ޕީސީބީގެ ކުރިއަށްއޮތް 5 އަހަރުގެ ސްޓްރެޓީޖިކް އެކްޝަން ޕްލޭން އިފްތިތާހްކޮށްފި

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ ކުރިއަށްއޮތް 5 އަހަރުގެ ސްޓްރެޓީޖިކް އެކްޝަން ޕްލޭން އިފްތިތާހްކޮށްފިއެވެ. މިއެކްޝަން ޕްލޭން އިފްތިތާހްކުރީ މީރުމާގައި އޮތް ހަފްލާއެއްގައެވެ.

ޕީސީބީގެ 2024 އިން 2028 ވަނަ އަހަރުގެ ސްޓްރެޓީޖިކް އެކްޝަން ޕްލޭން އިފްތިތާހްކޮށްދެއްވީ އޮޑިޓަރ ޖެނެރަލް ހުސައިން ނިޔާޒީއެވެ. މި އެކްޝަން ޕްލޭން އިފްތިތާހްކޮށްދެއްވުމަށްފަހު ވާހަކަ ދައްކަވަމުން ހުސައިން ނިޔާޒީ ވިދާޅުވީ، މިސްޓްރެޓެޖިކް ޕްލޭނަކީ ޕީސީބީގެ މަސައްކަތްތައް ވަކިން ޚާއްސަކޮށް ސަރުކާރު ހިއްސާވާ ކުންފުނިތަކުގެ ގަވަނަންސް ރަނގަޅުކުރުމަށް ވަކި އަމާޒަކަށް މަސައްކަތްތައް ގެންދެވިގެންދާނެ ކަމެއްކަމަށެވެ. އަދި މިއެކްޝަން ޕްލޭނާއެކު ސަރުކާރު ހިއްސާވާ ކުންފުނިތަކުން ދައުލަތުގެ ބަޖެޓަށް ބަރޯސާވާ މިންވަރު ދަށްކުރުމަކީ މުހިންމު ކަމެއް ކަމަށް އޭނާ ވިދާޅުވިއެވެ. އަދި އެކްޝަން ޕްލޭންގައި ހިމެނޭ ކަންކަން ހާސިލްކުރެވޭނީ އެންމެން ގުޅިގެން ކުރާ މަސައްކަތުންކަން އޭނާ ފާހަގަކުރެއްވިއެވެ.

“އަޅުގަނޑުމެންނަށް ފާހަގަކުރެވޭ ކުންފުނިތަކުގެ ހިންގުން ހަރުދަނާކުރުމަށް އެކައުންޓަންޓުން އަދި ރަނގަޅު އޮޑިޓަރުންގެ މުހިންމު ދައުރެއްވެސްވާކަން. އެހެންވީމަ އަޅުގަނޑުމެން ޗާޓަރޑް އެކައުންޓެންޓުންގެ ފަރާތުންވެސް އަޅުގަނޑުމެން ދަންނަވާލަން އޮތީ ޕީސީބީގެ ތި މަސައްކަތައް އަޅުގަނޑުމެންގެ އިންސްޓިޓިއުޓްގެ ފަރާތުންވެސް ކޮށްދެވެން އޮތް މަސައްކަތެއް ކޮށްދެއްވާނެކަން.” ހުސައިން ނިޔާޒީ ވިދާޅުވިއެވެ.

މި ހަފްލާގައި ވާހަކަދައްކަވަމުން ޕީސީބީގެ ރައީސް އާސިމް މުޙައްމަދު ވިދާޅުވީ، މި އެކްޝަން ޕްލޭންގައި އެންމެ ބޮޑަށް އިސްކަން ދީފައިވާނީ ސަރުކާރު ހިއްސާވާ ކުންފުނިތަކަށް އެންމެ ރަނގަޅު މަންފާއެއް ހޯދާދިނުމަށްކަމަށެވެ. އަދި އެ ކުންފުނިތަކުގެ ހިންގުން ހަރުދަނާކުރުމަށްވެސް މި އެސްއޭޕީގައި އަލިއަޅުވާލާފައިވާނެކަމަށެވެ.

“ޕީސީބީގެ ކުރިމަގަށް އައު ސްޓެޕެއް އެކުލަވާލުމުގެ ވިިސްނުމަކީ ޤާނޫނުން އަޅުގަނޑުމެންގެ މައްޗަށް ލާޒިމްކުރާ ވަކިވަކި ކަންތައްތައް. އޭގެތެރޭގައި ޤަވާއިދުތައް ހެދުމާއި، ސިޔާސަތުތައް އެކުލަވާލުން ހިމެނޭގޮތުން މިހާރު ޖުމްލަ ގޮތެއްގައި އަޅުގަނޑުމެންނަށް މި މަސައްކަތް ފުރިހަމަކުރެވިފައިވާތީ ޤާނޫނު ޖުމްލަ ގޮތެއްގައި ތަސައްވުރުކުރާ، ސަރުކާރު ހިއްސާވާ ކުންފުނިތަކުގެ ހިންގުން ހުރިހައި ރޮނގަކުން ހަރުދަނާކުރުމުގެ މަސައްކަތްތައް ވަށާޖެހޭ ގޮތެއްގައި ރާވާ އެކުލަވާލާ، ތަސައްވުރެއްގެ ތެރެއިން އިސްތިރާޖްތަކެއް ކަނޑައަޅައި ޓެކްނޮލިޖީގެ ގޮތުން ބަދަލުވަމުން މިދާ ދުނިޔޭގައި ސަރުކާރު ހިއްސާވާ ކުންފުނިތަކުގެ ވިލުންވެރިކަން އިތުރުކޮށް މުޅި އިންޑަސްޓްރީއަކީ ކުރިމަގަށް ތައްޔާރުވެފައިވާ ކުންފުނިތަކަކަށް ހެދުން.” އާސިމް މުޙައްމަދު ވިދާޅުވިއެވެ.

މި ހަފްލާގައި ވަނީ ޕީސީބީގެ ވެބްސައިޓާއި ގޭޓްވޭވެސް ލޯންޗްކޮށްފައެވެ. ޕީސީބީގެ ވެބްސައިޓާއި އަދި ގޭޓްވޭއިންވެސް ސަރުކާރު ހިއްސާވާ ކުންފުނިތަކާއި ގުޅޭ މުހިންމު މައުލޫމާތުތަކެއް ފެންނަން ހުންނާނެއެވެ. އޭގެތެރޭގައި ކުންފުނިތަކުގެ ބޯޑު މެންބަރުންނާއި، އެމީހުންގެ ދައުރާއި، ކުންފުނިތަކުން ކުރާ މުހިންމު މަސައްކަތްތަކާއި އަދި ކުންފުނިތަކުގެ މާލީ ތަފާސްހިސާބުތައް ހިމެނެއެވެ.