އެމެރިކާގެ އަސްކަރީ ހެލިކޮޕްޓަރެއް ވެއްޓި ސިފައިންގެ ތިން މީހުން މަރުވެއްޖެއެވެ. މި ހާދިސާ ހިނގާފައި ވަނީ އޮސްޓްރޭލިޔާގެ އުތުރުގައިވާ ސަރަޙައްދެއްގައެވެ. "ވީ-22ބީ އޮސްޕްރޭ" މަރުކާގެ އެ ހެލިކޮޕްޓަރު ވެއްޓިފައި ވަނީ އޮސްޓްރޭލިޔާގެ އުތުރުގެ ސަރަޙައްދެއްގައި ކުރިއަށްދާ އަސްކަރީ ތަމްރީނުތަކެއްގެ ތެރެއިން ކަމުގައި އެމެރިކާގެ އަސްކަރިއްޔާއިން ބުނެއެވެ.
ހެލިކޮޕްޓަރު ވެއްޓިފައި ވަނީ މީހުން ދިރިއުޅޭ ސަރަޙައްދާ ދުރުގައި އޮންނަ މެލްވިލް އައިލެންޑް ކިޔާ ރަށަކަށް ކަމަށާއި، މި ހާދިސާ ހިނގި ވަގުތު އެ އުޅަނދުގައި ތިބި އެހެން މީހުން ސަލާމަތް ކުރަން ބުރަ މަސައްކަތްތަކެއް ކުރަން ޖެހުނު ކަމުގައި ވެސް އެމެރިކާގެ އަސްކަރިއްޔާއިން ބުނެއެވެ. ހެލިކޮޕްޓަރުގައި ތިބި ފަސް ފަޅުވެރިން ރޯޔަލް ޑާވިން ހޮސްޕިޓަލަށް ގެންގޮސް ފަރުވާދޭން ފަށާފައިވާ ކަމުގައި ވެސް އެމެރިކާއިން ބުނެއެވެ.
ޑާވިންގައި ތިބޭ އެމެރިކާގެ މެރީން ރޮޓޭޝަނަލް ފޯސްއިން ބުނީ މި ހާދިސާ ހިނގި ވަގުތު ހެލިކޮޕްޓަރުގައި 23 ސިފައިން ތިބި ކަމުގައެވެ. އޭގެ ތެރޭގައި ހިމެނެނީ އެމެރިކާގެ ސިފައިން ކަމުގައި ވެސް އެ އިދާރާއިން ބުނެއެވެ. މެލްވިލް އައިލެންޑުގައި ކުރިއަށްދާ އަސްކަރީ ތަމްރީނުތަކަކީ އެމެރިކާއާއި އޮސްޓްރޭލިޔާއިން ގުޅިގެން ބާއްވާ ތަމްރީނުތަކެކެވެ. މި ތަމްރީނުތަކުގައި އެ ދެ ޤައުމުގެ އިތުރުން އިންޑޮނީޝިޔާއާއި ފިލިޕީންސްގެ އެތަކެއް ހާސް ސިފައިން ބައިވެރިވެއެވެ.
ހެލިކޮޕްޓަރު ވެއްޓުނު ހާދިސާއަކީ ވަރަށް ހިތާމަވެރި ހާދިސާއެއްގެ ގޮތުގައި ސިފަކުރައްވައި، މި ހާދިސާގައި މަރުވި ސިފައިންގެ ޢާއިލާތަކަށް އޮސްޓްރޭލިޔާގެ ބޮޑުވަޒީރު އެންތަނީ އެލްބެނީޒާއި ދިފާޢީ ވަޒީރު ރިޗަރޑް މާރލްސް ވަނީ ތަޢުޒިޔާ ދަންނަވާފައެވެ. އަދި، އޮސްޓްރޭލިޔާއާއި އެމެރިކާގެ އަސްކަރިއްޔާގައި މަސައްކަތް ކުރާ ސިފައިންގެ ޚިދުމަތްތައް މި ހާދިސާއިން ރަމްޒުކޮށްދޭ ކަމުގައި ވެސް އެ ދެ ބޭފުޅުން ވިދާޅުވިއެވެ.
މި ހާދިސާ ހިނގަން މެދުވެރިވި ސަބަބު ދެނެގަތުމަށް އެމެރިކާގެ އަސްކަރިއްޔާއިން މިހާރު ވަނީ ތަހުޤީޤު ފަށާފައެވެ. މި ހާދިސާއާ ގުޅިގެން ރޯޔަލް ޑާވިން ހޮސްޕިޓަލުގައި ކުއްލި ހާލަތެއް އިޢުލާނުކޮށްފައިވާ ކަމުގައި ޑާވިންގެ އޮފިޝަލުން ވިދާޅުވިއެވެ. އެމެރިކާއާއި އޮސްޓްރޭލިޔާއިން އަސްކަރީ ތަމްރީނުތައް ބާއްވަމުން ދަނީ އޭޝިޔާ އަދި ޕެސިފިކް ސަރަޙައްދުގައި ބާރާއި ނުފޫޒު ގަދަކުރަން ޗައިނާގެ އަސްކަރިއްޔާއިން ކުރަމުންދާ މަސައްކަތްތަކާ ދެކޮޅަށެވެ.
ހުސްވި 2022 ވަނަ އަހަރުގެ ނޮވެންބަރު މަހު ވެސް އެމެރިކާގެ ވީ-22ބީ އޮސްޕްރޭ މަރުކާގެ ހެލިކޮޕްޓަރެއް ވެއްޓުނެވެ. ނޭޓޯގެ މެންބަރު ޤައުމުތަކުން ނޯވޭގައި ބޭއްވި އަސްކަރީ ތަމްރީނުތަކެއްގެ ތެރޭގައި ހިނގި އެ ހާދިސާގައި ވެސް ސިފައިންގެ ހަތަރު މީހުން ވަނީ މަރުވެފައެވެ.
2017 ވަނަ އަހަރު ވެސް އޮސްޓްރޭލިޔާގެ އައްސޭރިފަށުގައި އޮތް މަނަވަރަކުން ފުރަން އުޅުމުގެ ތެރޭގައި އެ މަރުކާގެ އެހެން ހެލިކޮޕްޓަރެއް ވެއްޓި ސިފައިންގެ ތިން މީހުން މަރުވެފައިވާ ކަން ފާހަގަކުރެވެއެވެ. އަދި، 2000 ވަނަ އަހަރު ބޭއްވި އަސްކަރީ ތަމްރީނުތަކެއްގެ ތެރެއިން އޮސްޕްރޭ މަރުކާގެ ހެލިކޮޕްޓެއް ވެއްޓި ސިފައިންގެ 19 މީހުން މަރުވިއެވެ.