ބާރުގަދަ ތޫފާނެއް ކަމުގައިވާ ކަނޫން ޖަޕާނުގެ ސަރަޙައްދުތަކަށް އެރުމާ އެކު ހިނގި އެކި ހާދިސާތަކުގައި ދެ މީހަކު މަރުވެއްޖެއެވެ. ތޫފާނުގެ އަސަރު އެންމެ ފުރަތަމަ ކޮށްފައި ވަނީ ޖަޕާނުގެ ދެކުނު ފަރާތު އައްސޭރިފަށުގައި އޮންނަ އޮކިނަވާ އަދި ކަގޯޝިމާ ޕްރިފެކްޗަރަށެވެ. އެ ތޫފާން މިހާރު ދަތުރުކުރަމުން ދަނީ އިރުމަތީ ޗައިނާ ކަނޑުގެ ހުޅަނގުއުތުރަށް ކަމުގައި މޫސުމާ ބެހޭ އިދާރާތަކުން ހާމަކުރެއެވެ. ނަމަވެސް މި ތޫފާނުގެ އަސަރު ޗައިނާއަށް ކުރާނެ ކަމަކަށް ނުބެލެވެއެވެ.
ޖަޕާނުގެ މޫސުމާ ބެހޭ އިދާރާއިން ބުނީ މި ތޫފާނާ އެކު ގަޑިއަކު 162 ކިލޯމީޓަރާއި 234 ކިލޯމީޓަރާ ދެމެދުގެ ބާރުމިނެއްގައި ވައި ޖެހެމުންދާ ކަމުގައެވެ. މި ތޫފާނާ ގުޅިގެން އޮކިނަވާގައި އުމުރުން ދުވަސްވީ އަންހެނެއް މަރުވެފައިވާ ކަމުގައި އެ ސަރަޙައްދުގެ އޮފިޝަލުން ވިދާޅުވެއެވެ. އޭނާ މަރުވެފައި ވަނީ އޭނާ ދިރިއުޅޭ ގޭގައި އަލިފާން ރޯވުމުގެ ސަބަބުންނެވެ. އެ ގޭގައި އަލިފާން ރޯވީ، ކަރަންޓުގެ ޚިދުމަތް ކެނޑުމާ ގުޅިގެން އަލިކުރުމަށް އުށްބައްތި ބޭނުންކުރުމުން ކަމަށް އޮފިޝަލުން ވިދާޅުވިއެވެ.
ދެން މަރުވެފައި ވަނީ އުމުރުން 90 އަހަރުގެ މީހެކެވެ. އޭނާ މަރުވީ، ވެއްޓުނު ގަރާޖެއްގެ ދަށުވެގެންނެވެ. މި ތޫފާނާ ގުޅިގެން އޮކިނަވާގެ އިތުރުން ކަގޯޝިމާގެ ބޮޑު ސަރަޙައްދަކުން ކަރަންޓުގެ ޚިދުމަތް މެދުކެނޑިފައިވާއިރު، ތޫފާނާ ގުޅިގެން ކުރިމަތި އެކި ހާދިސާތަކުގައި 62 މީހުންނަށް އަނިޔާވެފައިވާ ކަމުގައި އޮފިޝަލުން ވިދާޅުވެއެވެ.
އޮކިނަވާއަކީ ވެރިރަށް ތޯކިޔޯގެ ހުޅަނގުދެކުނުން 1,600 ކިލޯމީޓަރު ދުރުގައި އޮންނަ ރަށްތަކެކެވެ. އޮކިނަވާގައި ކަރަންޓުގެ ޚިދުމަތް ފޯރުކޮށްދޭ އޮކިނަވާ އިލެކްޓްރިކް ޕަވަރ ކުންފުނިން ބުނީ ވައި ބާރުވުމާ ގުޅިގެން ކަރަންޓުގެ ޚިދުމަތް ދިނުމަށް ބޭނުންކުރާ ގިނަ ޢަދަދެއްގެ ހޮޅިދަނޑިއާއި ޓަވަރުތަކަށް ގެއްލުން ލިބިފައިވާ ކަމަށާއި، 166,000 އަށްވުރެ ގޭބީސީން ކަރަންޓުގެ ޚިދުމަތް މެދުކެނޑިފައިވާ ކަމުގައެވެ.
