްބަރް އަދި ބުވައިރާގައި ކަމަށް އެ ޤައުމުގެ ދާޚިލީ ވުޒާރާއިން ބުނެއެވެ.
އެ ސަރަޙައްދުތަކުގައި ދިރިއުޅޭ 1,500 އަށްވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފައިވާއިރު، އިތުރު މީހުން ސަލާމަތް ކުރަން ވެސް އޮފިޝަލުން ދަނީ މަސައްކަތް ކުރަމުންނެވެ. ބިޖާޔާގައި މަރުވި މީހުންގެ ތެރޭގައި އަލިފާން ނިއްވުމުގެ މަސައްކަތުގައި އެހީތެރިކަން ފޯރުކޮށްދެމުން ދިޔަ ސިފައިންގެ ދިހަ މީހުން ހިމެނެއެވެ. އަދި، އިތުރު 26 މީހަކަށް ފަރުވާދީފައިވާ ކަމަށް ވެސް އޮފިޝަލުން ވިދާޅުވެއެވެ.
އަލްޖަޒާއިރުގެ ގިނަ ސަރަޙައްދުތަކެއްގެ ޖަންގަލިތަކުގައި ރޯވެފައިވާ ސަބަބު ދެނެގަތުމަށް ތަހުޤީޤު ކުރަމުންދާ ކަމުގައި އޮފިޝަލުން ވިދާޅުވެފައިވާއިރު، އެ ޤައުމުގެ ބައެއް ސަރަޙައްދުތަކުގައި ފިނިހޫނުމިން ވަނީ އާދަޔާ ޚިލާފަށް އުފުލިފައެވެ. ބައެއް ސަރަޙައްދުތަކުގައި ފިނިހޫނުމިން 48 ޑިގްރީ ސެލްސިއެސްއަށް މަތިވެފައިވާ ކަމުގައި އެ ޤައުމުގެ މޫސުމާ ބެހޭ އިދާރާއިން ހާމަކުރެއެވެ. ކުރިއަށް އޮތް މަހެއްހާ ދުވަހު އަލްޖަޒާއިރުގެ ގިނަ ސަރަޙައްދުތަކަށް ފިނިހޫނުމިން މަތިވާނެ ކަމުގައި ވެސް އެ އިދާރާއިން ބުނެއެވެ.
ފިނިހޫނުމިން މަތިވުމާ ގުޅިގެން އަލްޖަޒާއިރުގެ ގޭބީސީތަކާއި ވިޔަފާރިތަކުގައި ކަރަންޓު ބޭނުންކުރާ މިންވަރު ވެސް އާދަޔާ ޚިލާފަށް މަތިވެފައިވާ ކަމުގައި ކަރަންޓާއި ގޭހުގެ ޚިދުމަތް ފޯރުކޮށްދޭ ސޮނެލްޖާޒް ކުންފުނިން ބުނެއެވެ. އަދި، ކަރަންޓުގެ ޚިދުމަތް ފޯރުކޮށްދޭ އިންޖީނުގެތަކަށް ބާރު ބޮޑުވެ، ބައެއް ސަރަޙައްދުތަކުން ޚިދުމަތް މެދުކެނޑުމުގެ ފުރުޞަތު އޮތް ކަމުގައި ވެސް އެ ކުންފުނިން ބުންޏެވެ.
އަލްޖަޒާއިރުގެ އިތުރުން ދުނިޔޭގެ ގިނަ ސަރަޙައްދުތަކުގައި ފިނިހޫނުމިން މައްޗަށް ގޮސް، ބައެއް ޤައުމުތަކަށް ވަނީ ހޫނުގެ ތޫފާންތަކާ ކުރިމަތިވެފައެވެ. އޭގެ ތެރޭގައި ވިލާތުގެ ގިނަ ޤައުމުތައް ހިމެނެއެވެ. ވިލާތުގެ ޤައުމުތަކުގެ ތެރެއިން ގްރީސްގެ ޖަންގަލިތަކުގައި ރޯވެ، ބޮޑެތި ގެއްލުންތަކެއް ލިބިފައިވާ ކަމަށް އެ ޤައުމުން ހާމަކުރެއެވެ. ދުނިޔޭގެ މޫސުމާ ބެހޭ ޖަމުޢިއްޔާ – ވޯލްޑް މީޓިއޮރޮލޮޖިކަލް އޮގަނައިޒޭޝަން (ޑަބްލިޔު.އެމް.އޯ)ން ބުނީ ކުރިއަށް އޮތް އޮގަސްޓު މަހުގެ ތެރޭގައި ވެސް ދުނިޔޭގެ އެކި ކަންކޮޅުތަކުގައި ހޫނުގެ ތޫފާންތައް ދެމިގެންދާނެ ކަމުގައެވެ.