ޔޫކްރެއިނަށް ކައުންޓަރއޮފެންސިވް ކާމިޔާބު ކުރެވިއްޖެ ނަމަ ނިއުކްލިޔަރ ހަތިޔާރު ބޭނުންކުރަން ޖެހިދާނެ: މެދްވޭދެފް
ރަޝިޔާގެ އިސްތިޢުމާރީ ފައުޖުތަކާ ދެކޮޅަށް ޔޫކްރެއިނުގެ ސިފައިން ފަށާފައިވާ ކައުންޓަރއޮފެންސިވް ނުވަތަ ރައްދު ހަމަލާގެ އަސްކަރީ ކެމްޕޭން ކާމިޔާބު ކުރެވިއްޖެ ނަމަ، ޔޫކްރެއިނާ ދެކޮޅަށް ނިއުކްލިޔަރ ހަތިޔާރު ބޭނުންކުރަން ޖެހިދާނެ ކަމަށް ވިދާޅުވެ، ރަޝިޔާގެ ކުރީގެ ރައީސް ދްމިތްރީ މެދްވޭދެފް އިންޒާރު ދެއްވައިފިއެވެ. އޭނާއަކީ މިހާރު ރަޝިޔާގެ ސަލާމަތީ މަޖިލީހުގެ ޗެއަރމަންގެ ނައިބެވެ.
ޔޫކްރެއިނާ ދެކޮޅަށް ރަޝިޔާއިން ނިއުކްލިޔަރ ހަތިޔާރު ބޭނުންކުރަމް ޖެހިދާނެ ކަމަށް ވިދާޅުވެ މެދްވޭދެފް މީގެ ކުރިން ވެސް އެތަކެއް ފަހަރެއްގެ މަތިން ޔޫކްރެއިނަށް އިންޒާރު ދެއްވާފައިވެއެވެ. އޭނާ އެންމެ ފަހުން ވިދާޅުވެފައި ވަނީ، ޔޫކްރެއިންގެ ކައުންޓަރއޮފެންސިވްގައި އެ ޤައުމަށް ކާމިޔާބީ ލިބިއްޖެ ނަމަ، ޔޫކްރެއިނާ ދެކޮޅަށް ނިއުކްލިޔަރ ހަތިޔާރު ބޭނުންކުރަން ރަޝިޔާއަށް މަޖުބޫރުވާނެ ކަމުގައެވެ.
ޔޫކްރެއިންގެ ކައުންޓަރއޮފެންސިވަކީ އެ ޤައުމަށް އަރާފައިވާ ރަޝިޔާގެ އިސްތިޢުމާރީ ސިފައިންގެ އަތްދަށުން އެ ޤައުމު މިނިވަން ކުރަން ހިންގާ އަސްކަރީ ކެމްޕޭނެކެވެ. ރަޝިޔާ ސިފައިން ޔޫކްރެއިނަށް އަރައި އެ ޤައުމުގެ ބައެއް ސަރަޙައްދުތަކަށް އަތްގަދަކޮށްފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ރަޝިޔާއިން އަތްގަދަ ކޮށްފައިވާ ބައެއް ސަރަޙައްދުތަކުގެ ތެރޭގައި ޔޫކްރެއިންގެ އިރުމަތީގައިވާ ދޮންބާސްގެ ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން އެ ޤައުމުގެ ދެކުނުގައިވާ ޒަޕޮޜީރިޔާ ވެސް ހިމެނެއެވެ.
"މިސާލަކަށް ދަންނަވަނީ ނަމަ، ނޭޓޯގެ އެހީތެރިކަމާ އެކު ޔޫކްރެއިނުން ރަޝިޔާގެ ބިންތަކެއް ފޭރިގަނެފި ނަމަ، ޔޫކްރެއިނާ ދެކޮޅަށް ނިއުކްލިޔަރ ހަތިޔާރު ބޭނުން ކުރަން ރަޝިޔާއަށް މަޖުބޫރުވެގެން ދާނެ. ރަޝިޔާއަށް އެ ނޫން އިތުރު ގޮތެއް ނޯންނާނެ. ރަޝިޔާއިން މަސައްކަތް ކުރަމުން މި ދަނީ ނިއުކްލިޔަރ ހަނގުރާމައެއް ފެށުނަ ނުދޭން. ހުރިހާ އެންމެން ވެސް ރަޝިޔާގެ ފައުޖުތަކަށް ތާޢީދުކުރަން ޖެހެނީ އެ ސަބަބަށް ޓަކައި،" މެދްވޭދެފް ވިދާޅުވިއެވެ.
