މަޣްރިބުގެ މެދުތެރޭގައިވާ ފަރުބަދަމަތީ ހިސާބެއްގެ މަގަކުން ދަތުރު ކުރަމުން ދިޔަ ބަހެއް ފުރޮޅައިލުމުގެ ސަބަބުން މަގުން ބޭރަށް ވެއްޓި ހިނގި ނުރައްކާތެރި އެކްސިޑެންޓެއްގައި 24 މީހުން މަރުވެއްޖެއެވެ. މި ހާދިސާ ހިނގާފައި ވަނީ އަޒީލާލް ޕުރޮވިންސުގެ ރަށެއް ކަމުގައިވާ ދިމަނާތުގައެވެ. މި ހާދިސާގައި ބަހުގައި ތިބި އެންމެން މަރުވެފައިވާ ކަމުގައިވާ އެ ޤައުމުގެ އޮފިޝަލުން ވިދާޅުވިއެވެ.
މި ހާދިސާ ހިނގި ވަގުތު ބަހުގައި ތިބި ފަސިންޖަރުން ދަތުރު ކުރަމުން ދިޔައީ ދިމަނާތުގައި ހަފުތާ ބަންދުގައި ބާއްވާ މާރުކޭޓެއްގައި ބައިވެރިވާށެވެ. ބަސް ފުރޮޅައިލާފައި ވަނީ ފަރުބަދަމަތީ މަގަކުން ދަތުރު ކުރަމުން ދަނިކޮށެވެ. މި ހާދިސާގެ ވީޑިޔޯތަކުން ފެންނަނީ މަގުން ބޭރަށް ވެއްޓި ބަސް ޗިސްވެފައިވާ މަންޒަރެވެ.
ދިމަނާތު ހޮސްޕިޓަލުގެ ޑިރެކްޓަރ ޔޫސުފް މަޚްލޫފީ ވަނީ މި ހާދިސާ ހިނގި ވަގުތު ބަހުގައި ތިބި ހުރިހާ މީހުން މަރުވެފައިވާ ކަން ކަށަވަރު ކޮށްދެއްވާފައެވެ. މަރުވި މީހުންގެ ތެރޭގައި ދެ އަންހެނުންނާއި ކުޑަ ކުއްޖަކު ވެސް ހިމެނޭ ކަމުގައި އޭނާ ވިދާޅުވިއެވެ. މި ހާދިސާ ހިނގަން މެދުވެރިވި ސަބަބު ދެނެގަތުމަށް މަސައްކަތް ފަށާފައިވާ ކަމުގައި ދިމަނާތުގެ އޮފިޝަލުން ވިދާޅުވެއެވެ.
ދިމަނާތުގައި މަސައްކަތް ކުރާ މަދަނީ ޖަމުޢިއްޔާގެ އިސް އޮފިޝަލެއް ކަމުގައިވާ އުމަރު މައްޖާނީ ބުނީ އެކްސިޑެންޓުވެފައިވާ އުޅަނދަކީ ބަހުގެ ޚިދުމަތް ދިނުމުގެ ހުއްދަ އޮތް އުޅަނދެއް ނޫން ކަމުގައެވެ. އަދި، މިއީ އެ ސަރަޙައްދުގައި ވަރަށް ބޮޑު މައްސަލައެއް ކަމުގައި ވެސް މައްޖާނީ ބުންޏެވެ. މި ހާދިސާގައި މަރުވެފައި ވަނީ ދިމަނާތުގެ ދެކުނުން އޮންނަ އަޠްލަސް ފަރުބަދައިގައި އޮންނަ ރަށެއް ކަމުގައިވާ އާޔަތް ތާމިލަލްގައި ދިރިއުޅޭ ބަޔެކެވެ.
މަޢްރިބުގެ އިތުރުން އިރުމަތީ އެފްރިކާގެ ގިނަ ޤައުމުތަކަކީ މަގުމަތީގެ އެކްސިޑެންޓުތައް ޢާންމު ޤައުމުތަކެއް ކަން ފާހަގަ ކުރެވެއެވެ. އެ ޤައުމުތަކުގައި މަގުމަތީގެ އެކްސިޑެންޓުތަކުގައި ކޮންމެ އަހަރަކު އެތަކެއް ހާސް ބަޔެއްގެ ފުރާނަ ގެއްލެއެވެ. މަޣްރިބުގެ އެހެން ރަށެއް ކަމުގައިވާ ބަރާކުއާގައި މާރިޗު މަހު ހިނގި މި ފަދަ ނުރައްކާތެރި އެހެން ހާދިސާއެއްގައި 11 މީހުން މަރުވެފައިވެއެވެ.