މި ތޫފާނާ ގުޅިގެން އޮކިނަވާގެ ނާހާ ވައިގެ ބަނދަރުގެ ޚިދުމަތްތައް ވެސް ވަނީ ވަގުތީ ގޮތުން މެދުކަނޑައިލާފައެވެ. ފަތުރުވެރިންގެ މެދުގައި މަޤުބޫލު އެ ރަށަށް ދަތުރުކުރަން ހަމަޖެފައި އޮތް 304 ފްލައިޓެއް ކެންސަލް ކޮށްފައިވާ ކަމުގައި ޖަޕާނުގެ ދަތުރުފަތުރާ ބެހޭ ވުޒާރާއިން ބުންޏެވެ.
އޮކިނަވާގެ އުތުރުން އޮންނަ ކަގޯޝިމާގެ ރަށްތަކެއް ކަމުގައިވާ އަމާމީގައި ވެސް ކަރަންޓުގެ ޚިދުމަތް ވަނީ މެދުކެނޑިފައެވެ. އެ ކަމުގެ އަސަރު 6,550 ގޭބީސީއަކަށް ކޮށްފައިވާ ކަމުގައި އެ ޕްރިފެކްޗަރގެ އޮފިޝަލުން ވިދާޅުވެއެވެ. ކަނޫނާ އެކު އެ ރަށްތަކަށް ވެސް ދަނީ ބޯކޮށް ވާރޭ ވެހެމުންނެވެ.
މި ތޫފާނުގެ އަސަރުތައް ތައިވާނަށް ވެސް ކޮށްފައިވާއިރު، ތައިވާނުގެ އުތުރުގެ ސަރަޙައްދުތަކުގައި ވިޔަފާރިތަކާއި ސްކޫލްތައް ވަނީ ބަންދުކޮށްފައެވެ. އަދި، ގިނަ ޢަދަދެއްގެ ވައިގެ އުދުހުންތައް ވަނީ ކެންސަލް ކޮށްފައެވެ. މި ތޫފާނާ އެކު ތައިވާނުގެ އިރުއުތުރުގެ ސަރަޙައްދުތަކުގައި ފެންބޮޑުވެފައިވާއިރު، ވައި ބާރުވުމާ ގުޅިގެން ވެސް ބޮޑެތި ގެއްލުންތަކެއް ލިބިފައިވާ ކަމުގައި ތައިވާނުގެ އޮފިޝަލުން ވިދާޅުވެއެވެ.
ތައިވާނުގެ މޫސުމާ ބެހޭ އިދާރާއިން ބުނީ ކަނޫނަކީ ދެވަނައަށް އެންމެ ބާރުގަދަ ކެޓެގަރީގެ ތޫފާނެއް ކަމުގައެވެ. އަދި، މި ތޫފާނާ އެކު ގަޑިއަކު 340 ކިލޯމީޓަރަށް ވައި ބާރުވެފައިވާ ކަމަށާއި، ދަތުރުފަތުރަށް ހުރަސް އެޅިފައިވާ ކަމުގައި އެ އިދާރާއިން ބުންޏެވެ. މި ތޫފާނާ ގުޅިގެން ތައިވާނުން ބައިނަލްއަޤުވާމީ އަދި އެތެރޭގެ 110 އުދުހުން ކެންސަލް ކޮށްފައިވާއިރު، ވެރިރަށް ތައިޕޭގައި ވެސް ވިޔަފާރިތަކާއި ސްކޫލްތައް ވަނީ ބަންދުކޮށްފައެވެ. އަދި، ފެރީ ދަތުރުފަތުރުގެ ޚިދުމަތް ވެސް ވަނީ މެދުކަނޑައިލާފައެވެ. ތައިޕޭއިން 16,000 އަށްވުރެ ގިނަ ގޭބީސީން ވަނީ ކަރަންޓުގެ ޚިދުމަތް މެދުކެނޑިފައެވެ.