އިމްޕޯޓް އެކްސްޕޯޓުން ދައުލަތަށް ލިބުނު އާމްދަނީ 15 އިންސައްތަ އިތުރު

އިމްޕޯޓް އެކްސްޕޯޓުން ދައުލަތަށް ލިބުނު އާމްދަނީ މިދިޔަމަހު 15 އިންސައްތަ އިތުރުވެފައިވާކަމަށް ތަފާސް ހިސާބުތަކުން ދައްކައިފިއެވެ.

ކަސްޓަމްސްގެ ތަފާސް ހިސާބުތައް ދައްކާގޮތުން މިިދިޔަ ޖުލައިމަހު ރާއްޖެއަށް އެތެރެކޮށްފައި ވަނީ 4.7 ބިލިއަން ރުފިޔާގެ މުދަލެވެ. މިއީ މިދިޔަ އަހަރުގެ ޖުލައިމަހު ދިވެހިރާއްޖެއަށް އެތެރެކުރި 4.2 ބިލިއަން ރުފިޔާގެ މުދަލާއި އަޅާބަލާއިރު 12 އިންސައްތަ އިތުރު އަދަދެކެވެ.

ކަސްޓަމްސްގެ މައުލޫމާތުތައް ދައްކާގޮތުން މިދިޔަމަހު 138 މިލިއަން ރުފިޔާގެ މުދާ އެކްސްޕޯޓްކޮށްފައިވެއެވެ. މިއީ މިދިޔަ އަހަރުގެ އެ މުއްދަތުގައި އެކްސްޕޯޓްކުރި 138 މިލިއަން ރުފިޔާގެ މުދަލާއި އަޅާބަލާއިރު 70 އިންސައްތަ އިތުރު އަދަދެކެވެ.

ކަސްޓަމްސްއަށް މިދިޔަމަހު ލިބުނު ޖުމްލަ އާމްދަނީވެސް ވަނީ 15 އިންސައްތަ އިތުރުވެފައެވެ. އެގޮތުން މިދިޔައަހަރުގެ ޖުލައިމަހު 315 މިލިއަން ރުފިޔާ ދައުލަތަށް ލިބިފައިވާއިރު، މި އަހަރުގެ ޖުލައިމަހު މި ޢަދަދުވަނީ 361 މިލިއަން ރުފިޔާއަށް އިތުރުވެފައެވެ.

ފާއިތުވި ޖުލައިމަހު އިމްޕޯޓް އެކްސްޕޯޓުން ދައުލަތަށް ލިބުނު އާމްދަނީ 2022 ވަނަ އަހަރުގެ ޖުލައިމަހާއި އަޅާބަލާއިރު 15 އިންސައްތަ ވަނީ އިތުރުވެފައެވެ.

ފާއިތުވިމަހު އަގުގެ ގޮތުން ދިވެހިރާއްޖެއަށް އެންމެ ގިނައިން މުދާ އެތެރެކޮށްފައިވަނީ އިންޑިއާ، އޮމާން، ޗައިނާ، ޔޫ.އޭ.އީ އަދި މެލޭޝިއާއިންނެވެ.

އިންޑިއާއިން - 724 މިލިއަން ރުފިޔާގެ މުދާ
އޮމާންއިން - 667 މިލިއަން ރުފިޔާގެ މުދާ
ޗައިނާއިން - 610 މިލިއަން ރުފިޔާގެ މުދާ
ޔޫއޭއީން - 521 މިލިއަން ރުފިޔާގެ މުދާ
މެލޭޝިއާއިން - 406 މިލިއަން ރުފިޔާގެ މުދާ

އަގުގެގޮތުން އެންމެ ގިނައިން ރާއްޖެއިން މުދާ އެކްސްޕޯޓް ކުރި 5 ޤައުމަކީ ތައިލޭންޑު، އިނގިރޭސިވިލާތު، ޖަރުމަނުވިލާތު، އިންޑިއާ އަދި ފަރަންސޭސި ވިލާތުންނެވެ.

ތައިލޭންޑް - 35 އިންސައްތަ
އިނގިރޭސިވިލާތް - 21 އިންސައްތަ
ޖަރުމަނުވިލާތް - 15 އިންސައްތަ
އިންޑިއާ - 6 އިންސައްތަ
ފަރަންސޭސި ވިލާތް - 4 އިންސައްތަ

ތަފާސް ހިސާބުތައް ދައްކާގޮތުން މިދިޔަމަހު ރާއްޖެއިން ބޭރުން މުދާ ހިފައިގެން 93 އުޅަނދު އައިސްފައިވެއެވެ. އަދި ރާއްޖޭއިން 99 އުޅަނދެއް ފުރާފައިވެއެވެ.