އަޅުވެތިކޮށްފައިވާ ހުޅަނގު އައްސޭރީގައި ޔަހޫދީ ވަޒަންވެރިން ދިރިއުޅޭ ސަރަޙައްދެއްގައި ޔަހޫދީ ފުލުހަކު ހަމަލަދީ ފަލަސްޠީނުގެ ޒުވާނެއް ޝަހީދުކޮށްލައިފިއެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ ޔަހޫދީ ފުލުހުންގެ ޖައްބާރު މީހެއްގެ ޝިކާރައަކަށްވެ ޝަހީދުވެފައި ވަނީ އުމުރުން 20 އަހަރުގެ މުޙައްމަދު އަލް-މަޛްރަޢާ ކަމުގައެވެ.
މުޙައްމަދު ޝަހީދުކޮށްލާފައި ވަނީ ހުޅަނގު އައްސޭރީގައި ޔަހޫދީން ވަޒަންވެރި ކޮށްފައިވާ މައަލޭ އަދުމީމް ސަރަޙައްދުގައި ހުންނަ ފިހާރަބަރިއެއް ކައިރީގައެވެ. އޭނާއަކީ ހުޅަނގު އައްސޭރީގެ ރަށެއް ކަމުގައިވާ ޢައިޒަރިއްޔާގައި ދިރިއުޅޭ ރައްޔިތެކެވެ.
ޔަހޫދީ އިސްރާޢީލުގެ ޓެރެރިސްޓު ފުލުހުން ބުނީ، މުޙައްމަދަށް ހަމަލަދީ ޝަހީދުކޮށްލާފައި ވަނީ ޔަހޫދީ ވަޒަންވެރިންނަށް ހަމަލަދޭން އޭނާ މަސައްކަތް ކުރުމުން ކަމުގައެވެ. އަދި، އޭނާގެ ހަމަލަތަކުގައި ޔަހޫދީންގެ ހަ މީހަކު ޒަޚަމުވެފައިވާ ކަމުގައެވެ. ޣައްޒާގައި ވެރިކަން ކުރާ ހަމާސް ޖަމާޢަތުން ވަނީ މުޙައްމަދު ހިންގާފައި ވަނީ ޖިހާދުގެ އަމަލެއް ކަމަށް ސިފަކޮށް، އެ ކަމަށް ތާރީފުކޮށްފައެވެ.
މި ހާދިސާ ހިނގާފައިވާ މައަލޭ އަދުމީމަކީ ބައިނަލްއަޤުވާމީ ޤާނޫނުތަކާ ޚިލާފަށް ޔަހޫދީން ވަޒަންވެރި ކޮށްފައިވާ ތަނެކެވެ. އެއީ ފަލަސްޠީނުގެ ބިމެއް ކަން މުޅި ދުނިޔެ ވެސް ގަބޫލުކުރެއެވެ. ޔަހޫދީން ފަލަސްޠީނުގެ ބިންތަކަށް އަތްގަދަކޮށް، ވެރިވެގަނެ، އެ ބިންތަކުގައި ޔަހޫދީން ވަޒަންވެރި ކުރުވަން ފަށާފައި ވަނީ 1967 ވަނަ އަހަރުގެ ހަނގުރާމައަށް ފަހުއެވެ. އެއަށްފަހު ފަލަސްޠީނުގެ ރައްޔިތުން ދިރިއުޅެމުން ގޮސްފައި ވަނީ ޔަހޫދީންގެ އަޅުވެތިކަމުގެ ދަށުގައެވެ.
މުޙައްމަދު ޝަހީދުކޮށްލާފައި މި ވަނީ، ޔަހޫދީންގެ ޤައުމީ ސަލާމަތާ ބެހޭ ޖައްބާރު މިނިސްޓަރު އިތަމާރް ބެން-ގުވީރު ގަދަބާރުން ބައިތުލްމަޤުދިސްގައި ހުންނަ މަސްޖިދް އަލް-އަޤްޞާއަށް ވަދެ، އެ ތަނުގެ ހުރުމަތް ކެނޑިތާ ގަޑިއިރުތަކެއް ފަހުންނެވެ. އޭނާއާ އެކު ގިނަ ޢަދަދެއްގެ ޔަހޫދީން އަޤްޞާއަށް ވަނެވެ.
