އިރުމަތީ އޭޝިޔާގެ ސަރަޙައްދުތަކަށް އަރާފައިވާ ބާރުގަދަ ތޫފާން ތުކްސުރީގެ ސަބަބުން ޗައިނާގެ ވެރިރަށް ބެއިޖިންގުން ދެ މީހުން މަރުވެއްޖެއެވެ. މި ތޫފާނުގެ އަސަރު އެންމެ ބޮޑަށް ކުރަމުންދާ ބެއިޖިންގެ ހުޅަނގުގައިވާ މެންޓުގޫ ސަރަޙައްދަށް ބޯކޮށް ވާރޭވެހި، ގިނަ ހިސާބުތަކުގައި ވަނީ ފެންބޮޑުވެފައެވެ. މަގުތަކުގައި ފެންބޮޑުވެ އެއްގަމު އުޅަނދުފަހަރަށް ބޮޑެތި ގެއްލުންތައް ލިބިފައިވާއިރު، ޢާންމުންގެ ގެދޮރާއި ވިޔަފާރި ހިންގާ ޢިމާރާތްތަކާއި ފިހާރަތަކަށް ވެސް ވަނީ ފެން ވަދެފައެވެ.
22 މިލިޔަން މީހުންގެ އާބާދީއެއް ދިރިއުޅޭ ބެއިޖިންގުން މަރުވެފައިވާ ދެ މީހެއްގެ ހަށިގަނޑު ފެނިފައި ވަނީ ކޯރެއްގެ ތެރެއިން ކަމުގައި އޮފިޝަލުން ވިދާޅުވެއެވެ. މި ތޫފާނާ އެކު ބެއިޖިންގަށް ބޯކޮށް ވާރޭވެހުމުގެ އިތުރުން ވައި ބާރުވުމާ ގުޅިގެން ވެސް ބޮޑެތި ގެއްލުންތަކެއް ވަނީ ލިބިފައެވެ. އަދި، ފެންބޮޑުވުމާ ގުޅިގެން އެތަކެއް ހާސް ބަޔަކު ވަނީ އެ މީހުންގެ ގެދޮރުގައި ތާށިވެފައެވެ.
ފެންބޮޑުވުމާ ގުޅިގެން ބެއިޖިންގގައި ދިރިއުޅޭ 31,000 އަށްވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފައިވާއިރު، ޢިމާރާތްކުރުމުގެ މަސައްކަތް ކުރިއަށްދިޔަ 4,000 އަށްވުރެ ގިނަ ސައިޓުގެ މަސައްކަތްތަކަށް ވަނީ ބުރޫއަރާފައެވެ. އަދި، 2,000 އަށްވުރެ ގިނަ ޢިމާރާތަށް ލިބިފައިވާ ގެއްލުންތައް ދެނެގަތުމަށް އޮފިޝަލުން ދަނީ މަސައްކަތް ކުރަމުންނެވެ.
ފެންބޮޑުވެ ޔޮންގޑިންގ ކޯރު ފުރިގެން ބަންޑުންވެ ބައެއް ގެދޮރު ހަލާކުވެފައިވާ ކަމުގައި އޮފިޝަލުން ވިދާޅުވާއިރު، އިތުރު ހަތަރު ކޯރެއް ފުރިގެން ބަންޑުންވުމުގެ ފުރުޞަތު އޮތް ކަމުގެ އިންޒާރު އެ ޤައުމުގެ މޫސުމާ ބެހޭ އިދާރާއިން ވަނީ ދީފައެވެ. ތޫފާނުގެ އަސަރުކޮށްފައިވާ ސަރަޙައްދުތަކުގައި ދިރިއުޅޭ މީހުން ސަލާމަތް ކުރަން މަސައްކަތް ކުރަމުންދާއިރު، ބައޮޑިންގ ސިޓީގައި ދިރިއުޅޭ 55,000 އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.
