"މައި އާސަންދަ" ޕޯޓަލާއެކު އާސަންދައިގެ ޚިދުމަތް ހޯދުމަށް އިތުރު ލުއިފަސޭހައެއް
-
އާސަންދައިގެ "މައި އާސަންދަ" ވެބް ޕޯޓަލް މެދުވެރިކޮށް މިހާރު ހުރިހާ ޚިދުމަތެއް އޮންލައިންކޮށް ހޯދޭނެ
-
ޑޮކްޓަރު ފުރައިދޭ ރެކޮމެންޑޭޝަން ފޯމު މި މަހު 15 އިން ފެށިގެން ބަލައިގަންނާނީ ޕޯޓަލް މެދުވެރިކޮށް
-
އެ ކުންފުނިން ދޭ އެހެން ހިދުމަތްތައް ވެސް ދެން ލިބޭނީ އެ ޕޯޓަލް މެދުވެރިކޮށް
"މައި އާސަންދަ" ގެ ނަމުގައި އަލަށް ތަޢާރަފުކުރި ވެބް ޕޯޓަލާއެކު އާސަންދައިގެ ޚިދުމަތް ހޯދުމަށް އިތުރު ލުއިފަސޭހައެއް ލިބިގެންދާނެކަމަށް އެކުންފުނިން ބުނެފިއެވެ. މި ވެބް ޕޯޓަލްއަކީ ބޭސް ފަރުވާގެ ކަންކަމުގައި ދައުލަތުގެ އެހީތެރިކަމަށް އެދުމުގެ މަގު ފަސޭހަކުރުމުގެގޮތުން އެކުންފުނިން ތަޢާރަފުކުރި ޕޯޓަލެކެވެ.
އާސަންދައިން އޮންލައިންކޮށް މީގެ ކުރިން ލިބެމުން ދިޔައީ ބައެއް ޚިދުމަތްތަކެއެވެ. އެހެންނަމަވެސް މި ވެބް ޕޯޓަލް ތަޢާރަފުކުރުމުން އެ ސްކީމްގެ ތެރެއިން ރާއްޖެއިން ބޭރުން ފަރުވާ ހޯދުމަށް ޑޮކްޓަރު ފުރައިދޭ ރެކޮމެންޑޭޝަން ފޯމުވެސް ބަލައިގަންނާނީ މި ޕޯޓަލް މެދުވެރިކޮށެވެ. އަދި މި މަހު 15 އިން ފެށިގެން މި ފޯމް ބަލައިގަންނާނީ އެ ޕޯޓަލް މެދުވެރިކޮށް އެކަނިކަމަށްވެސް އާސަދައިން ބުނެއެވެ.
އާސަދައިން ބުނީ އެ ކުންފުނިން ދޭ އެހެނިހެން ޚިދުމަތްތައް ވެސް ދެން ލިބޭނީ އެ ޕޯޓަލް މެދުވެރިކޮށް ކަމަށެއެވެ. އޭގެ ތެރޭގައި އާސަންދައިގެ އިތުރުން ވެލްފެއާގެ އެހީތެރިކަމަށް އެދި ހުށަހަޅާ ލިޔެކިޔުންތައް ހުށައެޅުން، އެޕްލިކޭޝަން ކުރިއަށް ގެންދިއުމަށް އިތުރު ލިޔެކިޔުން ބޭނުންވާ ނަމަ، އެ ލިޔެކިޔުންތައް ޕޯޓަލްގެ ތެރެއިން ހުށަހެޅުމާއި ޑޮކްޓަރުންނަށް ރެކޮމެންޑޭޝަން ފޯމު ޕޯޓަލްގެ ތެރެއިން ފުރައިދެވެވުމުގެ ޚިދުމަތް ހިމެނެއެވެ.
މީގެ އިތުރުން އެޕްލިކޭޝަންގެ ސްޓޭޓަސް މި ވެބް ޕޯޓަލް މެދުވެރިކޮށް ކޮޮންމެ ވަގުތަކުވެސް ބަލާލެވޭނެ ކަމަށެވެ. މި ވެބް ޕޯޓަލަށް ލޮގްވާން އީފާސް ބޭނުންކުރެވޭނެއެވެ.
އާސަންދައިން ބުނީ ރައްޔިތުންނަށް ލުއި ފަސޭހަކަމާއެކު ޚިދުމަތް ފޯރުކޮށް ދިނުމުގެ މަޤްޞަދުގައި ތައާރަފްކުރި މި ޕޯޓަލްގެ ސަބަބުން ހިދުމަތް ހޯދުމަށް ކިޔުގައި ޖެހުން ނިމުމަކަށް އައްނާނެކަމަށެއެވެ. އަދި ހިދުމަތް ހޯދަން އެ ކުންފުނީގެ ކައުންޓަރަށް ދެން ކޮންމެހެން ދާން ނުޖެހޭނެ ކަމަށެވެ. އެހެން ނަމަވެސް ކައުންޓަރ މެދުވެރިކޮށް ޚިދުމަތް ހޯދުމަށް ބޭނުންވާ ނަމަ، އެ ފުރުސަތު އަދިވެސް ދޭނެ ކަމަށް އެ ކުންފުނިން ބުންޏެވެ.
އާސަންދަ ކުންފުންޏަކީ ދިވެހިރާއްޖޭގެ އިޖްތިމާއީ ޞިއްޙީ އިންޝުއަރެންސްގެ ޤައުމީ ނިޒާމުގެ މަސައްކަތްތައް ހިންގާ ބެލެހެއްޓުމަށްޓަކައި ސަރުކާރުން 2011 ވަނަ އަހަރު ޤާއިމްކޮށްފައިވާ ކުންފުންޏެކެވެ.
އާސަންދައިން ދަނީ ޢާއްމުންނަށް ބޭނުންވާ މުހިންމު ޚިދުމަތްތަކެއް ތައާރަފްކުރަމުންނެވެ. އެގޮތުން އާސަންދަ ކުންފުނީގެ ޔޫޓިއުބް ޗެނަލްވެސްވަނީ ލޯންޗްކޮށްފައެވެ. މިއީ އާސަންދައިގެ ޚިދުމަތްތަކާ ގުޅޭ މަޢުލޫމާތު ވީހާވެސް ފަސޭހައިން އާއްމުންނަށް ލިބޭނެގޮތް ހަމަޖެއްސުމަށް ހެދި ޗެނަލްއެކެވެ. ޔޫޓިއުބް ޗެނަލް މެދުވެރިކޮށް، ކުރު ވީޑިއޯ ކްލިޕްތަކަކުން އާސަންދައިގެ ޚިދުމަތްތަކާއި ޚިދުމަތްތައް ހޯދުމަށް ހުށައަޅާނެ ގޮތްތަކުގެ މަޢުލޫމާތުވެސް ލިބޭނެއެވެ.
އާސަންދައިން ވަނީ ހުރިހާ ހޮސްޕިޓަލްތަކުގެ ޚިދުމަތްތައްވެސް އެއް ވިއުގައަކުން ގުޅާލާފައެވެ. މި ވިއުގަ މެދުވެރިކޮށް، މީހާ ޑޮކްޓަރަށްދެއްކުމާ ގުޅޭ މަޢުލޫމާތުތައް އެއް ވިއުގައަލުން ބަލާލެވޭނެއެވެ.