އޭނާ އިޝާރާތް ކުރައްވާފައި މި ވަނީ ރަޝިޔާގެ "ނިއުކްލިޔަރ ޑޮކްޓްރައިން" ނުވަތަ ނިއުކްލިޔަރ ހަތިޔާރު ބޭނުން ކުރުމާ ގުޅޭ ސިޔާސަތަށެވެ. އޭގައިވާ ގޮތުން ރަޝިޔާގެ ބިމަކަށް ބޭރު ޤައުމަކުން އަތްގަދަކޮށްފި ނަމަ، އެ ޤައުމަކާ ދެކޮޅަށް ނިއުކްލިޔަރ ހަތިޔާރު ބޭނުން ކުރުމަކީ ރަޝިޔާއަށް ލިބިގެންވާ ހައްޤެކެވެ. ރަޝިޔާގެ ބިންތަކެއް ކަމަށް މެދްވޭދެފް ސިފަ ކުރައްވާފައި މި ވަނީ، ރަޝިޔާއިން އަތްގަދަކޮށްފައިވާ ޔޫކްރެއިންގެ ބިންތަކެވެ. އެއީ، ރަޝިޔާގެ ބިންތަކެއް ކަމުގައި އެ ޤައުމުން ވަނީ ކަނޑައަޅާފައެވެ.
ރަޝިޔާ-ޔޫކްރެއިން ހަނގުރާމައިގައި ފާއިތުވި ހަފުތާތަކުގެ ތެރޭގައި ރަޝިޔާގެ ފައުޖުތަކަށް ބޮޑެތި ކުރިއެރުންތަކެއް ހޯދިފައި ނުވާ ކަމަށް ރައީސް ވްލަޑިމިޔަރ ޕުޓިން ދާދިފަހުން ވަނީ ވިދާޅުވެފައެވެ. ނަމަވެސް، ޔޫކްރެއިނުން ބުނަނީ ކައުންޓަރއޮފެންސިވްގައި އެ ޤައުމުގެ ފައުޖުތަކުން ކުރިއެރުންތަކެއް ހޯދަމުންދާ ކަމުގައެވެ. އަދި، ރަޝިޔާގެ އިސްތިޢުމާރީ ސިފައިން އަތްގަދަ ކޮށްފައިވާ ބައެއް ރަށްތަކާއި އަވަށްތައް މިހާރު މިނިވަން ކުރެވިފައިވާ ކަމުގައެވެ.
ކައުންޓަރއޮފެންސިވްގެ ދަށުން އެންމެ ވަރުގަދަ ހަނގުރާމައެއް ހިނގަމުން ދަނީ އިރުމަތީގައިވާ ބަޚްމުތް ކައިރީގެ ސަރަޙައްދުތަކުގެ އިތުރުން ދެކުނުގައިވާ ޒަޕޮރީޜިޔާ ވަށައިގެން ސަރަޙައްދުތަކުގައެވެ. ޔޫކްރެއިނުން ކައުންޓަރއޮފެންސިވް ފަށާފައި ވަނީ އެމެރިކާއާއި ނޭޓޯގެ އަސްކަރީ އެހީތެރިކަމާ އެކުގައެވެ. ނޭޓޯގެ ޤައުމުތަކުން ދަނީ ޔޫކްރެއިނަށް ބާރުގަދަ ފަހުގެ ޒަމާނީ ހަތިޔާރު ފޯރުކޮށްދެމުންނެވެ. މީގެ ތެރޭގައި އަސްކަރީ މަތިންދާބޯޓާއި، ޓޭންކުފަހަރާއި ރޮކެޓާއި މިސައިލް ފަދަ ހަތިޔާރު ހިމެނެއެވެ.