އެއްމެދު އިމާރާތެއް ނުވަތަ އެއްމެދު އިމާރާތެއްގެ ފްލެޓެއް އަލަށް ގަންނަ ފަރާތްތައް، އެއްމެދު އިމާރާތުގެ ބިމުގެ ނިސްބަތުން އެ އިމާރާތުން ނެގުމަށް ދިވެހިރާއްޖޭގެ ބިމާބެހޭ ޤާނޫނުން ކަނޑައަޅާފައިވާ %15 ޓެކްސްއިން އިސްތިސްނާކުރާގޮތަށް ދިވެހިރާއްޖޭގެ ބިމާބެހޭ ޤާނޫނަށް މާއްދާއެއް އިތުރުކުރެއްވުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ނިންމަވައިފިއެވެ.
އެމަނިކުފާނު މިގޮތަށް ނިންމެވީ، މިކަމާ ބެހޭގޮތުން އިކޮނޮމިކް އެންޑް ޔޫތު ކައުންސިލުގައި މަޝްވަރާކުރެއްވުމަށްފަހުގައެވެ.
މިގޮތުން، ބިމާބެހޭ ޤާނޫނުން ކަނޑައަޅާފައިވާ %15 ޓެކްސްއިން އިސްތިސްނާކުރެވޭނީ އެއްމެދު އިމާރާތެއް ނުވަތަ އެއްމެދު އިމާރާތެއްގެ ފްލެޓެއް އަލަށް ގަންނަ ފަރާތްތަކުގެ ތެރެއިން އުމުރުން 18 އަހަރުން މަތީގެ މީހުން ކަމުގައިވެސް ރައީސުލްޖުމްހޫރިއްޔާ ވަނީ ނިންމަވާފައެވެ. މިގޮތަށް މިކަން ނިންމެވުމުގެ މަޤްޞަދަކީ، ސަރުކާރުގެ ގެވެހިކުރުމުގެ ސިޔާސަތަށް ހެޔޮ ބަދަލެއް ގެންނެވުންކަމަށް ރައީސުލްޖުމްހޫރިއްޔާގެ އޮފީހުން ވިދާޅުވެއެވެ.
ރާއްޖޭގެ ބިމާބެހޭ ޤާނޫނަށް މި އިސްލާހު ގެނައުމުގެ މަސައްކަތް ރައީސުލްޖުމްހޫރިއްޔާގެ އޮފީހުން މިހާރު ކުރައްވަމުން ގެންދަވާކަމަށްވެސް އެ އޮފީހުން މަޢުލުމާތުދެއްވައެވެ.