ޒުވާނުންނަށް އިތުރު ފުރުޞަތުތައް ހޯދައިދީ، ހުނަރުތައް ތަރައްޤީކޮށްދޭނަން: ޢުމަރު

ޢުމަރު ނަސީރުގެ ވެރިކަމެއްގައި ޒުވާނުންނަށް އިތުރު ފުރުޞަތުތައް ހޯދައިދީ، އެކިއެކި ހުނަރުތައް ތަރައްޤީކޮށްދޭނެކަމަށް ވިދާޅުވެއްޖެއެވެ. ޢުމަރު ނަޞީރު ގެންދަވަނީ މިއަހަރުގެ ރިޔާސީ އިންތިޚާބުގައި އަމިއްލަގޮތުން ވާދަކުރައްވަމުންނެވެ.

ސޯޝަލް މީޑިއާ މެދުވެރިކޮށް ބޭއްވި ކެމްޕެއިން ހަރަކާތެއްގައި ޢުމަރު ވިދާޅުވީ، އޭނާ ވެރިކަމަށް އައިސްފިނަމަ ރައްޔިތުންނަށް ދޮގުހަދައި އޮޅުވައި ނުލައްވާނެކަމަށެވެ. އަދި އޭނާގެ ވެރިކަމެއްގައި ރާއްޖޭގައި ބޮޑެތި ވެފައިވާ މައްސަލަތައް ހައްލުކުރައްވާނެކަމަށާއި، މަގުތަކަކީ އަމާންތަނެއްގެ ގޮތުގައި ހައްދަވާނެކަމަށްވެސް ޢުމަރު ވަނީ ވިދާޅުވެފައެވެ.

ރިޔާސީ އިންތިޚާބުގެ ކެންޕެއިން ގިނަ ހަރަކާތްތައް ޢުމަރު ކުރިއަށްގެންދަވަނީ ސޯޝަލް މީޑިއާގެ އެކި ވަސީލަތްތައް މެދުވެރިކޮށެވެ. ޢުމަރު ވިދާޅުވީ، ދުނިޔެއަށް މިހާރު އަންނަމުންދާ ބަދަލުތަކާއެކު އެންމެ ބޮޑަށް ހިނގަނީ ސޯޝަލް މީޑިއާގެ ވަސީލަތްތައްކަމަށެވެ. އަދި ދުނިޔޭގެ ބޮޑެތި އެހެން ޤައުމުތަކުގައިވެސް ސޯޝަލް މީޑިއާ މެދުވެރިކޮށް ހިންގާފައިވާ ކެމްޕެއިން ހަރަކާތްތަކުން އެބޭފުޅުން ރައީސްކަމަށް އައިސްފައިވާކަން ޢުމަރު ވަނީ ފާހަގަކުރައްވާފައެވެ.

ޢުމަރު ވިދާޅުވީ، އޭނާގެ ވެރިކަމެއްގައި ޒުވާނުންނަށް ގިނަ ފުރުޞަތުތަކެއް ފަހިކޮށްދޭނެކަމަށެވެ. އަދި ޒުވާނުންގެ ހުނަރުތައް ތަރައްޤީކުރުމަށް މަގުފަހިވެގެންދާނެކަމަށެވެ.

"ތިހުރިހާ ޒުވާން ކުދިންގެ ތައުލީމާއި، ތިބޭފުޅުންގެ ސިއްހަތާއި، ތިބޭފުޅުންގެ ސްކިލް އަޅުގަނޑު ޑިވެލޮޕްކޮށްދޭނަން. އެހެންވީމަ ދިވެހިރާއްޖެ މިދަނީ ޒުވާނުންގެ އައު އިންގިލާބަކާއި ދިމާލަކާއިމެދު އެއްވެސް ޝައްކެއް ނެތް." ޢުމަރު ވިދާޅުވިއެވެ.

ރިޔާސީ އިންތިޚާބުގެ ކެމްޕެއިންގެ ތެރެއިން ޢުމަރު ނަސީރު އެންމެ ބޮޑަށް ވިދާޅުވަނީ އޭނާގެ ވެރިކަމެއްގައި ރާއްޖެއިން ޑްރަގްގެ ވަބާ ނައްތާލާނެކަމަށެވެ. އަދި ކޮރަޕްޝަންއަށް ހުޅުވިފައިވާ ދޮރުތައް ބަންދުކުރާނެކަމަށެވެ. ކެންޕެއިންގެ ސްލޯގަންއަކަށް ޢުމަރު ބޭނުންކުރައްވަނީ "ހައްލަކީ ޢުމަރު" މި ޝިއާރެވެ.