ބަދުރުގެ "ރޭޑިއޯ ހަނދާންތައް" ޕީއެސްއެމްއަށް ހަދިޔާކޮށްފި

ދިވެހިރާއްޖޭގެ ބްރޯޑްކާސްޓިންގ ދާއިރާގެ ކުރިއެރުމަށް ގިނަ ޚިދުމަތްތަކެއް ކުރައްވާފައިވާ، ނިޝާން ދިޔަމިގިލީ ޝަރަފުގެ ޢިއްޒަތުގެ ވެރިޔާ ބަދުރުއްނަސީރު، އޭނާގެ ރޭޭޑިއޯގެ ޚިދުމަތުގެ މައްޗަށް އަލިއަޅުއްވާލައްވައި ލިޔުއްވާފައިވާ ފޮތް ޕަބްލިކް ސާރވިސް މީޑިއާ، ޕީއެސްއެމްއަށް ހަދިޔާކޮށްފިއެވެ.

"ދިވެހިރާއްޖޭގެ ރޭޑިއޯގައި އަޅުގަނޑުގެ ބައެއް ހަނދާންތައް" މި ނަމުގައި ބަދުރު ލިޔުއްވާފައިވާ ދިވެހިރާއްޖޭގެ ރޭޑިއޯ ބްރޯޑްކާސްޓިންގެ ދާއިރާގައި އޭނާ ހޭދަކުރެއްވި 49 އަހަރުގެ ހަނދާންތަކާއި ތަޖުރިބާތައް ބަޔާންކޮށްދެއްވާފައިވާ ފޮތެކެވެ.

ބަދުރުގެ ރޭޭޑިއޯގެ ޚިދުމަތުގެ މައްޗަށް އަލިއަޅުއްވާލައްވައި ލިޔުއްވާފައިވާ ފޮތް ހަދިޔާކުރުމަށް ބޭއްވި ރަސްމިއްޔާތުގައި ޕީއެސްއެމްގެ މެނޭޖްމަންޓާއި، ޕީއެސްއެމްގެ ދަށުން ހިންގާ ދިވެހިރާއްޖޭގެ އަޑުގެ އިސްވެރިން ބައިވެރިވެވަޑައިގެންނެވިއެވެ.

ޕީއެސްއެމްގެ ފަރާތުން ބަދުރު ހަދިޔާކުރެއްވި ފޮތާއި ހަވާލުވެވަޑައިގަތީ މެނޭޖިން ޑިރެކްޓަރ އަލީ ހާލިދުއެވެ.

މި ރަސްމިއްޔާތުގައި ވާހަކަ ދައްކަވަމުން ބަދުރުއްނަސީރު ވިދާޅުވީ މި ފޮތް ލިޔުމުގެ އެންމެ ބޮޑު ބޭނުމަކީ އޭނާ ދިވެހިރާއްޖޭގެ އަޑުގައި ހޭދަކުރެއްވި ދުވަސްތަކާއި އަދި އޭނާއާއެކު މަސައްކަތް ކުރެއްވި ފަރާތްތައް ކުރެއްވި މަސައްކަތް ފޮތެއްގެ ސިފައިގައި ލިޔެ ރައްކާކުރުންކަމަށެއެވެ

ބަދުރު ވިދާޅުވީ މި ފޮތް އެންމެ ފުރަތަމަ ލިޔުއްވަން ފެއްޓެވީ 2016 ވަނަ އަހަރުކަމަށާއި ފޮތް އެއްކޮން ލިޔެ ނިމުނީ 2022 ވަނަ އަހަރުގެ ތެރޭގައިކަމަށެއެވެ. އަދި އެންމެ ފުރަތަމަ ފޮތް ޝާޢިއުކުރީ ޑިޖިޓަލްކޮށްކަމަށާއި ފޮތެއްގެ ސިފައިގައި ޗާޕުކޮށްގެން ނެރުނީ ގިނަބައެއްގެ އެދުމުގެ މަތިންކަމަށް ބަދުރު ވިދާޅުވިއެވެ.

މި ފޮތް މިހާރު މާލޭގެ އިތުރުން އަތޮޅުތެރޭގެ ރަށްތަކުގެ ސުކޫލްތަކާއި ލައިބްރަރީތަކަށް ހަދިޔާކޮށްފައިވާކަމަށާއި އަދި އިތުރު ފަރާތްތަކަށްވެސް މި ފޮތް ހަދިޔާ ކުރުމަށް ހަމަޖެހިފައިވާކަމަށް ބަދުރު ވިދާޅުވިއެވެ. އަދި މި ފޮތަކީ އެއްވެސް ހާލެއްގައި އާމްދަނީ ހޯދުމަށް ވިއްކުމަށް ލިޔުއްވި ފޮތެއް ނޫންކަމަށާއި މި ފޮތަކީ އޭނާގެ ތަޖްރިބާއާއި ދިވެހިރާއްޖޭގެ އަޑުގައި ހޭދަކުރެއްވި ދުވަސްތަކުގެ ހަނދާންތައް އާކުރުމުގެ ގޮތުން ލިޔުއްވި ފޮތެއްކަމަށް ބަދުރު ވިދާޅުވިއެވެ.

ދިވެހިރާއްޖޭގެ ރޭޑިއޯގެ ޚިދުމަތާއި ބަދުރު ގުޅިވަޑައިގަތީ 1967 ވަނަ އަހަރުއެވެ. ރޭޑިއޯއާއި ގުޅިވަޑައިގެންނެވި ގޮތަށް ރޭޑިއޯގެ ތަރައްގީގެ އެކި މަރުހަލާތަކުގައި ބަދުރު އައީ ކުރިއަށް ވަޑައިގަންނަވަމުންނެވެ. އުމުރުން 65 އަހަރު ވުމުން މުސްކުޅި ކުރެއްވުމާއި ހަމައަށް ވެސް ބަދުރު ގެންދެވީ ރޭޑިއޯއިން މުޖްތަމައުއަށް ހިދުމަތް ކޮށްދެއްވަމުންނެއެވެ.

ދިވެހިރާއްޖޭގެ އަޑުގެ ޙިދުމަތުން ރިޓަޔާ ކުރެއްވުމަށްފަހު ރާއްޖޭގެ ބްރޯޑްކާސްޓަރުން ރެގިއުލޭޓްކުރުމަށް އުފެއްދި "މޯލްޑިވްސް ބްރޯޑްކާސްޓިން ކޮމިޝަން"ގެ ފުރަތަމަ ރައީސްއަކީވެސް ބަދުރެއެވެ.

ރާއްޖޭގެ ބްރޯޑްކާސްޓިންގ ދާއިރާގެ ތަރައްގީއާއި ކުރިއެރުމަށް ބަދުރު ކޮށްދެއްވާފައިވާ އަގުހުރި ހިދުމަތްތަކުގެ އަގު ވަޒަންކުރައްވާ ދިވެހި ދައުލަތުގެ އިއްޒަތެއްކަމުގައިވާ، ނިޝާން ދިޔަމިގިލީ ޝަރަފުގެ އިއްޒަތް 2020 ވަނަ އަހަރު ވަނީ އަރުވާފައެވެ.