މި ތޫފާނާ އެކު މެންޓުގޫއަށް ދެ ދުވަހުގެ ތެރޭގައި އެވުރެޖުކޮށް 176.9 މިލިމީޓަރުގެ ވާރޭ ވެހިފައިވާ ކަމަށާއި، ބައެއް ހިސާބުތަކަށް 580.9 މިލިމީޓަރުގެ ވާރޭ ވެހިފައިވާ ކަމުގައި ޗައިނާގެ މޫސުމާ ބެހޭ އިދާރާއިން ބުނެއެވެ. ތުކްސުރީއަކީ 2016 ވަނަ އަހަރަށް ފަހު އެ ޤައުމުތަކަށް އަރާފައިވާ ދެވަނައަށް އެންމެ ބާރުގަދަ ތޫފާނެވެ. މި ތޫފާނުގެ އަސަރު ޗައިނާގެ ދެކުނުގައިވާ ފުޖިއާން ޕުރޮވިންސަށް ވެސް ދަނީ ކުރަމުންނެވެ. އެ ޕުރޮވިންސުން ވެސް އެތަކެއް ހާސް ބަޔަކު ރައްކާތެރި ހިސާބުތަކަށް ބަދަލުކޮށްފައިވާ ކަމުގައި އޮފިޝަލުން ވިދާޅުވެއެވެ.
ތުކްސުރީއާ ގުޅިގެން ބެއިޖިންގގެ ދަތުރުފަތުރުގެ ނިޒާމަށް ވެސް ވަނީ ބުރޫއަރާފައެވެ. މި ގޮތުން، ބެއިޖިންގގައި އޮންނަ ބައިނަލްއަޤުވާމީ ދެ ވައިގެ ބަނދަރުގެ ދަތުރުފަތުރަށް ހުރަސްއެޅި، 200 އަށްވުރެ ގިނަ އުދުހުން ކެންސަލްކުރަން ޖެހުނެވެ. އަދި، 600 އަށްވުރެ ގިނަ ފްލައިޓް ލަސްވެފައިވާ ކަމުގައި އޮފިޝަލުން ވިދާޅުވެއެވެ. ގިނަ ސަރަޙައްދުތަކުގައި ރޭލު ދަތުރުފަތުރުގެ ޚިދުމަތް ވެސް ވަނީ މެދުކަނޑައިލާފައެވެ. މި ކަމާ ގުޅިގެން ރޭލު ސްޓޭޝަންތަކުގައި ތާށިވެފައިވާ މީހުންނަށް ކާބޯތަކެއްޗާއި އެހީގެ ސާމާނު ފޯރުކޮށްދޭން އޮފިޝަލުން ދަނީ މަސައްކަތް ކުރަމުންނެވެ.
ޗައިނާގެ އުތުރުގައި ހެބޭއީ ޕުރޮވިންސުގައި ގެއްލުން ލިބިފައިވާ ބުރިޖެއްގެ މަތިން ދަތުރުކުރަނިކޮށް ބުރިޖުން ބޭރަށް ވެއްޓުނު ދެ ލޮރީއެއްގެ ތެރެއިން އެއް އުޅަނދުގެ ޑްރައިވަރު ހޯދަން މަސައްކަތް ކުރަމުންދާ ކަމުގައި އެ ޕުރޮވިންސުގެ އޮފިޝަލުން ވިދާޅުވެއެވެ. ޝީޖިޔާޖުއަންގައި ރޭލު ދަތުރުފަތުރުގައި ބޭނުންކުރާ ބުރިޖެއް ވެސް ހަލާކުވެފައިވާ ކަމަށާއި، އެ ހާދިސާގައި ބޮޑެތި ގެއްލުންތަކެއް ލިބިފައިވާ ކަމުގައި އެ ސިޓީގެ އޮފިޝަލުން ވިދާޅުވެއެވެ.
ތޫފާން ތުކްސުރީގެ ކިބައިން ސަލާމަތް ނުވެވިގެން އުޅެނިކޮށް، ބާރުގަދަ އެހެން ތޫފާނެއް ކަމުގައިވާ ކަނޫން ޗައިނާގެ ސަރަޙައްދުތަކާ ދިމާލަށް ދަތުރު ކުރަމުންދާ ކަމުގައި އެ ޤައުމުގެ މޫސުމާ ބެހޭ އިދާރާއިން އިންޒާރު ކުރެއެވެ. އެ ތޫފާން އަރާނެ ކަމަށް ބެލެވެނީ ޗައިނާގެ އައްސޭރިފަށުގެ ސަރަޙައްދުތަކަށެވެ. އެ ތޫފާނާ އެކު އިތުރު ގެއްލުންތަކެއް ލިބޭނެ ކަމަށް ބެލެވޭ ކަމުގައި މޫސުމާ ބެހޭ އިދާރާތަކުން އިންޒާރު ކުރެއެވެ.