އިންތިހާބާ ގުޅިގެން ހައިކޯޓަށް ޝަކުވާ ހުށައެޅުމަށް ފަސޭހަ އިންތިޒާމެއް

ރިޔާސީ އިންތިޚާބާ ގުޅޭ ޝަކުވާގެ މައްސަލަތައް ހުށަހެޅުމަށް ފަސޭހަ އިންތިޒާމެއް ހައިކޯޓުން ހަމަޖައްސަވައިފިއެވެ.

އިންތިޚާބުތަކާބެހޭ ޢާންމު ޤާނޫނުގެ ދަށުން އިންތިޚާބީ ޝަކުވާގެ މައްސަލަތައް ފުރަތަމަ މަރުޙަލާގައި ބެލުމުގެ އިޚްތިޞާޞް ލިބިގެންވަނީ ދިވެހިރާއްޖޭގެ ހައިކޯޓަށެވެ. އެހެންކަމުން ހޮނިހިރު ދުވަހު ބާއްވާ ރިޔާސީ އިންތިޚާބާ ގުޅޭ އިންތިޚާބީ ޝަކުވާގެ މައްސަލަތައް ހުށަހެޅުމަށް ހޮނިހިރު ދުވަހާއި އާދިއްތަ ދުވަހުގެ ހެނދުނު 09:00 އިން ރޭގަނޑު 22:00 ޖެހުމާއިހަމައަށް ހައިކޯޓުގެ ކައުންޓަރު ހުޅުވާފައި ހުންނާނެކަމަށް އެ ކޯޓުން ވިދާޅުވެއެވެ.

އަދި ހޯމަދުވަހުން ފެށިގެން އިންތިޚާބީ ޝަކުވާގެ މައްސަލަ ހުށަހެޅުމަށް އޮތް މުއްދަތު ހަމަވާންދެން، ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9:00 އިން 15:00 އަށް އަދި ރޭގަނޑު 20:00 އިން 23:00 އަށް ހައިކޯޓުގެ ކައުންޓަރު ހުޅުވާފައި ހުންނާނެކަމަށްވެސް އެ ކޯޓުން ވިދާޅުވެއެވެ.

ހައިކޯޓުން ވަނީ އިންތިޚާބީ ޝަކުވާގެ މައްސަލަތައް އޮންލައިންކޮށް ހުށަހެޅޭނެ ގޮތްވެސް ހަމަޖައްސަވާފައެވެ. އެގޮތުން [email protected] އަށް އީމެއިލް ކޮށްގެންވެސް ޝަކުވާ ހުށައެޅޭނެއެވެ. އަދި ހައިކޯޓުގެ ކައުންޓަރު ބަންދު ވަގުތުތަކުގައިވެސް މައްސަލައެއް ހުށަހެޅުމަށް، ނުވަތަ މަޢުލޫމާތެއް ސާފުކުރުމަށް ބޭނުންވާނަމަ 7902206 ނަންބަރަށް ގުޅައިގެން ޝަކުވާ ހުށައެޅޭނެކަމަށް ހައިކޯޓުން ވިދާޅުވެއެވެ.

އިންތިޚާބީ މައްސަލަތައް ހުށަހެޅުމުގައި އެންމެ ބޮޑު ސަމާލުކަމެއް ދޭންޖެހޭނީ ބޭނުންވާ ހުރިހާ މައުލޫމާތެއް ފުރިހަމަކޮށް، މައްސަލައިގެ ލިޔުންތަކާއި އެކު މައްސަލަ ހުށަހެޅުމަށެވެ. މި ގޮތުން މައްސަލަ ހުށަހަޅާ ސަބަބާއި، އެކަމުގެ ތަފްސީލް އަދި މައްސަލައާއި ގުޅޭ ހެކިތައް ހުށަހެޅުމަށް ސަމާލުކަން ދިނުމަށް ހައިކޯޓުން އިލްތިމާސްކުރައްވައެވެ.

އިންތިޚާބީ މައްސަލަތައް ހައިކޯޓަށް ހުށަހެޅުމަށް ޤާނޫނުގައި ކަނޑައަޅާފައިވާ މުއްދަތަކީ، އިންތިޚާބުގެ ރަސްމީ ނަތީޖާ އިޢުލާނުކުރާތާ ގިނަވެގެން 14 ދުވަހެވެ. މިމުއްދަތު ގުނާނީ ބަންދު ދުވަސްތައް ހިމަނައިގެންނެވެ. އިންތިޚާބީ ޝަކުވާގެ މައްސަލަތައް ހުށަހަޅާ ފޯމްތައް، ހައިކޯޓުގެ ވެބްސައިޓުން ޑައުންލޯޑް ކުރެވޭނެއެވެ.