ޔަހޫދީން އިސްރާޢީލުގެ ސިފައިން އަޅުވެތިކޮށްފައިވާ ފަލަސްޠީނުގެ ބިންތަކަށް އަރައި ހިންގި ލާއިންސާނީ ޖަރީމާތަކެއްގައި ފަލަސްޠީނުގެ ޒުވާނަކު ޝަހީދުކޮށްލުމާއެކު، މި އަހަރުގެ މިހާތަނަށް ޔަހޫދީ ޖައްބާރު ސިފައިންގެ ޝިކާރައަކަށްވެ ޝަހީދުވި ފަލަސްޠީން ރައްޔިތުންގެ ޢަދަދު 202 އަށް އަރައިފިއެވެ. ޔަހޫދީ ޓެރެރިސްޓު ސިފައިން އެންމެ ފަހުން އުދުވާންތައް ހިންގާފައި ވަނީ ހުޅަނގު އައްސޭރީގެ ނާބުލުސްގައެވެ.
ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ ޔަހޫދީ ސިފައިން އުދުވާން ހިންގާފައި ވަނީ ނާބުލުސްގެ އަލް-ޢައިން ރެފިއުޖީ ކޭމްޕުގައި ކަމަށެވެ. އަދި، ޝަހީދުކޮށްލާފައިވާ ޒުވާނާއަކީ މުޙައްމަދު ޢަބްދުލްހަކީމް ނަދާ ކަމަށާއި، އޭނާގެ މެޔަށް ބަޑިޖަހާފައިވާ ކަމުގައެވެ. އޭނާގެ ކުށަކީ އުދުވާން ހިންގަމުންދިޔަ ޔަހޫދީ ޓެރެރިސްޓު ސިފައިންނާ ދިމާލަށް ގަލާއި ކުލަ އަޅާފައިވާ ފުޅި ފަދަ ތަކެތި އުކުމެވެ.
ޔަހޫދީ އިސްރާޢީލުގެ އަސްކަރިއްޔާއިން ބުނީ އެ މީހުން އަލް-ޢައިން ރެފިއުޖީ ކޭމްޕަށް ވަދެފައި ވަނީ ޓެރެރިސްޓަކު ހޯދުމަށް ކަމުގައެވެ. ޔަހޫދީން ޓެރެރިސްޓުންގެ ގޮތުގައި ސިފަކުރާ ފަލަސްޠީނުގެ ރައްޔިތުންނަކީ ޔަހޫދީންގެ އަޅުވެތިކަމާ ދެކޮޅަށް، އަދި ފަލަސްޠީނުގެ މިނިވަންކަމަށް ޖިހާދު ކުރަމުންދާ މުޖާހިދުންނެވެ. އަލް-ޢައިން ރެފިއުޖީ ކޭމްޕުގެ އަލް-މުހައިމިން އަވަށަށް ވަދެ، ޔަހޫދީ ޖައްބާރު ސިފައިން ވަނީ ފަލަސްޠީނުގެ ރައްޔިތަކު ހައްޔަރުކޮށްފައެވެ.
ފަލަސްޠީނުގެ މިނިވަންކަމަށް ޖިހާދު ކުރަމުންދާ މުޖާހިދުންގެ ޖަމާޢަތެއް ކަމުގައިވާ އަލް-އަޤްޞާ މާޓިޔަރސް ބްރިގޭޑުން ބުނީ ނާބުލުސްއަށް އެރި ޔަހޫދީ ސިފައިންނާ މުޖާހިދުން ކުރިމަތިލާފައިވާ ކަމުގައެވެ. އަދި، ޔަހޫދީ ސިފައިންގެ ބަޔެއް މީހުން ޒަޚަމުކޮށްލާފައިވާނެ ކަމުގައެވެ.
ޔަހޫދީންގެ އުދުވާނުގައި ޝަހީދުވެފައި ވަނީ ފަލަސްޠީނުގެ ރައީސް މަޙްމޫދު އައްބާސްގެ ފަތަޙަ ޖަމާޢަތަށް ނިސްބަތްވާ މުޖާހިދެއް ކަމުގައި ރިޕޯޓުތައް ބުނި ނަމަވެސް، އެ ޖަމާޢަތުން އެ ކަން ކަށަވަރު ކޮށްދީފައެއް ނުވެއެވެ. ނަމަވެސް، ޣައްޒާގައި ވެރިކަން ކުރާ ހަމާސް ޖަމާޢަތުން ވަނީ ފަލަސްޠީނުގެ ޒުވާނަކު ޝަހީދުކޮށްލަން ހިންގި އުދުވާންތައް ކުށްވެރި ކޮށްފައެވެ. އަދި ޔަހޫދީ ޓެރެރިސްޓު ސިފައިންނާ ކުރިމަތިލުމަށް މުޖާހިދުންނަށް ހިތްވަރުދީފައެވެ.
ޖުލައި 25 ވަނަ ދުވަހު ވެސް ޔަހޫދީ ޓެރެރިސްޓު ސިފައިން ވަނީ ނާބުލުސްއަށް އަރައި ފަލަސްޠީނުގެ ތިން މީހުން ޝަހީދުކޮށްލާފައެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން އެ ކަން ކަށަވަރުކޮށްދޭއިރު، ހަމާސް ޖަމާޢަތުން ވަނީ ޝަހީދުކޮށްލާފައި ވަނީ އެ ޖަމާޢަތުގެ ތިން މުޖާހިދުން ކަމަށް ބުނެފައެވެ.
ޔަހޫދީ އިސްރާޢީލުގެ ޖައްބާރު ސިފައިން މި އަހަރުގެ މިހާތަނަށް ހިންގާފައިވާ ލާއިންސާނީ ޖަރީމާތަކުގައި ޝަހީދުކޮށްލާފައިވާ ފަލަސްޠީން މީހުންގެ ޢަދަދު މިހާރު ވަނީ 202 އަށް އަރާފައެވެ. އޭގެ ތެރޭގައި ގިނައީ ކުށެއް ނެތް ޢާންމުންނާއި ކުޑަކުދިންނެވެ. ޖުލައި މަހުގެ ކުރީކޮޅު ޔަހޫދީ ސިފައިން ޖިނީން ރެފިއުޖީ ކޭމްޕުގައި ހިންގި އުދުވާންތަކެއްގައި ވެސް ފަލަސްޠީނުގެ 12 މީހުން ޝަހީދުކޮށްލިއެވެ. އަދި، އެ ކޭމްޕު ސުންނާފަތިކޮށްލިއެވެ.
ޔަހުދީ އިސްރާޢީލުގެ އިސްތިޢުމާރީ ސިފައިން ފަލަސްޠީނުގެ ބިންތަކަށް އަރައި ހުޅަނގު އައްސޭރި އަޅުވެތިކޮށްފައި ވަނީ 1967 ވަނަ އަހަރުއެވެ. އޭގެ ފަހުން ފަލަސްޠީނުގެ ރައްޔިތުން ދިރިއުޅެމުން ދަނީ ޔަހޫދީންގެ އަޅުވެތިކަމުގެ ދަށުގައެވެ. އަދި، ފަލަސްޠީނުގެ ބިންތަކުގައި ވަޒަންވެރިކޮށްފައިވާ ޔަހޫދީންގެ ޢަދަދު މިހާރު 490,000 އަށް އަރައެވެ.