ތައިލެންޑުގެ ރަށެއް ކަމުގައިވާ ސުންގައި ކޯލޯގެ މާރުކޭޓެއްގައި ހުންނަ ހަވާ އަދި ބަޑިބޭސް ރައްކާކުރާ ގުދަނެއްގައި ބާރުގަދަ އެއްޗެއް ގޮވައި ނުވަ މީހުން މަރުވެއްޖެއެވެ. ސުންގައި ކޯލޯއަކީ ތައިލެންޑާއި މެލޭޝިޔާ ގުޅޭ ސަރަޙައްދީ ރޮނގު ކައިރީގައި އޮންނަ ރަށެކެވެ. މި ހާދިސާގައި މާރުކޭޓުގެ ބޮޑު ބައެއް ވަނީ ސުންނާފަތިވެފައެވެ.
ހަވާ އަދި ބަޑިބޭސް ރައްކާކުރާ ގުދަނުގައި ބާރުގަދަ އެއްޗެއް ގޮވި ހާދިސާގައި 115 އަށްވުރެ ގިނަ މީހުން ޒަޚަމުވިއެވެ. މި ހާދިސާގައި ޒަޚަމުވި ގިނަ ޢަދަދެއްގެ ބަޔަކަށް އެ ސަރަޙައްދުގެ ހޮސްޕިޓަލުތަކުގައި އެޑްމިޓުކޮށްގެން ފަރުވާދެމުންދާ ކަމުގައި ސުންގައި ކޯލޯގެ އޮފިޝަލުން ވިދާޅުވިއެވެ.
މި ހާދިސާ ހިނގަން މެދުވެރިވި ސަބަބު ދެނެގަތުމަށް ތަހުޤީޤު ފަށާފައިވާއިރު، އެ ކަމުގައި އިސްކޮށް އުޅޭ ފަރާތްތަކުން ބުނީ މި ހާދިސާ ހިނގަން މެދުވެރިވީ އެ ތަނުގައި ޢިމާރާތް ކުރުމުގެ މަސައްކަތްތަކެއް ކުރަމުން ދިޔުމުގެ ސަބަބުން ކަމަށް ބެލެވޭ ކަމުގައެވެ. އަދި، ބާރުގަދަ ގޮވުމެއް ގޮވާފައި ވަނީ ވެލްޑިންގ މަސައްކަތްތަކެއް ކުރަމުންދިޔަ ވަގުތުގައި ކަމަށް އޮފިޝަލުން ވިދާޅެއެވެ.
ގުދަނުގައި ބާރުގަދަ އެއްޗެއް ގޮވުމާ އެކު އެ ތަނުގައި ރޯވި އަލިފާންގަނޑު، އެ ތަން ހުންނަ މާރުކޭޓުގެ އެހެން ހިސާބުތަކަށް ފެތުރުނެވެ. ނަމަވެސް، އަލިފާންގަނޑު މިހާރު ވަނީ ކޮންޓްރޯލް ކޮށްފައެވެ. މި ހާދިސާގައި އެ ސަރަޙައްދުގައިވާ ގިނަ ޢަދަދެއްގެ ފިހާރައާއި، ޢާންމުން ދިރިއުޅޭ ގެދޮރުގެ އިތުރުން އެއްގަމު އުޅަނދުފަހަރަށް ބޮޑެތި ގެއްލުން ލިބުނު ކަމުގައި ތައިލެންޑުގެ އޮފިޝަލުން ވިދާޅުވެއެވެ.
ތައިލެންޑުގެ ޢިމާރާތް ކުރުމުގެ ސިނާޢަތަކީ ސަލާމަތާއި ރައްކާތެރިކަމުގެ ފިޔަވަޅުތަކަށް އެންމެ ފުރިހަމައަށް އަމަލުކުރާ ސިނާޢަތެއް ނޫން ކަން ފާހަގަކުރެވޭއިރު، ތައިލެންޑަކީ ޢިމާރާތް ކުރުމުގެ މަސައްކަތް ކުރާ ސައިޓުތަކުގައި ހިނގާ ހިތާމަވެރި ހާދިސާތައް ގިނަ ޤައުމެއް ކަން ފާހަގަކުރެވެއެވެ. ހުސްވި ޖޫން މަހު ތައިލެންޑުގެ ވެރިރަށް ބެންގްކޮކުގައި ޢިމާރާތް ކުރުމުގެ މަސައްކަތް ކުރިއަށްދިޔަ ބުރިޖެއްގެ ބައެއް ވެއްޓި ދެ މީހަކު މަރުވިއެވެ.