ހުޅަނގު އެފްރިކާގެ ޤައުމެއް ކަމުގައިވާ ސެނެގޯލްގައި ހިނގި ނުރައްކާތެރި ބަސް އެކްސިޑެންޓެއްގައި 24 މީހުން މަރުވެއްޖެއެވެ. މި ހާދިސާ ހިނގާފައި ވަނީ ސެނެގޯލްގެ އުތުރުގައިވާ ލޫގްޔާ ސަރަޙައްދުގައި އޮންނަ ދިލޮޣުލޫ ސިލް ކިޔާ އަވަށެއްގައެވެ. މި ހާދިސާގައި މަރުވި މީހުންގެ ތެރޭގައި ހަތަރު ކުޑަކުދިން ވެސް ހިމެނެއެވެ.
ސެނެގޯލްގެ ދާޚިލީ ވަޒީރު އޮންތުއޮން ފިލީޕް ޢަބްދުއްލައި ދިއޮމޭ ވިދާޅުވީ މި ހާދިސާގައި އިތުރު 54 މީހުން ޒަޚަމުވެފައިވާ ކަމުގައެވެ. އަދި، މި ހާދިސާ ހިނގި ވަގުތު ބަހުގައި ޤަވާޢިދަށްވުރެ އިތުރަށް ފަސިންޖަރުން ތިބި ކަމުގައެވެ. އެކްސިޑެންޓުވި ބަހުގައި އުފުލުމުގެ ހުއްދަ އޮންނީ 60 މީހުންނެވެ. ނަމަވެސް، އެކްސިޑެންޓުވި ވަގުތު ބަހުގައި 76 ފަސިންޖަރުން ތިބި ކަމުގައި ދިއޮމޭ ވިދާޅުވިއެވެ.
މި ހާދިސާ ހިނގާފައި ވަނީ ބަހުގެ ކޮންޓްރޯލް ގެއްލި، ފުރޮޅައިލުމާ ގުޅިގެން ކަމަށް މި ހާދިސާ ހިނގަން މެދުވެރި ސަބަބު ދެނެގަތުމަށް ތަހުޤީޤު ކުރަމުންދާ އޮފިޝަލުން ވިދާޅުވިއެވެ. މި ހާދިސާގައި ޒަޚަމުވި ގިނަ މީހުންނަށް ލޫގްޔާ އަދި ސޯން ލުވީގެ ހޮސްޕިޓަލުތަކުގައި ފަރުވާދެމުންދާ ކަމުގައި ވެސް އޮފިޝަލުން ވިދާޅުވިއެވެ.
ސެނެގޯލަކީ މަގުމަތީގެ އެކްސިޑެންޓުތައް ގިނަ ޤައުމެއް ކަން ފާހަގަކުރެވެއެވެ. ހުސްވި ހަފުތާގައި ހިނގި މި ފަދަ ނުރައްކާތެރި ބަސް އެކްސިޑެންޓެއްގައި 40 މީހުން މަރުވިއެވެ. އަދި، ޖަނަވަރީ މަހު ލޫގްޔާގައި ހިނގި މި ފަދަ ހާދިސާގައެއްގައި 19 މީހުން މަރުވެ، އިތުރު 24 މީހުން ޒަޚަމުވިއެވެ. މި ފަދަ ހާދިސާތައް އިތުރުވުމާ ގުޅިގެން ސެނެގޯލްގެ ސަރުކާރަށް ފާޑުކިޔުންތައް ވަނީ އަމާޒުވެފައެވެ.