ދޮގު ވާހަކަ ދައްކައިގެން ސިފައިންގެ ބަދަހި ސަފުތައް ރޫޅާނުލެވޭނެ: މާރިޔާ

ދޮގު ޚަބަރު ފަތުރައިގެން ސިފައިންގެ ސަފުތައް ރޫޅާލުމަށް ބަޔަކު މަސައްކަތްކުރައްވާކަމަށް ވިދާޅުވެ އެކަން ހުއްޓާލުމަށް ޑިފެންސް މިނިސްޓަރ އަލްއުސްތާޛް މާރިޔާ އަޙްމަދު ދީދީ ގޮވާލައްވައިފިއެވެ.

މިނިސްޓަރ މާރިޔާ މިފައިން ގޮވާލައްވާފައިވަނީ އޮންލައިން ނޫހެއްގައި ސިފައިންގެ އިސްވެރިއަކު، ރައީސް އިބްރާހިމް މުޙައްމަދު ޞާލިހަށް ވޯޓުލުމަށްޓަކައި ސިފައިންނަށް ބިރުދައްކަމުންދާކަމަށް ބުނެ ލިޔެފައިވާ ޚަބަރަކާއި ގުޅިގެންނެވެ.

އެ ވާހަކަ ދޮގުކުރައްވާ ޑިފެންސް މިނިސްޓަރ މާރިޔާ އަޙްމަދު ދީދީ ވަނީ، ސިފައިންގެ ވެރިންނާއި ގުޅޭގޮތުން ދޮގު ވާހަކަތައް ފެތުރުން ހުއްޓާލުމަށް ގޮވާލައްވާފައެވެ. އަދި ދޮގު ވާހަކަތައް ދައްކައިގެން ސިފައިންގެ ސަފުތައް ރޫޅާލުމަށް ކުރާ މަސައްކަތްތައް ކުއްވެރިކުރައްވާކަމަށް މިނިސްޓަރ ވިދާޅުވިއެވެ. ސިފައިންނަކީ ރައްޔިތުންނަށް ކަމެއް ދިމާވާ ކޮންމެ ވަގުތުތަކުގައިވެސް ނުކުމެ އެހީތެރިކަން ފޯރުކޮށްދިނުމަށް ތިބި ޕްރޮފެޝަނަލް ބައެއްކަމަށްވެސް މިނިސްޓަރ ވިދާޅުވިއެވެ.

ޕީއެސްއެމް ނިއުސްއަށް ދެއްވި އިންޓަރވިއުގައި މިނިސްޓަރ މާރިޔާ ވިދާޅުވީ ސިފައިންނަކީ އަބަދުވެސް މި ރާއްޖޭގެ މިނިވަންކަމާއި ސިޔާދަތާއި އިސްތިޤްލާލު ހިފެހެއްޓުމަށް މަސައްކަތް ކުރާނެ ބައެއްކަމަށެވެ. މިނިސްޓަރ ވަނީ ރައްޔިތުންނަށް ދިމާވާ ބޮޑެތި ގޮންޖެހުންތަކުން އަރައިގަތުމަށްޓަކައިވެސް ސިފައިންގެ ފުރާނަ އަތްމައްޗަށް ލައިގެން ނުކުންނާނެ ކަމުގެ ޔަޤީންކަން ސިފައިން އަބަދުވެސް ދެއްވާފައިވާކަމަށް ވިދާޅުވެފައެވެ.

"ހިތާމައަކީ މިއަދުވެސް އިދިކޮޅު ފަރާތްތަކުން ސިފައިން މިވާ ގުރުބާނީ ބަލައި ނުގަނެ ސިފައިންގެ ވެރިންނާއި ސިފައިންގެ ސަފުތައް ރޫޅާލުމަށްޓަކައި އެތަކެއް މަސައްކަތްތައް ކުރަމުން އަންނަކަން. އެހެން ނުހެދުމަށް ނަސޭހަތްތެރިވަން. އެބޭފުޅުންގެ ސަރުކާރެއް އަޔަސް ހަމަ މި ސިފައިން ތިއްބަވާނީ މި ރާއްޖެ ސަލާމަތުގެ އައްސޭރިއަށް ގެންދިޔުމަށްޓަކައި. ސިޔާސީ ވެރިންކަހަލަ ބައެއް ނޫން ސިފައިންނަކީ." މިނިސްޓަރ އޮފް ޑިފެންސް މާރިޔާ އަޙްމަދު ދީދީ ވިދާޅުވިއެވެ.

އޮންލައިން ނޫހެއްގައި ލިޔެފައިވަނީ ދިވެހި ސިފައިންގެ އިންޓެލިޖެންސްގެ އިސް ވެރިއެއްގެ ގޮތުގައި ހުންނެވި ބްރިގޭޑިއަރ ޖެނެރަލް އަބްދުالله ޒުހުރީ ސިފައިންނަށް ބިރުދައްކަމުންދާކަމަށެވެ. އަދި އޭނާ އަންނަނީ އެކި ރޭންކުތަކުގެ ސިފައިން ހާޒިރުކޮށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ޞާލިހަށް ވޯޓު ދިނުމަށް އަންގައި, ވޯޓު ނުދޭ ފަރާތްތައް ބަލައި ފިޔަވަޅު އަޅާނެ ކަމުގެ އިންޒާރު ދެމުންކަމަށް ތުހުމަތުކުރައްވާފައިވެއެވެ. އެހެންނަމަވެސް ސަރުކާރުން ވަނީ މިވާހަކަތައް ދޮގުކުރައްވާފައެވެ.