2022 ވަނަ އަހަރު މަޣްރިބުގެ ވިޔަފާރީގެ މަރުކަޒީ ރަށް ދާރުލްބައިޟާގައި ބަހެއް ފުރޮޅައިލައިގެން ހިނގި ނުރައްކާތެރި އެކްސިޑެންޓެއްގައި 23 މީހުން މަރުވެ، އިތުރު 36 މީހުން ޒަޚަމުވިއެވެ. އެ ޤައުމުގައި ކޮންމެ އަހަރަކު އެވުރެޖުކޮށް 3,500 އެއްހާ މަގުމަތީގެ އެކްސިޑެންޓު ހިނގާ ކަމަށް ރެކޯޑު ކުރެވިފައިވާއިރު، އެވުރެޖުކޮށް 12,000 އެއްހާ މީހުންގެ ފުރާނައަށް ނުރައްކާ ކަމަށް ރެކޯޑުތައް ދައްކައެވެ.
މަޣްރިބުގައި ހިނގާ އެކްސިޑެންޓުތަކުގައި ކޮންމެ ދުވަހަކު އެވުރެޖުކޮށް 10 މީހުން މަރުވާ ކަމަށް އެ ޤައުމުގެ މަގުމަތީގެ ސަލާމަތާ ބެހޭ އިދާރާ، ނޭޝަނަލް ރޯޑް ސޭފްޓީ އޭޖެންސީގެ ތަފާސްހިސާބުތަކުން ދައްކައެވެ. ހުސްވި 2022 ވަނަ އަހަރު މަގުމަތީގެ އެކްސިޑެންޓުތަކުގައި 3,200 މީހުން މަރުވެފައިވާ ކަމަށް ވެސް އެ އިދާރާއިން ބުނެއެވެ.
މަޣްރިބުގައި މިހާތަނަށް ހިނގާފައިވާ މި ފަދަ އެންމެ ނުރައްކާތެރި ހާދިސާގައި 42 މީހުން މަރުވިއެވެ. އެއީ، 2012 ވަނަ އަހަރުއެވެ. އެ ހާދިސާއާ ގުޅިގެން އެ ޤައުމުން ވަނީ މަގުމަތީގެ އެކްސިޑެންޓުތަކުގައި މަރުވާ މީހުންގެ ޢަދަދު 2026 ވަނަ އަހަރުގެ ކުރިން ދެ ގުނައަށް ދަށް ކުރަން މަސައްކަތްތަކެއް ފަށާފައެވެ.
މަޣްރިބާ އިންވެގެން އޮންނަ އަލްޖީރިޔާއަށް ބަލައިލާއިރު، ޖުލައި 19 ވަނަ ދުވަހު ފަސިންޖަރުން އުފުލާ ބަހަކާއި ލޮރީއެއް ޖެހިގެން ހިނގި ނުރައްކާތެރި އެކްސިޑެންޓެއްގައި 34 މީހުން މަރުވިއެވެ. އެ ހާދިސާގައި ބަހުގައި ރޯވިއެވެ. އަދި، ގިނަ މީހުން މަރުވީ ފިހިގެންނެވެ. އެ ހާދިސާގައި އިތުރު 12 މީހަކު ޒަޚަމުވިއެވެ.
އެ ސަރަޙައްދުގައި އޮންނަ ތޫނިސްގައި މި ފަދަ އެންމެ ނުރައްކާތެރި ހާދިސާއެއް ހިނގާފައި ވަނީ 2019 ވަނަ އަހަރުއެވެ. ފަރުބަދަމަތީ މަގެއްގެ މަތިން ފޮރުޅައިލައިގެން ބަހެއް ތިރިއަށް ވެއްޓުނު އެ ހާދިސާގައި 24 މީހުން މަރުވިއެވެ. އަދި، އިތުރު 18 މީހުން ޒަޚަމުވިއެވެ.
އިރުމަތީ އެފްރިކާގެ ޤައުމުތަކުގެ ތެރެއިން މަގުމަތީގެ އެންމެ ނުރައްކާތެރި އެކްސިޑެންޓުތައް ހިނގާފައިވާ އެއް ޤައުމަކީ ލީބިޔާއެވެ. 2018 ވަނަ އަހަރުގެ ތަފާސްހިސާބުތަކަށް ބަލައިލާއިރު، އެ ޤައުމުގައި 4,115 މަގުމަތީގެ އެކްސިޑެންޓު ހިނގާފައިވެއެވެ. އަދި، 2,500 މީހުން މަރުވެ، އިތުރު 3,000 މީހުން ޒަޚަމުވިއެވެ. ޢަރަބި ދުނިޔޭގެ އެންމެ އާބާދީ ބޮޑު ޤައުމު ކަމުގައިވާ މިޞްރުގައި 2020 ވަނަ އަހަރު ހިނގި މަގުމަތީގެ އެކްސިޑެންޓުތަކުގައި 7,000 އެއްހާ މީހުން ވަނީ މަރުވެފައެވެ.