ޤައިދީންނަށް ޚާއްސަ ޕްރޮގްރާމެއް ހިންގުމަށް އެމްއޯޔޫއެއްގައި ސޮއިކޮށްފި

މޯލްޑިވްސް ކަރެކްޝަނަލް ސަރވިސްއިން ޤައިދީން ރިހެބިލިޓޭޓްކޮށް، ރަނގަޅު ފަރުދުންގެ ގޮތުގައި މުޖްތަމަޢުއަށް ނެރެން ކުރާ މަސައްކަތްތަކުގެ ތެރެއިން، ފެމިލީ ޕްރޮޓެކްޝަން އޮތޯރިޓީ އާ ގުޅިގެން "ޕަރޕެޓްރޭޓަރ ރިހެބިލިޓޭޝަން ޕްރޮގްރާމް" ހިންގުމަށް ފަހުމްނާމާއެއްގައި ސޮއިކޮށްފިއެވެ.

"ޕަރޕެޓްރޭޓަރ ރިހެބިލިޓޭޝަން ޕްރޮގްރާމް" ހިންގުމުގެ މަޤްޞަދަކީ ގެވެށި އަނިޔާގެ ޢަމަލު ހިންގާ މީހުން އިސްލާޙްކުރުމަށް މަސައްކަތްކުރުމެވެ. މިފަހުމްނާމާގެ ދަށުން، ފެމިލީ ޕްރޮޓެކްޝަން އޮތޯރިޓީގެ ކޮންސަލްޓަންޓުން ޖަލުތަކުގައި ގެވެށި އަނިޔާއާ ގުޅޭ ޙުކުމްތައް ތަންފީޛުކުރަމުންދާ ޤައިދީންނަށް މިޕްރޮގްރާމް ހިންގާނެއެވެ. މިޕްރޮގްރާމް ހިންގާނީ ރިހެބިލިޓޭޝަން ފްރޭމްވަރކްގެ ފޭސް 2 ގެ ދަށުންނެވެ. މިފޭސްގައި މިހާރުވެސް ހިންގަމުންދާ ޕްރޮގްރާމްތަކުގެ ތެރޭގައި ޖިންސީ ކުށްތަކުގައި ޙުކުމް ތަންފީޛްކުރަމުންދާ ޤައިދީންނަށް ޚާއްސަ "ސެކްސް އޮފެންޑަރ ޕްރޮގްރާމް" ޕްރޮގްރާމްވެސްހިމެނެއެވެ.

މޯލްޑިވްސް ކަރެކްޝަނަލް ސަރވިސްގެ ފަރާތުން މިފަހުމްނާމާގައި ސޮއިކުރެއްވީ ކޮމިޝަނަރ އޮފް ޕްރިޒަންސް އަޙްމަދު މުޙައްމަދު ފުޅު އެވެ. އަދި ފެމިލީ ޕްރޮޓެކްޝަން އޮތޯރިޓީގެ ފަރާތުން ސޮއިކުރެއްވީ ސީއީއޯ އާމިނަތު ޝިރާނީ ނައީމްއެވެ. މިއީ އެއް އަހަރު ދުވަހުގެ އެއްބަސްވުމެކެވެ.

ޖަލުތަކުގައި ތިބޭ ގައިދީން ރިހެބިލިޓޭޓް ކުރުމަށްވެސް ތަފާތު ޕްރޮގްރާމްތައްދަނީ ހިންގަމުންނެވެ. އެގޮތުން ޕްރިޒަން ބޭސްޑް ޑްރަގް ރިހިބިލިޓޭޝަން ޕްރޮގްރާމެއް 2022 ވަނަ އަހަރުން ފެށިގެންދަނީ ހިންގަމުންނެވެ.

މޯލްޑިވްސް ކަރެކްޝަނަލް ސަރވިސްގެ ތަފާސްހިސާބުތައް ދައްކާގޮތުން މިދިޔަ އަހަރުގެ ތެރޭގައި އެވްރެޖްކޮށް ކޮންމެ މަހަކު 64 މީހުން މޯލްޑިވްސް ކަރެކްޝަނަލް ސަރވިސްގެ ބެލުމުގެ ދަށަށް ގެންދެވިފައިވެއެވެ. އަދި ޤައިދީންގެ ތެރެއިން ކޮންމެ މަހަކުވެސް 40 މީހަކު ދޫކޮށްލާފައިވާ ކަމަށް އެސަރވިސްއިން ހާމަކުރައްވައެވެ. އަދި ވޭތުވެދިޔަ 5 އަހަރަށް ބަލާއިރު ކޮންމެ އަހަރަކުވެސް ގާތްގަނޑަކަށް 1489 ޤައިދީން ޖަލުތަކުގައި ބަލަހައްޓާ ކަމަށް ކަރެކްޝަނަލް ސަރވިސްއިން ވިދާޅުވެއެވެ.