މިޔަންމާގެ ރާކައިން ސްޓޭޓުގެ ވެރިރަށް ސުއްތުވޭން ފުރައިގެން ދަތުރުކުރި ބޯޓެއް ކަނޑުވެ، އޭގައި ދަތުރުކުރި މީހުންގެ ތެރެއިން 23 މީހުން މަރުވެއްޖެއެވެ. އެ ބޯޓުގައި ތިބީ ރޮހިންޔާ ދަރިކޮޅުގެ މުސްލިމުންނެވެ. ބޯޓު ކަނޑުވި ހާދިސާގައި އިތުރު 30 މީހުން ގެއްލިފައިވާއިރު، އެ މީހުން ހޯދުމަށް އޮފިޝަލުން ދަނީ މަސައްކަތް ކުރަމުންނެވެ. ބޯޓު ކަނޑުވެފައި ވަނީ ސުއްތުވޭގެ އައްސޭރިފަށަށެވެ.
މި ހާދިސާ ހިނގި ވަގުތު ބޯޓުގައި 50 ފަސިންޖަރުން ތިބި ކަމަށް ބެލެވެއެވެ. ރޮހިންޔާ ދަރިކޮޅުގެ މީހުން މިޔަންމާ ދޫކޮށް ހިޖުރަކުރަން މަސައްކަތް ކޮށްފައި ވަނީ އެ ޤައުމުގެ ސަރުކާރާއި އަސްކަރިއްޔާއިން އެ ދަރިކޮޅުގެ މީހުންނާ މެދު ބަހައްޓަމުންދާ ނަސްލީ ތަފާތުވުންތަކާއި، ފުރައްސާރައާއި އަނިޔާވެރިކަމުން ސަލާމަތްވާށެވެ. އެ މީހުންގެ އަމާޒަކީ މެލޭޝިޔާ ނުވަތަ އިންޑޮނީޝިޔާއެވެ.
މި ހާދިސާ ހިނގި ވަގުތުގައި ބޯޓުގައި ތިބި އަށް މީހުން ސަލާމަތް ކުރެވިފައިވާއިރު، އެ މީހުން ބުނީ ދަތުރުގެ ވަކި ހިސާބަކުން ބޯޓުގެ ފަޅުވެރިން އެ މީހުން ކަނޑު މައްޗަށް ދޫކޮށްލުމަށް ފަހު ފިލާފައިވާ ކަމުގައެވެ. ބޯޓު ކަނޑުވެފައި ވަނީ ނެގި ބިޔަ ރާޅެއްގައި ކަމަށް ސަލާމަތްވި މީހުން ކިޔައިދިނެވެ. މި ހާދިސާގައި މަރުވި މީހުންގެ ތެރޭގައި ހިމެނެނީ 13 އަންހެނުންނާއި 10 ފިރިހެނުންނެވެ. ކަނޑަށް ގެއްލިފައިވާ 30 މީހުން ހޯދުމުގެ މަސައްކަތް ކުރަމުންދާއިރު، މި ހާދިސާ މަރުވި މީހުންގެ ޢަދަދު އިތުރުވާނެ ކަމަށް ބެލެވެއެވެ.
މިޔަންމާގައި ކުރިމަތިވަމުންދާ އަނިޔާވެރި ކަމުން ސަލާމަތްވުމަށް ކޮންމެ އަހަރަކު ވެސް ރޮހިންޔާ ދަރިކޮޅުގެ އެތަކެއް ހާސް ބަޔަކު އެ ޤައުމުގެ ދޫކޮށް މެލޭޝިޔާއާއި އިންޑޮނީޝިޔާ ފަދަ ޤައުމުތަކަށް ހިޖުރަ ކުރެއެވެ. ރޮހިންޔާ ދަރިކޮޅުގެ މުސްލިމުންނާ ދެކޮޅަށް މިޔަންމާއިން ހިންގަމުންދާ ގަތުލުއާންމުން ސަލާމަތްވާން 2017 ވަނަ އަހަރު ވެސް މިލިޔަނެއްހާ މީހުން އަވައްޓެރި ބަންގްލަދޭޝަށް ހިޖުރަކުރިއެވެ.
2021 ވަނަ އަހަރު މިޔަންމާގައި ހިންގި އަސްކަރި ބަޣާވާތަށް ފަހު، އެ ޤައުމުގައި މިހާރު ދިރިއުޅެމުންދާ ރޮހިންޔާ ދަރިކޮޅުގެ މީހުން ވެސް ދަނީ ޤައުމު ދޫކޮށް ހިޖުރަކުރަން މަސައްކަތް ކުރަމުންނެވެ. ކަނޑުވި ބޯޓުގައި ތިބި ކޮންމެ މީހަކު، ބޯޓުގެ ވެރިންނަށް ބޮލަކަށް 4,000 އެމެރިކާ ޑޮލަރުގެ ފީއެއް ދައްކަން ޖެހުނު ކަމުގައި ވެސް މި ހާދިސާއިން ސަލާމަތްވި މީހުން ކިޔައިދިނެވެ.
2022 ވަނަ އަހަރު އެކަނިވެސް ދެކުނުއިރުމަތީ އޭޝިޔާގެ ޤައުމުތަކަށް 2,000 އަށްވުރެ ރޮހިންޔާ ދަރިކޮޅުގެ ރެފިޔުޖީން ހިޖުރަކޮށްފައިވާ ކަމުގައި އދގެ ރެފިއުޖީންނާ ބެހޭ އިދާރާ، ޔޫ.އެން ހައި ކޮމިޝަނަރ ފޯ ރެފިއުޖީޒް (ޔޫ.އެން.އެޗް.ސީ.އާރު)ން ބުނެއެވެ. މީގެ ތެރެއިން ގިނަ މީހުން ފުރާފައި ވަނީ ބަންގްލަދޭޝުންނެވެ. މި ދަތުރު މަތީގައި 200 އަށްވުރެ ގިނަ ރެފިޔުޖީން ވަނީ މަރުވެފައެވެ.