ސޫރިޔާގެ ހުޅަނގުއުތުރުގައިވާ ބަނދަރުމަތީ ރަށެއް ކަމުގައިވާ ލާޛިޤިއްޔާގެ އުތުރުގައި އޮންނަ ޖަންގަލިތަކުގައި ރޯވެފައިވާ އަލިފާންގަނޑުތައް ކޮންޓްރޯލެއް ނެތި ފެތުރެމުންދާ ކަމަށާއި، އެލިފާންގަނޑުތައް ނިއްވައިލަން ކުރަމުންދާ މަސައްކަތްތަކަށް ބޮޑެތި ހުރަސްތަކެއް ކުރިމަތިވެފައިވާ ކަމަށް އެ ޤައުމުގެ ސަރުކާރުން ބުނެފިއެވެ. މި ކަމަށް އޮތް އެންމެ ބޮޑު ހުރަހަކީ އެ ޤައުމާ ދެކޮޅަށް ބައިނަލްއަޤުވާމީ މުޖުތަމަޢުން އަޅާފައިވާ ދަތިކުރުމުގެ ފިޔަވަޅުތައް ކަމުގައި އެ ޤައުމުން ބުނެއެވެ.
ސޫރިޔާގެ ދަނޑުވެރިކަމާ ބެހޭ ވަޒީރު މުޙައްމަދު ޙަސަން ޤަޠަނާ ވިދާޅުވީ، ބައިނަލްއަޤުވާމީ މުޖުތަމަޢުން ސޫރިޔާގެ ސަރުކާރާ ދެކޮޅަށް އަޅާފައިވާ ދަތިކުރުމުގެ ހަރުކަށި ފިޔަވަޅުތަކާ ގުޅިގެން ލާޛިޤިއްޔާގެ ޖަންގަލިތަކުގައި ރޯވެފައިވާ އަލިފާންގަނޑުތައް ނިއްވައިލަން ކުރާ މަސައްކަތްތަކަށް ހުރަސް އެޅިފައިވާ ކަމުގައެވެ. އަދި، އަލިފާންގަނޑުތައް ކޮންޓްރޯލް ކުރަން ތެލާއި، އުޅަނދުފަހަރާއި، މެޝިނަރީއާއި ފެން ތާންގީތައް ބޭނުންވާ ކަމަށާއި، އެ ތަކެތި ހޯދަން ހުރަސް އެޅިފައިވާ ކަމުގައެވެ.
މުޙައްމަދު ވިދާޅުވީ، އަލިފާން ނިއްވަން މަސައްކަތްކުރާ ޓީމުތަކުގެ މެންބަރުންނަށް ޚާއްޞަ އަންނައުނު ބޭނުންވާ ކަމުގައެވެ. އަދި، އެ ކަމަށް ޚާއްޞަކޮށްފައިވާ އުޅަނދުފަހަރު ބޭނުންވާ ކަމުގައެވެ. ނަމަވެސް، އެމެރިކާއިން އިސްވެ ސޫރިޔާގެ ސަރުކާރާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާ ހުރެ އެ ކަމަށް ހުރަސް އެޅިފައިވާ ކަމުގައެވެ.
ލާޛިޤިއްޔާގެ އިތުރުން ސޫރިޔާގެ ޙަމާއާއި އިދްލިބުގެ ޖަންގަލިތަކުގައި ވެސް ރޯވެ، ކޮންޓްރޯލެއް ނެތި އަނދަމުންދާ ކަމުގައި އެ ޤައުމުން ބުނެއެވެ. ޙަމާއާއި އިދްލިބުގެ ޖަންގަލިތަކުގައި ރޯވެފައިވާ ގިނަ އަލިފާންގަނޑުތައް މިހާރު ކޮންޓްރޯލްކޮށް ނިއްވައިލާފައިވީ ނަމަވެސް، ލާޛިޤިއްޔާގެ ޖަންގަލިތަކުގައި ރޯވެފައިވާ އަލިފާންގަނޑުތައް ނިއްވައިލަން ކުރަމުންދާ މަސައްކަތްތަކަށް މާ ބޮޑު ކުރިއެރުމެއް ލިބިފައި ނުވާ ކަމުގައި މުޙައްމަދު ވިދާޅުވިއެވެ.
އަލިފާންގަނޑުތައް ރޯވެފައިވާ ގިނަ ސަރަޙައްދުތަކަކީ ފަރުބަދަމަތީ ހިސާބުތަކެކެވެ. އަދި، މޫސުން ގޯސްވެ ވައި ބާރުވުމާ ގުޅިގެން އަލިފާންގަނޑުތައް އިތުރަށް ފެތުރި، ނިއްވައިލަން އުނދަގޫވެފައިވާ ކަމުގައި ވެސް މުޙައްމަދު ވިދާޅުވިއެވެ. ނަމަވެސް، މި އަލިފާންގަނޑުތަކުގެ ސަބަބުން އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނެތެވެ. ލާޛިޤިއްޔާގައި ރޯވެފައިވާ އަލިފާންގަނޑުތަކުގެ ސަބަބުން މިހާރު ވެސް 5 އަކަ ކިލޯމީޓަރުގެ ސަރަޙައްދެއް އަނދާފައިވާ ކަމުގައި އޮފިޝަލުން ވިދާޅުވެއެވެ.
އެމެރިކާއިން އިސްވެ އޮވެ ބައިނަލްއަޤުވާމީ މުޖުތަމަޢުން ސޫރިޔާގެ ސަރުކާރާ ދެކޮޅަށް ދަތިކުރުމުގެ ހަރުކަށި ފިޔަވަޅުތަކެއް އަޅާފައި ވަނީ ސޫރިޔާގެ ދާޚިލީ ހަނގުރާމައާ ގުޅިގެންނެވެ. އެ ޤައުމުގައި ދާޚިލީ ހަނގުރާމައެއް ފެށުނީ 2011 ވަނަ އަހަރު ސަރުކާރާ ދެކޮޅަށް ތެދުވެ، ޢާންމުން ކުރަން ފެށި ސިލްސިލާ މުޒާހަރާތައް ރޫޅައިލަން ސަރުކާރުން ބާރުގެ ބޭނުންކުރަން ފެށުމާ ގުޅިގެންނެވެ. މި ހަނގުރާމައިގައި އެތަކެއް ސަތޭކަ ހާސް މީހުން މަރުވެ، އެތަކެއް މިލިޔަން މީހުން ވަނީ ހާލުގައި ޖެހިފައެވެ.
ސޫރިޔާގެ ދާޚިލީ ހަނގުރާމައާ ގުޅިގެން ބައިނަލްއަޤުވާމީ މުޖުތަމަޢުގެ އިތުރުން ޢަރަބި ލީގުން ވެސް ވަނީ ސޫރިޔާއާ ގުޅުން ކަނޑައިލާ، ރައީސް ބައްޝާރް ހާފިޛް އަލް-އަސަދުގެ ސަރުކާރު އެކަހެރިކޮށްލާފައެވެ. ނަމަވެސް، ޢަރަބި ލީގުގެ ގިނަ ޤައުމުތަކުން ދާދި ފަހުން ވަނީ އެ ޤައުމާ އެކު އަލުން ގުޅުންތައް ގާއިމުކުރަން ފަށާފައެވެ. އަދި، ޢަރަބި ލީގާ އަލުން ގުޅުމުގެ ފުރުޞަތު ސޫރިޔާއަށް ވަނީ ދީފައެވެ.