ކެމްބޯޑިޔާގެ ބޮޑުވަޒީރު ހުން ސެއިން 38 އަހަރަށް ފަހު އެ މަޤާމުން އިސްތިޢުފާ ދެއްވަން ނިންމަވާފައިވާ ކަން އިޢުލާނު ކުރައްވައިފިއެވެ. ހުން ސެއިންއަކީ ދުނިޔޭގެ އެންމެ ގިނަ ދުވަހު ވެރިކަން ކުރައްވާފައިވާ އެއް ވެރިޔާއެވެ. ބޮޑުވަޒީރު ކަމުގެ މަޤާމުން އިސްތިޢުފާ ދެއްވުމަށް ފަހު ހުން ސެއިން އެ މަޤާމުގެ މަސްއޫލިއްޔަތުތައް އޭނާގެ ދޮށީ ދަރިކަލުން ހުން މަނައެތާ ހަވާލު ކުރައްވާނެ ކަމަށް އިޢުލާނު ކުރެއްވިއެވެ.
38 އަހަރުގެ ދިގު މުއްދަތެއްގައި ވެރިކަން ކުރެއްވުމަށް ފަހު ބޮޑުވަޒީރު ކަމުގެ މަޤާމުން އިސްތިޢުފާ ދެއްވަން ނިންމަވާފައިވާ ކަން ހުން ސެއިން އިޢުލާނު ކުރައްވާފައި މި ވަނީ، މި ހަފުތާ ކުރީކޮޅު އެ ޤައުމުގައި ބޭއްވި ޢާންމު އިންތިޚާބުގައި އޭނާގެ ޕާޓީއަށް ބޮޑު ކާމިޔާބީއެއް ލިބިފައިވާ ދަނޑިވަޅެއްގައެވެ. އޭނާ މި ކަން އިޢުލާނު ކުރެއްވީ ޓީވީ މެދުވެރިކޮށް ޤައުމާ މުޚާތަބު ކުރައްވަމުންނެވެ.
އިތުރު ފަރާތެއްގެ ވާދަވެރިކަމެއް ނެތް ޢާންމު އިންތިޚާބުގައި 70 އަހަރުގެ ހުން ސެއިންގެ ޕާޓީން ވަނީ ޤާނޫނު ހަދާ މަޖިލީހުގެ ހުރިހާ ގޮނޑިއެއް ކާމިޔާބުކޮށްފައެވެ. ވެރިކަމުގެ މަސްއޫލިއްޔަތުތަކާ ދުރަށް ޖެހިވަޑައިގަންނަވަން ނިންމަވާފައިވާ ކަން ހުން ސެއިން އެންމެ ފުރަތަމަ އިޢުލާނު ކުރައްވާފައި ވަނީ 2021 ވަނަ އަހަރުއެވެ. ނަމަވެސް، އެ ކަން ކުރައްވާނެ ތާރީޚެއް އިޢުލާނު ކުރައްވާފައެއް ނުވެއެވެ.
ފާއިތުވި އަހަރުތަކުގެ ތެރޭގައި ހުން ސެއިން ގެންދެވީ ބޮޑުވަޒީރު ކަމުގެ މަސްއޫލިއްޔަތުތަކަށް އޭނާގެ ދޮށީ ދަރިކަލުން ހުން މަނައެތް ތައްޔާރު ކުރައްވަމުންނެވެ. ހުން މަނައެތް މިހާރު ހުންނެވީ ކެމްބޯޑިޔާގެ ޝާހީ އަސްކަރިއްޔާގެ އިސް ކޮމާންޑަރުގެ މަޤާމުގައެވެ. ހުން ސެއިން ވިދާޅުވީ އަންނަ އޮގަސްޓު މަހުގެ 10 ވަނަ ދުވަހު ހުން މަނައެތް ބޮޑުވަޒީރުކަމުގެ މަޤާމަށް ޢައްޔަންކުރައްވާނެ ކަމުގައެވެ.
ބޮޑުވަޒީރު ކަމުގެ މަޤާމުން އިސްތިޢުފާ ދެއްވަން ނިންމަވާފައިވީ ނަމަވެސް، ވެރިކަން ކުރާ ކެމްބޯޑިޔަން ޕީޕަލްސް ޕާޓީގެ ޒައީމުގެ މަޤާމުގައި ދެމިހުންނަވާނެ ކަމުގައި ހުން ސެއިން ވިދާޅުވިއެވެ. މަސްރަޙު ދިރާސާކުރާ ފަރާތްތަކުން ބުނީ، ހުން މަނައެތާ ބޮޑުވަޒީރު ކަމުގެ މަޤާމުގެ މަސްއޫލިއްޔަތުތައް ހަވާލު ކުރެއްވި ނަމަވެސް، ވެރިކަން ކުރާ ޕާޓީގެ ޒައީމުގެ ހައިސިއްޔަތުން ޤައުމުގެ ހުރިހާ ކަމެއްގެ ބާރު އޮންނާނީ ހުން ސެއިންގެ އަތްޕުޅުގައި ކަމުގައެވެ.
ކެމްބޯޑިޔާގެ ޢާންމު އިންތިޚާބުގެ ކެމްޕޭންގައި އުމުރުން 45 އަހަރުގެ ހުން މަނައެތް އިސް ދައުރެއް އަދާކުރައްވާފައިވެއެވެ. އަދި، ބައްޕާފުޅާ އެކު ކެމްޕޭން ޖަލްސާތަކުގައި ވެސް ބައިވެރިވެ ވަޑައިގެންނެވިއެވެ. ހުން ސެއިން 16 މިލިޔަން މީހުންގެ އާބާދީއެއް އޮންނަ ކެމްބޯޑިޔާގެ ވެރިކަމާ ހަވާލުވެ ވަޑައިގަތީ 1985 ވަނަ އަހަރުއެވެ.