އަޅުވެތިކޮށްފައިވާ ހުޅަނގު އައްސޭރިއަށް ޔަހޫދީ އަސްކަރިއްޔާގެ ޖައްބާރު ސިފައިން އަރައި ހިންގި ލާއިންސާނީ އުދުވާންތަކެއްގައި ފަލަސްޠީނުގެ މިނިވަން ކަމަށް ޖިހާދުކުރާ މުޖާހިދުންގެ ޖަމާޢަތަކަށް ނިސްބަތްވާ މީހަކު ޝަހީދުކޮށްލައިފިއެވެ. ޔަހޫދީ ޓެރެރިސްޓު ސިފައިން އަރައި އުދުވާން ހިންގާފައި ވަނީ ހުޅަނގު އައްސޭރިގެ ނާބުލުސްގެ ހުޅަނގުން އޮންނަ ޒަވާތާގައެވެ.
ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ ޔަހޫދީންގެ ހަމަލަތަކުގައި ޝަހީދުކޮށްލާފައި ވަނީ 27 އަހަރުގެ އާމިރު އަޙްމަދު މުޙައްމަދު ޚަލީފާ ކަމުގައެވެ. ޔަހޫދީ ޓެރެރިސްޓު ސިފައިން އޭނާގެ ބޮލަށާއި ބުރަކަށްޓަށް ބަޑިޖަހާފައިވާ ކަމުގައި ވެސް އެ ވުޒާރާއިން ބުންޏެވެ.
ޔަހޫދީ އަސްކަރިއްޔާއިން ބުނީ ޚަލީފާއަށް ހަމަލަދިނީ އޭނާ އިސްވެ ޔަހޫދީ ސިފައިންނަށް ހަމަލާދިނުމުން އެ ކަމުގެ ރައްދުގައި ކަމުގައެވެ. އެ މީހުން ޒަވާތާއަށް އެރީ ޓެރެރިޒަމް ހުއްޓުވަން އޮޕަރޭޝަނެއް ހިންގުމުގެ ނަމުގައެވެ. ޚަލީފާއަކީ ނާބުލުސް ކައިރީގައި އޮންނަ ޢައިން ބައިތު އިލްމާ ރެފިއުޖީ ކޭމްޕުގައި ދިރިއުޅޭ މީހެކެވެ.
ފަލަސްޠީނުގެ މިނިވަން ކަމަށް ޖިހާދު ކުރާ ޖަމާޢަތެއް ކަމުގައިވާ އަލް-އަޤްޞާ މާޓިޔަރސް ބްރިގޭޑުން ވަނީ ޚަލީފާއަކީ އެ ޖަމާޢަތުގެ މެންބަރެއް ކަމުގައި ބުނެފައެވެ. އެއީ ފަލަސްޠީނުގައި ވެރިކަން ކުރާ ފަތަޙަ ޖަމާޢަތުގެ ހަތިޔާރު އެޅި ގޮތްޕެވެ. ޚަލީފާ ހޯދައި ޝަހީދުކޮށްލަން ޔަހޫދީ ޓެރެރިސްޓު ސިފައިން މީގެ ދެ އަހަރެއްހާ ދުވަސް ކުރިން މަސައްކަތް ފަށާފައިވާ ކަމުގައި ވެސް އެ ޖަމާޢަތުން ބުނެއެވެ. އަމާންދީ ޔަހޫދީ ޓެރެރިސްޓު ސިފައިންނާ ހަވާލުވާން އޭނާ ވަނީ ދެކޮޅު ހަދާފައެވެ.
ޔަހޫދީ އިސްރާޢީލުގެ ޖައްބާރު ސިފައިން މި އަހަރުގެ މިހާތަނަށް ހިންގާފައިވާ ލާއިންސާނީ ޖަރީމާތަކުގައި ޝަހީދުކޮށްލާފައިވާ ފަލަސްޠީން މީހުންގެ ޢަދަދު މިހާރު ވަނީ 213 އަށްވުރެ މައްޗަށް އަރާފައެވެ. އޭގެ ތެރޭގައި ގިނައީ ކުށެއް ނެތް ޢާންމުންނާއި ކުޑަކުދިންނެވެ. ޖުލައި މަހުގެ ކުރީކޮޅު ޔަހޫދީ ސިފައިން ޖިނީން ރެފިއުޖީ ކޭމްޕުގައި ހިންގި އުދުވާންތަކެއްގައި ވެސް ފަލަސްޠީނުގެ 12 މީހުން ޝަހީދުކޮށްލިއެވެ. އަދި، އެ ކޭމްޕު ސުންނާފަތިކޮށްލިއެވެ.
ޔަހުދީ އިސްރާޢީލުގެ އިސްތިޢުމާރީ ސިފައިން ފަލަސްޠީނުގެ ބިންތަކަށް އަރައި ހުޅަނގު އައްސޭރި އަޅުވެތިކޮށްފައި ވަނީ 1967 ވަނަ އަހަރުއެވެ. އޭގެ ފަހުން ފަލަސްޠީނުގެ ރައްޔިތުން ދިރިއުޅެމުން ދަނީ ޔަހޫދީންގެ އަޅުވެތިކަމުގެ ދަށުގައެވެ. އަދި، ފަލަސްޠީނުގެ ބިންތަކުގައި ވަޒަންވެރިކޮށްފައިވާ ޔަހޫދީންގެ ޢަދަދު މިހާރު 490,000 އަށް އަރައެވެ.