ބާރުގަދަ ތޫފާނެއް ކަމުގައިވާ ތުކްސުރީ ފިލިޕީންސްގެ ސަރަޙައްދުތަކައް އެރުމާ ގުޅިގެން ހިނގި އެކި ހާދިސާތަކުގައި މަރުވި މީހުންގެ ޢަދަދު ފަހަކަށް އަރައިފިއެވެ. މި ތޫފާނާ އެކު ފިލިޕީންސްގެ އުތުރުގެ ސަރަޙައްދުތަކަށް ބޯކޮށް ވާރޭވެހި ބައެއް ރަށްތަކުގައި ފެންބޮޑުވެ ބޮޑެތި ގެއްލުންތަކެއް ލިބިފައިވާއިރު، ތޫފާން މިހާރު އޮތީ ތައިވާނާ ހިސާބުގައެވެ. މި ތޫފާނާ އެކު ފިލިޕީންސްގައި ޢާންމުން ދިރިއުޅޭ ގިނަ ޢަދަދެއްގެ ޢިމާރާތަށް ގެއްލުން ލިބިފައިވާ ކަމުގައި އޮފިޝަލުން ވިދާޅުވެއެވެ.
ތޫފާނަށް ތައްޔާރުވުމުގެ ގޮތުން ތައިވާނުން ދަނީ ރައްކާތެރި ކަމުގެ ފިޔަވަޅުތައް އަޅަމުންނެވެ. ތޫފާނާ އެކު ވައިގެ ގަދަވެ، ވިއްސާރަކުރަން ފަށާފައިވާއިރު ތައިވާނުގެ ގިނަ ސަރަޙައްދުތަކުގައި ވިޔަފާރިތަކާއި ސްކޫލްތައް ވަނީ ބަންދުކޮށްފައެވެ. އަދި، ބައެއް ސަރަޙައްދުތަކުގައި ވައިގެ ދަތުރުފަތުރުގެ ޚިދުމަތް ވަނީ މެދުކަނޑައިލާފައެވެ. މި ތޫފާނާ އެކު ތައިވާނުގެ ބައެއް ސަރަޙައްދުތަކުގައި ބިންގަނޑު ކެނޑުމާއި ކިސަޑު ފޭބުމުގެ ހާދިސާތަކަށް ހިނގާނެ ކަމުގެ އިންޒާރު އެ ޤައުމުގެ މޫސުމާ ބެހޭ އިދާރާއިން ވަނީ ދީފައެވެ.
އެ އިދާރާއިން ބުނީ މިއީ ފަހުގެ ތާރީޚެއްގައި އެ ޤައުމަށް އަރާ ދެވަނައަށް އެންމެ ބާރުގަދަ ތޫފާން ކަމުގައެވެ. ތޫފާނާ އެކު އެ ޤައުމުގެ ދެކުނުގެ އައްސޭރިފަށުގައި ގަޑިއަކު 191 ކިލޯމީޓަރަށް ވައި ބާރުވެފައިވާ ކަމުގައި ވެސް އެ އިދާރާއިން ބުނެއެވެ. ތޫފާނުގެ އަސަރު އެންމެ ބޮޑަށް ކުރާނެ ކަމަށް ބެލެވެނީ އެ ޤައުމުގެ އިރުމަތީގައިވާ ބަނދަރުމަތީ ރަށެއް ކަމުގައިވާ ކައުޝުންގަށް ކަމަށް ބެލެވެއެވެ. އެ ސަރަޙައްދުގައި ބިންގަނޑު ކެނޑުމާއި ކިސަޑު ފޭބުމުގެ ހާދިސާތައް ހިނގާނެ ކަމުގެ އިންޒާރު ވަނީ ކޮށްފައެވެ.
މި ތޫފާނާ ގުޅިގެން އަޅާފައިވާ ރައްކާތެރި ކަމުގެ ފިޔަވަޅުތަކުގެ ތެރޭގައި ވައިގެ ދަތުރުފަތުރު ޚިދުމަތްތައް މެދުކަނޑައިލުން ހިމެނެއެވެ. މި ގޮތުން 100 އަށްވުރެ ގިނަ ފްލައިޓް މިހާރު ވެސް ކެންސަލް ކޮށްފައިވާ ކަމުގައި ތައިވާނުގެ އޮފިޝަލުން ވިދާޅުވެއެވެ. މީގެ އިތުރުން ފެރީ ދަތުރުތަކާއި ރޭލު ދަތުރުފަތުރު ވެސް ވަނީ މެދުކަނޑައިލާފައެވެ.
ތޫފާނުގެ ނުރައްކާ ވާނެ ކަމަށް ބެލެވޭ ސަރަޙައްދުތަކުގައި ދިރިއުޅޭ 5,700 އަށްވުރެ ގިނަ މީހުން މިހާރު ވެސް ރައްކާތެރި ހިސާބުތަކަށް ބަދަލުކޮށްފައިވާއިރު، އިތުރު މީހުން ރައްކާތެރި ހިސާބުތަކަށް ބަދަލުކުރަން ތައިވާނުގެ އޮފިޝަލުން މިހާރު ވެސް ދަނީ މަސައްކަތް ކުރަމުންނެވެ. އޭގެ ތެރޭގައި ތައިވާނުގެ ދެކުނާއި އިރުމަތީގައިވާ ފަރުބަދަމަތީ ސަރަޙައްދުތަކުގައި ދިރިއުޅޭ ރައްޔިތުން ހިމެނެއެވެ.
މި ތޫފާނާ އެކު ޖެހެމުންދާ ވަޔާ އެކު ކަރަންޓުގެ ޚިދުމަތް ދިނުމަށް ބޭނުންކުރާ ވަސީލަތްތަކަށް ގެއްލުންވެ، ތައިވާނުގެ އެކި ކަންކޮޅުތަކުގައި 49,000 އަށްވުރެ ގޭބީސީން ކަރަންޓުގެ ޚިދުމަތް ވަނީ ކެނޑިފައެވެ. އެ ގޭބީސީތަކަށް ކަރަންޓުގެ ޚިދުމަތް އަލުން ގުޅައިދިނުމަށް އޮފިޝަލުން ދަނީ މަސައްކަތް ކުރަމުންނެވެ. ތޫފާން ތުކްސުރީގެ އަސަރު ޗައިނާގެ އައްސޭރިފަށުގެ ސަރަޙައްދުތަކަށް ކުރާނެ ކަމަށް ވެސް މޫސުން ދިރާސާކުރާ ފަރާތްތަކުން ބުނެއެވެ.