ފާއިތުވި އަހަރުތަކާ އަޅައިބަލާއިރު، މި އަހަރަކީ ފަލަސްޠީނުގެ ރައްޔިތުންނަށް އަނދިރިކަމާއި، ބިރުވެރިކަމާއި ނާމާންކަމުން ފުރިގެންވާ އަހަރެކެވެ. ޔަހޫދީންގެ ލާއިންސާނީ އުދުވާންތަކުގައި ފަލަސްޠީނުގެ ގިނަ ޢަދަދެއްގެ ބަޔަކު ޝަހީދުކޮށްލާފައިވާ އަހަރެވެ. އެތަކެއް މައިންނެއްގެ ޅަ ދަރިން ގަތުލުކޮށްފައިވާ އަހަރެކެވެ. އެތަކެއް ދަރިންނެއް ޔަތީމުކޮށްލާފައިވާ އަހަރެކެވެ. އެތަކެއް އަނބިންނެއް ހުވަފަތް ކޮށްލާފައިވާ އަހަރެކެވެ.
މި އަހަރުގެ ތެރޭގައި ޔަހޫދީ ޓެރެރިސްޓު ސިފައިންނާއި ފުލުހުން ހިންގާފައިވާ ލާއިންސާނީ ޖަރީމާތަކުގައި ޝަހީދުކޮށްލާފައިވާ ފަލަސްޠީން ރައްޔިތުންގެ ޢަދަދު މިހާރު ވަނީ 200 އަށްވުރެ މައްޗަށް އަރާފައެވެ. އޭގެ ތެރޭގައި ކުށެއް ނެތް ގިނަ ޢަދަދެއްގެ ޢާންމުންނާއި، އަންހެނުންނާއި ކުޑަކުދިން ހިމެނެއެވެ. އަދި، އުމުރުން ދުވަސްވީ މީހުން ވެސް ހިމެނެއެވެ.
ޔަހޫދީ ޖައްބާރު ސިފައިންނާއި ފުލުހުން ގަތުލުކޮށް ޝަހީދުކުރާ ފަލަސްޠީން ރައްޔިތުންގެ ޢަދަދުތައް އ.ދއިން ބަލަހައްޓަން ފަށާފައި ވަނީ 2005 ވަނަ އަހަރު ކަން ފާހަގަކުރެވެއެވެ. އޭގެ ފަހުން މި އަހަރަކީ ފަލަސްޠީނުގެ ރައްޔިތުންނަށް މިހާތަނަށް ކުރިމަތިވި އެންމެ ލޭއޮހޮރުވުންތަކާއި ގަތުލުއާންމުތައް ގިނަ އަހަރެވެ. އެ ކަން އ.ދއާއި ބައިނަލްއަޤުވާމީ މުޖުތަމަޢުން ވެސް ގަބޫލުކުރެއެވެ. ނަމަވެސް، އެ މަންޒަރު ބަދަލުކުރަން މުޅި ބައިނަލްއަޤުވާމީ މުޖުތަމަޢު އޮތީ ނުކުޅެދިފައެވެ.
2022 ވަނަ އަހަރު ވެސް ޔަހޫދީ ޓެރެރިސްޓު ސިފައިންނާއި ފުލުހުން ވަނީ ލާއިންސާނީ އުދުވާންތައް ހިންގައި ފަލަސްޠީނުގެ 150 އަށްވުރެ ގިނަ މީހުން ޝަހީދުކޮށްލާފައެވެ. އޭގެ ތެރޭގައި 33 ކުޑަކުދިން ހިމެނޭ ކަމަށް އ.ދގެ ތަފާސްހިސާބުތަކުން ދައްކައެވެ. ދެން ގިނައީ ކުށެއް ނެތް ޢާންމުންނެވެ. މި ކަމާ ގުޅިގެން އ.ދއިން ވަނީ ކަންބޮޑުވުން ފާޅުކޮށްފައެވެ. ނަމަވެސް، އެ ކަން ހުއްޓުވަން އަމަލީ ގޮތުން ހަރުދަނާ މަސައްކަތްތަކެއް ކުރެވިފައިވާ ތަން ފެންނާކަށް ނެތެވެ.