ބޭބެ މަރާލި މީހާގެ މައްޗަށް 12 އަހަރުގެ ޖަލު ޙުކުމެއް

މިއަހަރުގެ މެއި މަހު އައްޑޫ ސިޓީ މަރަދޫފޭދޫގައި މަރާލި، އެ ރަށު ބްލޫސްޓާ، އަހުމަދު ޝުއައިބުގެ މަރުގެ މައްސަލާގައި، އޭނާގެ ކޮއްކޮ ޙުސައިން މަވާޒް 12 އަހަރަށް ޖަލަށްލުމަށް ކްރިމިނަލް ކޯޓުން ޙުކުމްކޮށްފިއެވެ.

އެއްބަންޑު އެއްބަފާ ބޭބެ މަރާލިކަމަށް މަވާޒްގެ މައްޗަށް ކޯޓުގައި އުފުލާފައިވާ ދައުވާއަށް އޭނާ ވަނީ އިއުތިރާފްވެފައެވެ. މަވާޒްގެ މައްޗަށް އުފުލީ އެނގިހުރެ މީހަކު މެރުމުގެ ކުށުގެ ދައުވާއެވެ.

މަވާޒް ވަނީ ތަހުގީގު މަރުހަލާގައި ކުށަށް އިޢުތިރާފްވެ ހާދިސާ ހިނގާދިޔަ ގޮތް ތަފްސީލްކޮށް ކިޔައިދީފައެވެ. އެގޮތުން 31 މެއި 2023 ވަނަ ދުވަހުގެރޭ ހިނގާ ދިޔަ އެ ހާދިސާ ތަފްސީލްކޮށްދެމުން މަވާޒް ބުނީ، އެރޭ ބޭބެއާ ރެސްޓޯރަންޓަކުން ދިމާވި ކަމަށާއި، އެތަނުން ބޭބެގެ ފޯނު ނަގައިގެން އޭނާ ދިޔައީކަމަށެވެ. އަދި ގެއަށް ދިޔައީ މަސްތުވާއެއްޗެއް ބަލާކަމަށާއި، ގެއަށް އައުމުން ބޭބެ ސުވާލު ކުރި ކަމަށެވެ. ސުވާލު ކުރުމުން، ބޭބެގެ ފޯނު ސިމާއެކު ވިއްކާލިކަމަށް ބުނި ކަމަށާއި، އެހިސާބުން ހަމަނުޖެހުން އުފެދި މާރާމާރީ ހިނގަން މެދުވެރިވީކަމަށް މަވާޒް ބުންޏެވެ.

މަވާޒް ބުނީ އޭނާ އެވަގުތު ހުރީ މަސްތުގެ ހާލުގައިކަމަށާއި، ބޭބެއަށް ޙަމަލާދިނީ 3 އިންޗި ބައިގެ ތިލައެއް ހުރި ކަތުރަކުންކަމަށެވެ. ޙަމަލާ އަމާޒުވީ ބޭބެގެ ވާއަތު ކަރާއި ދިމާލުން ތިރިއަށް މެއަށްކަމަށް އޭނާ ބުންޏެވެ. އޭނާ ވަނީ އެ ހާދިސާ ހަނދާނުގައި އެބަހުރިކަމަށްވެސް ބުނެފައެވެ.

ޝަރީޢަތުގައި މަވާޒް ވަނީ ވީހާވެސް ލުއި އަދަބެއް ދިނުމަށްވެސް އެދިފައެވެ. މަވާޒް ކުށަށް އިއުތިރާފްވުމުން އޭނާގެ މައްޗަށް ކުށް ސާބިތުވާކަމަށް ކޯޓުން ވަނީ ކަނޑައަޅާފައެވެ.

ކްރިމިނަލް ކޯޓުން މަވާޒްގެ މައްޗަށް އިއްވީ 12 އަހަރާއި ހަ މަހުގެ ޖަލު ހުކުމެކެވެ. އަދި އޭނާގެ މައްޗަށް ވަނީ ކައްފާރާއެއްގެ ގޮތުން ވިދިވިދިގެން 60 ދުވަހު ރޯދައަށް ހުރުމަށްވެސް ޢަމުރުކޮށްފައެވެ.

މަވާޒައާއި، އޭނާގެ ބޭބެއަކީވެސް މަސްތުވާތަކެއްޗާއި މާރާމާރީގެ ކުށުގެ ރިކޯޑް އޮންނަ ދެމީހުންނެވެ.