ޕާކިސްތާނުގެ ބަޓްގަރާމްގެ ފަރުބަދަމަތީ ހިސާބެއްގައި ދަތުރުކުރުމަށް ބޭނުންކުރާ ކޭބަލް ކާރެއް ހުއްޓި، އޭގައި ތާށިވި އަށް މީހުންގެ ތެރެއިން ހަތަރު ކުޑަކުދިން ސަލާމަތްކޮށްފިއެވެ. ފަރުބަދަމަތީ ހިސާބެއް ހުރަސްކުރަން ބޭނުންކުރާ ކޭބަލް ކާރު ހުއްޓިފައި ވަނީ އޭގެ އެއް ވައު ކަނޑައިގެން ދިޔުމާ ގުޅިގެންނެވެ. ކޭބަލް ކާރުގައި ތާށިވީ މުދައްރިސަކާއި ހަތް ދަރިވަރުންނެވެ. ބަޓްގަރާމަކީ ވެރިރަށް އިސްލާމްއާބާދުގެ އުތުރުން 200 ކިލޯމީޓަރު ދުރުގައި އޮންނަ ސަރަޙައްދެކެވެ.
މި ހާދިސާ ހިނގާފައި ވަނީ އެ މުދައްރިސާއި ދަރިވަރުން ކޭބަލް ކާރުގައި ސްކޫލަށް ދިޔަ މަގުމަތީގައެވެ. މޫސުން ގޯސްވެ، ވައިބާރުވުމާ ގުޅިގެން އެ މީހުން ސަލާމަތް ކުރުމަށް ކުރަމުންދިޔަ މަސައްކަތަށް ހުރަސް އެޅުނު ކަމުގައި ޕާކިސްތާނުގެ އަސްކަރިއްޔާއިން ބުނެއެވެ. ކޭބަލް ކާރުގައި ތާށިވި މުދައްރިސާއި ކުދިންގެ ތެރެއިން ހަތަރު ކުއްޖަކު ސަލާމަތްކޮށްފައި ވަނީ އަސްކަރިއްޔާގެ ހެލިކޮޕްޓަރެއް ބޭނުންކޮށްގެންނެވެ. ކޭބަލް ކާރު ހުއްޓިފައި ވަނީ 900 ފޫޓު އުސް ހިސާބެއްގައެވެ.
ބަޓްގަރާމްގެ އިސް އޮފިޝަލެއް ކަމުގައިވާ ޝާޙް ފަޙަދް ވިދާޅުވީ ކޭބަލް ކާރުގައި ތިބި ކުދިން ސަލާމަތް ކުރަން ޖެހުނީ ވަކިވަކިން، ފަހަރަކު ކުއްޖެއް ކަމުގައެވެ. އެ ކުދިންނާ އެކު ކޭބަލް ކާރުގައި ތާށިވި މުދައްރިސަކީ 20 އަހަރުގެ ގުލްފަރާޒެވެ. ޕާކިސްތާނުގެ ޖިޔޯ ނިއުސް ޗެނަލަށް ފޯނުން ދިން އިންޓަރވިއުއެއްގައި އޭނާ ވަނީ އޭނާއާ އެކު ތާށިވެފައިވާ ކުދިން ވީ އެންމެ އަވަހަކަށް ސަލާމަތްކޮށްދޭން އެދިފައެވެ.
ތާށިވެފައި ވަނީ އުމުރުން 10 އަހަރާއި 15 އަހަރާއި ދެމެދުގެ އުމުރުފުރައިގެ ކުދިންނެވެ. ހޫނު ގަދަވުމުގެ ސަބަބުން އެ ތަނުން އެއް ކުއްޖަކު ހޭނެތިފައިވާ ކަމުގައި ވެސް އޭނާ ބުންޏެވެ. އަދި، އެ ކުދިން ތިބީ ވަރަށް ބިރުން ކަމުގައި ވެސް އޭނާ ބުންޏެވެ. ޕާކިސްތާނުގެ އެކި ކަންކޮޅުތަކުގައި އެތަކެއް ހާސް ބަޔެއްގެ ނަޒަރު ވަނީ، އެ ކުދިން ސަލާމަތް ކުރުމަށް ކުރަމުންދާ މަސައްކަތްތަކަށް ހުއްޓިފައެވެ. އެ ޤައުމުގެ ޓީވީ ޗެނަލްތަކުން ދަނީ އެ މަންޒަރު ވަގުތުން ދުރަށް ދައްކަމުންނެވެ.