ހަވާގެ ހިތްގައިމު ހަރަކާތްތަކާއެކު މިނިވަން އުފާ ކާނިވާ މިރޭ ނިންމާލަނީ

ރާއްޖޭގެ ފަޚުރުވެރި މިނިވަން ދުވަސް ފާހަގަކުރުމަށް ހުޅުމާލޭ ސެންޓްރަލް ޕާކުގައި ކުރިއަށްގެންދިޔަ "މިނިވަން އުފާ" ކާނިވާ މިރޭ ނިންމާލާނެއެވެ.

ހުޅުމާލެ ސެންޓްރަލ ޕާކުގައި 6 ދުވަހުގެ މުއްދަތަކަށް ކުރިއަށްގެންދިޔަ މި ކާނިވަލަކީ މިނިސްޓްރީ އޮފް ހޯމްއެފެއާޒާއި ހައުސިން ޑިވެލޮޕްމަންޓް ކޯޕަރޭޝަން ގުޅިގެން ކުރިއަށްގެންދިޔަ ކާނިވަލެކެވެ.

މިނިވަން އުފާ ކާނިވަލަކީ މުނިފޫހިފިލުވުމުގެ އެކި ހަރަކާތްތައް ހިިމެނޭ ފެސްޓިވަލެއް ގޮތަށް ރާއްޖޭގައި މިހާތަނަށް ބޭއްވުނު މިފަދަ އެންމެ ބޮޑު އެއް ހަރަކާތެއެވެ. ކާނިވާ ނިންމާލުމުގެ ގޮތުން މިރޭ ޚާއްސަ ކަންތައްތަކެއް ކުރިއަށްދާނެކަމަށް އެޗް.ޑީ.ސީއިންވެސް ބުނެއެވެ.

މިރޭގެ ކާނިވަލުގައި ކުރިއަށްދާނެ ބައެއް ޚާއްސަ ހަރަކާތްތަކަށް ބަލާއިރު، ދިވެހި އަދި ބޭރު ފަންނާނުންގެ ހުށައެޅުންތަކާއި، ގިނަ ކުޅިވަރު ހަރަކާތްތަކެއް މިރޭވެސް ކުރިއަށްދާނެއެވެ. އަދި މިރޭ 21:00 ހަވާގެ ހިތްގައިމު ހަރަކާތްތަކެއްވެސް ކުރިއަށްދާނެއެވެ. މީގެ އިތުރުން ކާނިވަލަށް ޒިޔާރަތްކުރާ ފަރާތްތަކުގެ ތެރެއިން ގުރުއަތުން ހޮވޭ ފަރާތަކަށް، އިތުރު މީހަކާއެކު އިންޑޮނޭޝިޔާގެ ބާލީއަށް 7 ދުވަހުގެ ދަތުރު ލިބޭ ނަސީބުވެރި ފަރާތް ހޮވުންވެސް މިރޭގެ ކާނިވަލްގައި މިރޭ ކުރިއައްދާނެއެވެ.

މި ކާނިވާގައި އެންމެ ޝައުގުވެރި ހަރަކާތެއްގެ ގޮތުގައި ކުރިއަށް ގެންގޮސްފައިވަނީ ރާއްޖޭގައި ފުރަތަމަ ފަހަރަށް ބޭއްވި ޑްރޯން ޝޯވއާއި، ޕެރެމެޓޯގެ ހަރަކާތެވެ. ރާއްޖޭގައި ބޭއްވި މިފަދަ ފުރަތަމަ ޑްރޯން ޝޯގައި، 300 އަށްވުރެ ގިނަ ޑްރޯން ބޭނުންކޮށްފައިވެއެވެ. އަދި ދިވެހިރާއްޖެ ރަމްޒުކޮށްދޭ ގޮތަށް، ޑިސްޕްލޭކޮށްފައިވެއެވެ. މި ކާނިވަލްގައި ކުޅިވަރު ސްޓޯލްތަކާއި ފުޑް ސްޓޯލްތަކާއި ދިގުދަނޑި ހިނގުން، އެކްރޮބެޓްސްް، ޖަގްލަރސް، ބިރުވެރި ހޮހޮޅަ، ކަރޯކޭ ބޮކްސް، ފްލޯޓް ޕާރކް، ލެއިޒަރ ޕާރކެއްވެސް ހިމެނެއެވެ.

މިނިވަން އުފާ ކާނިވާލަށް އާއްމުންގެ ފަރާތުންވެސް ބޮޑު ތަރުޚީބެއް ލިބިފައިވާއިރު، ކޮންމެ ދުވަހަކުވެސް އެތައް ބަޔަކު ކާނިވަލަށް ޒިޔާރަތްކޮށްފައިވާކަން ފާހަގަކޮށްލެވެއެވެ.