ރަޝިޔާގެ އަސްކަރިއްޔާއިން ސޫރިޔާގެ ހުޅަނގުއުތުރުގައިވާ އިދްލީބަށް ދިން ވަރުގަދަ ވައިގެ ހަމަލަތަކެއްގައި ޢާންމުންގެ ތިން މީހުން މަރުވެއްޖެއެވެ. މި ކަން ހާމަކޮށްފައި ވަނީ ސޫރިޔާގެ ރައްޔިތުންގެ އިންސާނީ ހައްޤުތަކުގެ ހާލަތު ބަލަމުންދާ ޖަމުޢިއްޔާއެއް ކަމުގައިވާ ސީރިޔަން އޮބްޒަރވޭޓަރީ ފޯ ހިޔުމަން ރައިޓްސް (އޮބްޒަރވޭޓަރީ)ންނެވެ.
އިދްލީބަކީ ސޫރިޔާގެ ރައީސް ބައްޝާރް ހާފިޛް އަލް-އަސަދުގެ ސަރުކާރާ ދެކޮޅު ހަނގުރާމަވެރި ޖަމާޢަތްތަކުގެ ބާރުގެ ދަށުގައި އޮތް ސަރަޙައްދެކެވެ. އެ ޖަމާޢަތްތަކާ ދެކޮޅަށް ކުރަމުންދާ ހަނގުރާމައި ރަޝިޔާއިން ދަނީ އަސަދުގެ ސަރުކާރަށް އަސްކަރީ ގޮތުން އެހީތެރިކަން ފޯރުކޮށްދެމުންނެވެ. ޖޫން މަހަށް ފަހު އިދްލީބްގެ އަމާޒުތަކަށް ދީފައިވާ މި ފަދަ ހަމަލަތަކުގެ ޢަދަދު އިތުރުވެފައިވާ ކަން ފާހަގަކުރެވެއެވެ.
އޮބްޒަރވޭޓަރީން ބުނީ ރަޝިޔާގެ އަސްކަރީ މަތިންދާބޯޓުތަކުން އިދްލީބަށް އެންމެ ފަހުން ދިން ހަމަލަތަކުގައި މަރުވެފައި ވަނީ އެއް ޢާއިލާއެއްގެ ތިން މެންބަރުން ކަމުގައެވެ. އެ ހަމަލަތަކުގައި އިތުރު ހަ މީހުން ޒަޚަމުވެފައިވާ ކަމަށާއި، ގެއްލުންވި ޢިމާރާތުގެ ދަށުގައި ތާށިވި ކަމަށް ބެލެވޭ އިތުރު މީހުން ސަލާމަތް ކުރަން މަސައްކަތް ކުރަމުންދާ ކަމުގައި ވެސް އެ ޖަމުޢިއްޔާއިން ބުންޏެވެ.
ހަތަރު ފަހަރު ރަޝިޔާއިން ހަމަލަދީފައިވާ އެ ސަރަޙައްދަކީ ހަނގުރާމަވެރި ޖަމާޢަތެއް ކަމުގައިވާ ހަޔާތް ތަޙްރީރް އަލް-ޝާމް (އެޗް.ޓީ.އެސް)ގެ ފައުޖުތައް ހަރަކާތްތެރިވަމުން ގޮސްފައިވާ ސަރަޙައްދެއް ކަމުގައި ވެސް އޮބްޒަރވޭޓަރީން ބުންޏެވެ. އެޗް.ޓީ.އެސްއަކީ ކުރިން އަލްޤައިދާއާ ގުޅުން އޮތް ޖަމާޢަތެކެވެ. އިދްލީބުގައި ހަނގުރާމަވެރި ޖަމާޢަތްތަކުގެ ބާރުގެ ދަށުގައި އޮތް ސަރަޙައްދުތައް ހިފަން އަސަދުގެ އަސްކަރިއްޔާއިން ދަނީ މަސައްކަތް ކުރަމުންނެވެ. މި މަސައްކަތުގައި ރަޝިޔާގެ އިތުރުން އީރާނުގެ އަސްކަރިއްޔާއިން ވެސް ދަނީ އަސަދުގެ ސަރުކާރަށް އެހީތެރިކަން ފޯރުކޮށްދެމުންނެވެ.
ސޫރިޔާގެ ދާޚިލީ ހަނގުރާމަ ފެށީ މީގެ 12 އަހަރު ކުރިންނެވެ. ހަނގުރާމަ ފެށުނީ އަސަދުގެ ސަރުކާރާ ދެކޮޅަށް އަޑުއުފުލަމުން ދިޔަ މީހުން ހުއްޓުވަން އަސްކަރިއްޔާއިން ބާރުގެ ބޭނުންކުރަން ފެށި ހިސާބުންނެވެ. މި ހަނގުރާމައިގައި ދުނިޔޭގެ އެކި ކަންކޮޅުތަކުން ހަނގުރާމަވެރިން ބައިވެރިވެފައިވާއިރު، މި ހަނގުރާމައިގައި 500,000 އަށްވުރެ ގިނަ މީހުން މަރުވެ، އެތަކެއް މިލިޔަން ބަޔަކު އަމިއްލަ ވަޒަނާއި ގެދޮރު ދޫކޮށް ހިޖުރަކުރަން މަޖުބޫރުވިއެވެ.
2020 ވަނަ އަހަރު ހަދާފައިވާ އެއްބަސްވުމެއްގެ ދަށުން ހަމަލަ ބަދަލުކުރުން މި ވަގުތު އޮތީ މަޑުޖެހިފައެވެ. އެ އެއްބަސްވުން އެކުލަވައިލާފައި ވަނީ ރަޝިޔާއާއި ތުރުކީވިލާތުން އިސްނަގައިގެންނެވެ. ނަމަވެސް، ފަހަކަށް އައިސް ހަމަލަ ބަދަލުކުރުން އިތުރުވެފައިވާ ކަން ފާހަގަކުރެވެއެވެ.
ޖޫން މަހުގެ 25 ވަނަ ދުވަހު ވެސް ރަޝިޔާގެ ފައުޖުތަކުން ވަނީ އިދްލީބަށް ވަރުގަދަ ވައިގެ ހަމަލަތަކެއްދީ، 13 މީހުން މަރައިލާފައެވެ. އޭގެ ތެރޭގައި ޢާންމުންގެ ނުވަ މީހުންނާއި، ދެ ކުޑަކުދިން ހިމެނޭ ކަމުގައި އޮބްޒަރވޭޓަރީން ބުނެއެވެ. ރަޝިޔާގެ ވައިގެ ހަމަލަތައް އަމާޒުކޮށްފައި ވަނީ ޖިއްސު އަލް-ޝުޢޫރުގައި އޮންނަ މޭވާއާއި ތަރުކާރީ ވިއްކާ މާރުކޭޓަކަށެވެ.