އެމެރިކާގެ ސްޓޭޓެއް ކަމުގައިވާ ހަވާއީގެ ޖަންގަލިތަކުގައި ރޯވެފައިވާ އަލިފާންގަނޑު ޢާންމުން ދިރިއުޅޭ ސަރަޙައްދުތަކަށް ފެތުރުމާ ގުޅިގެން މަރުވި މީހުންގެ ޢަދަދު 53 އަށް އަރައިފިއެވެ. އަލިފާނުގައި އެންމެ ބޮޑަށް ގެއްލުން ލިބިފައި ވަނީ މަވުއީގެ ރިސޯޓު ރަށެއް ކަމުގައިވާ ލަހެއިނާއަށެވެ. އެ ރަށުގެ ބޮޑު ބައެއް އަލިފާނުގައި ވަނީ އަނދާ ހުލިވެފައެވެ.
ހަވާއީގެ ގަވަރުނަރު ޖޯޝް ގްރީން ވިދާޅުވީ އަލިފާނުގެ ސަބަބުން ފިހިގެން އަނިޔާވި މީހުންނާއި ދުމުގެ އަސަރުކޮށްފައިވާ މީހުންގެ ޢަދަދު ގިނަ ކަމަށާއި، މި ހާދިސާގައި މަރުވެފައިވާ މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައެވެ. މިއީ ލަހެއިނާގެ ތާރީޚުގައި އެ ރަށަށް ކުރިމަތިވި އެންމެ ނުރައްކާތެރި އަދި ފަނާކުރަނިވި ކާރިސާ ކަމުގައި އޭނާ ސިފަ ކުރެއްވިއެވެ. އަލިފާނުގައި އެ ރަށުގެ 1,000 އަށްވުރެ ގިނަ ޢިމާރާތް ވަނީ ސުންނާފަތިވެފައެވެ.
މި ހާދިސާގައި ގެދޮރު ގެއްލި މަގުމަތިވެފައިވާ މީހުންގެ ޢަދަދު އެތަކެއް ހާހަށް އަރާ ކަމަށާއި، އެ މީހުންނަށް ވަގުތީ ހިޔާވަހިކަން ހަމަޖައްސައިދޭން މަސައްކަތް ކުރަމުންދާ ކަމުގައި ގްރީން ވިދާޅުވިއެވެ. ހާލުގައި ޖެހިފައިވާ މީހުން ހޮޓާތަކާއި ކުއްޔަށް ދޫކުރާ ޢިމާރާތްތަކަށް ބަދަލުކުރަން ހަވާއީގެ އޮފިޝަލުން ދަނީ މަސައްކަތް ކުރަމުންނެވެ. އަދި، އެ ރަށް އަލުން އާރާސްތުކުރަން އެތަކެއް ބިލިޔަން ޑޮލަރެއް ޚަރަދުވާނެ ކަމަށާއި، އެ ކަމަށް އެތަކެއް އަހަރެއް ހޭދަވާނެ ކަމުގައި ވެސް އޭނާ ވިދާޅުވިއެވެ.
ލަހެއިނާއަކީ ފަތުރުވެރިންގެ މެދުގައި މަގުބޫލު ރަށެކެވެ. އެ ރަށަށް އަހަރެއްގެ މައްޗަށް ޒިޔާރަތްކުރާ ފަތުރުވެރިންގެ ޢަދަދު 2 މިލިޔަނަށް އަރައެވެ. ލަހެއިނާގެ އިތުރުން މަވުއީ އެހެން ދެ ސަރަޙައްދެއްގެ ޖަންގަލިތަކުގައި ވެސް ރޯވެ އަނދަމުންދާ ކަމުގައި އޮފިޝަލުން ވިދާޅުވިއެވެ. މޫސުން ގޯސްވުމާ އެކު ހޫނު ގަދަވެ، ގަޑިއަކު 100 ކިލޯމީޓަރަށް ވައިބާރުވުމާ ގުޅިގެން އަލިފާންގަނޑުތައް ކޮންޓްރޯލްކޮށް ނިއްވައިލުމަށް ކުރަމުންދާ މަސައްކަތަށް ވަނީ ހުރަސް އެޅިފައެވެ.
ލަހެއިނާގައި އަނދާ ހުލިވެފައިވާ ޢިމާރާތްތަކުގެ ތެރޭގައި މަރުވެފައިވާ ކަމަށް ބެލެވޭ މީހުންގެ ހަށިތައް ވާ ކަމަށާއި، އެ މީހުންގެ ހަށިތައް ހޯދަން މަސައްކަތް ފަށާފައިވާ ކަމުގައި އޮފިޝަލުން ވިދާޅުވިއެވެ. މި މަސައްކަތާއި، ހާލުގައި ޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދިނުމަށް އެމެރިކާގެ މައި ސަރުކާރުން މިހާރު ވަނީ ފައިސާ ދޫކުރަން ފަށާފައެވެ.
މަވުއީގައި ޖަންގަލިތަކުގައި ރޯވެފައިވާ އަލިފާންގަނޑުތައް ޢާންމުން ދިރިއުޅޭ ސަރަޙައްދުތަކަށް ފެތުރެމުން ފެށުމާ އެކު އޮފިޝަލުން ވަނީ ލަހެއިނާގައި ދިރިއުޅޭ ރައްޔިތުންނާއި އެ ރަށަށް ޒިޔާރަތްކޮށްފައިވާ ފަތުރުވެރިން ރައްކާތެރި ހިސާބުތަކަށް ބަދަލު ކުރުމުގެ މަސައްކަތް ފަށާފައެވެ. ގިނަ ޢަދަދެއްގެ ބަޔަކު އަދިވެސް ކަހޮލުއީ ވައިގެ ބަނދަރުގައި ތާށިވެފައިވާ އިރު، އެ މީހުން ސަލާމަތް ކުރަން އިތުރު މަތިންދާބޯޓުތައް ފޮނުވަން އޮފިޝަލުން ދަނީ މަސައްކަތް ކުރަމުންނެވެ.
ނަމަވެސް، މީހުން ސަލާމަތް ކުރުމުގެ މަސައްކަތް ފެށުމުގައި ލަސްތަކެއް ހުރި ކަން ފާހަކުރެވެއެވެ. އަލިފާންގަނޑުގެ ނުރައްކަލުން ސަލާމަތް ކުރުމަށް ގިނަ ޢަދަދެއްގެ ބަޔަކު ވަނީ މޫދަށް ފައިބާފައެވެ. އަދި، ގިނަ ޢަދަދެއްގެ ބަޔަކު ވަނީ ކުދި ބޯޓުފަހަރުގައި ކަނޑަށް ނިކުމެފައެވެ.
ހަވާއީގައި މި ފަދަ ނުރައްކާތެރި އަދި ފަނާކުރަނިވި ކާރިސާއެއް އެންމެ ފަހުން ހިނގާފައި ވަނީ 1960 ވަނަ އަހަރުއެވެ. އެއީ، ހަވާއީއަކީ އެމެރިކާގެ ސްޓޭޓެއްގެ ގޮތުގައި ކަނޑައެޅުމުގެ އެއް އަހަރު ފަހެވެ. އެ އަހަރު ހަވާއީގެ ބިގް އައިލެންޑަށް އެރި ނުރައްކާތެރި ސުނާމީއެއްގައި 61 މީހުން މަރުވެ، ބޮޑެތި ގެއްލުންތަކެއް ލިބުނެވެ.