ދަ ޑިމޮކްރެޓްސްގެ ޕީޖީ ލީޑަރަކަށް އާޒިމް

ދަ ޑިމޮކްރެޓްސްގެ ޕާޓީގެ ޕާލިމެންޓަރީ ގްރޫޕްގެ ލީޑަރަކަށް ރައްޔިތުން މަޖިލީހުގެ މެދު ހެންވާރު ދާއިރާގެ މެމްބަރު އަލީ އާޒިމް އިންތިހާބުކޮށްފިއެވެ.

ރައްޔިތުން މަޖިލީހުގެ ރައީސް ރައީސް މުހައްމަދު ނަޝީދު އިސްވެ ހުންނަވައިގެން އުފެއްދި ދަ ޑިމޮކްރެޓްސްގެ ޕީޖީ ގްރޫޕްގެ މަގާމުތަކަށް މެމްބަރުން އައްޔަންކުރުމަށް އިންތިޚާބު ބޭއްވީ މިއަދުއެވެ.

އެޕާޓީގެ ޕީޖީ ގްރޫޕްގެ ނައިބު ލީޑަރަކަށް ހޮވުނީ ގައްދޫ ދާއިރާގެ މެމްބަރު އަހްމަދު ޒާހިރާއި މާފަންނު މެދު ދާއިރާގެ މެމްބަރު އިބްރާހިމް ރަޝީދުއެވެ. ޕީޖީ ގްރޫޕްގެ ވިފުގެ މަގާމަށް މައްޗަންގޮޅި އުތުރު ދާއިރާގެ މެމްބަރު މުހައްމަދު ރަޝީދު އިންތިހާބުކުރި އިރު ގްރޫޕްގެ އަމީން އާއްމުގެ މަގާމަށް އައްޔަންކުރީ އުނގޫފާރު ދާއިރާގެ މެމްބަރު މުހައްމަދު ވަހީދެވެ. މި މަގާމުތަކަށް މެމްބަރުން ހޮވުމަށް ބޭއްވި ވޯޓްގައި އެޕާޓީ މަޖިލީހުގައި ތަމްސީލުކުރައްވާ 11 މެމްބަރުން ބައިވެރިވެޑައިގަތެވެ. އަދި މަގާމުތަކަށް މެމްބަރުން ހޮވީ 11 މެމްބަރުންގެ އިއްތިފާގުންނެވެ.

ވެރިކަން ކުރާ އެމްޑިޕީންގެ ތެރެއިން ދަ ޑިމޮކްރެޓްސްގެ ނަމުގައި އައު ސިޔާސީ ޕާޓީއެއް އުފެދިގެން އައީ އެމްޑީޕީގެ ރިޔާސީ ޕްރައިމެރީގައި ރައީސް ނަޝީދަށް ލިބިވަޑައިގެންނެވި ނާކާމިޔާބީއަށް ފަހު ޕާޓީގައި އުފެދުނު ހިޔާލު ތަފާތުންވުންތަކަށް ފަހުއެވެ. އިލެކްޝަންސް ކޮމިޝަންގެ ދަފްތަރުގައިވާ ގޮތުން ދަ ޑިމޮކްރެޓްސްގެ މެމްބަރުންގެ އަދަދަކީ 3280އެވެ.

މިއަހަރުގެ ރިޔާސީ އިންތިޚާބުގައި ދަ ޑިމޮކްރެޓްސްއިން ވާދަކޮށް 7.18 އިންސައްތަ ވޯޓާއި އެކު ވަނީ ތިންވަނަ ހޯދާފައެވެ. އިންތިހާބުގައި ވޯޓްލީ މީހުންގެ ތެރެެއިން 15839 ވޯޓް ވަނީ އެޕާޓީއަށް ލިބިފައެވެ. ރިޔާސީ އިންތިޚާބުގެ 2 ވަނަ ބުރު މިމަހުގެ 30ގައި ބާއްވަން ތައްޔާރުވަމުން އަންނައިރު ދަ ޑިމޮކްރެޓްސްއިން މިހާތަނަށް އެއްވެސް ބަޔަކާއި ކޯލިޝަން ހަދަން އަދި ނިންމާފައެއް ނުވެއެވެ.