ވަރިވާން ދިޔަ މީހަކަށް ގުޅި މައްސަލަ ސާބިތުވާ މެޖިސްޓްރޭޓްގެ ސަސްޕެންޑު މުއްދަތު އިތުރުކޮށްފި

ހދ.ޖުޑީޝަލް ދާއިރާގެ އިސްމެޖިސްޓްރޭޓް އަލްއުސްތާޛު ޢަލީ އާދަމް ސަސްޕެންޑުކޮށްފައިވާ މުއްދަތު އިތުރުކޮށްފިއެވެ.

ޖުޑީޝަލް ސާރވިސް ކޮމިޝަން، ޖޭއެސްސީން ވިދާޅުވީ، އަލްއުސްތާޛު ޢަލީ އާދަމްއާ ގުޅޭގޮތުން ތަޙުޤީޤު ކުރަމުންދާ މައްސަލަތަކަކާއި ގުޅިގެން މިއަހަރުގެ މެއި 25ގައި ވަޒީފާއަށް ނުނިކުމެ މަޑުކުރުމަށް އެންގި އެންގުން މިއަދުގެ ނިޔަލަށް ނިމުމަކަށް އައިސްފައިވާކަމަށެވެ.

ޖޭއެސްސީން ވިދާޅުވީ، ޢަލީ އާދަމްއާ ގުޅޭގޮތުން ތަޙުޤީޤު ކުރަމުންދާ މައްސަލައިގެ ބާވަތަށާއި، ތަޙުޤީޤަށް ހޯދިފައިވާ މަޢުލޫމާތަށް ބަލައި، ޝަރުޢީ ދާއިރާގެ އިތުބާރު ނެގެހެއްޓުމުގެ އަސާސްގެ މައްޗަށް ބިނާކޮށް، ޖުޑީޝަލް ސަރވިސް ކޮމިޝަނުގެ ޤާނޫނަށް ރިޔާޢަތްކޮށް މިމަހުގެ 22 ވަނަ ދުވަހުން ފެށިގެން އެކޮމިޝަނުން ވަކިގޮތެއް ކަނޑައަޅަންދެން، ޢަލީ އާދަމް ވަޒީފާއަށް ނުނިކުމެ މަޑުކުރުމަށް އަނެއްކާވެސް އަންގާފައިވާކަމަށެވެ.

ޖޭއެސްސީން ވިދާޅުވީ، ޢަލީ އާދަމާއި ގުޅޭގޮތުން ބަލަމުންދާ މައްސަލަތަކުގެ ތެރެއިން އެ ކޮމިޝަނުން ތަހްޤީޤުކޮށް ނިމިފައިވާ މައްސަލައެއްގައި އިސްމެޖިސްޓްރޭޓް، ފަނޑިޔާރުންގެ ސުލޫކީ މިންގަނޑާ ޚިލާފު ޢަމަލުތަކެއް ކޮށްފައިވާކަން ސާބިތުވާތީ ޖުލައި 23 ގައި ފަނޑިޔާރު ކަމުން ވަކިކުރުމަށް ރައްޔިތުންގެ މަޖިލީހަށް ހުށައަޅާފައިވާކަމަށެވެ.

ޢަލީ އާދަމް ފަނޑިޔާރުކަމުން ވަކިކުރުމަށް ރައްޔިތުންގެ މަޖިލީހަށް ހުށަހެޅުމަށް ޖޭ.އެސް.ސީން ނިންމަވާފައިވަނީ ހދ. ކުޅުދުއްފުށީ މެޖިސްޓްރޭޓް ކޯޓަށް ވަރިވުމަށްއެދި ހުށަހެޅި މައްސަލައެއްގައި ހިމެނޭ ޚަސްމަކަށް ގުޅައި މެސެޖުކޮށް ހެދިކަމަށް ބުނެ ހުށަހެޅި މައްސަލަ ތަޙުޤީޤުކުރުމަށްފަހުއެވެ.

ޖޭއެސްސީން ވިދާޅުވެފައިވަނީ ހދ. ކުޅުދުއްފުށީ މެޖިސްޓްރޭޓް ކޯޓަށް ވަރިވުމަށް އެދި ހުށަހެޅި މައްސަލަ އެކޯޓުގައި ހިނގަމުންދަނިކޮށް، އެ ޤަޟިއްޔާ ބަލަމުންދިޔަ އިސްމެޖިސްޓްރޭޓް ޢަލީ އާދަމް، ދަޢުވާގައި ހިމެނޭ ޚަސްމަކަށް ގުޅައި މެސެޖުކޮށް، ހުށަހަޅާފައިވާ މައްސަލައާ ގުޅޭގޮތުން ޝަރީޢަތުގެ ބޭރުން އެކި ވާހަކަތައް ދައްކައި، ރަޙްމަތްތެރިކަން ބާއްވަން ހުށަހަޅާފައިވާކަން ތަޙުޤީޤަށް ހާމަވެފައިވާކަމަށެވެ.

އަދި ދެމަފިރިކަމުގެ ގުޅުމުގެ ޒާތީ މަޢުލޫމާތު އަހައި، މި ނޫން ވެސް ޒާތީ އެކި މެސެޖުތައްކޮށް، ކުރާ މެސެޖުތައް ޑިލީޓްކޮށްފައި ބެހެއްޓުމަށް އެދި އިސްމެޖިސްޓްރޭޓް ޢަލީ އާދަމް މުވާސަލާތު ކޮށްފައިވާކަން، ތަޙުޤީޤަށް ލިބިފައިވާ ސްކްރީންޝޮޓްތަކުންނާއި، ބަޔާންތަކުންނާއި، އޭނާގެ އިޢުތިރާފުން ސާބިތުވާކަމަށްވެސް ޖޭއެސްސީން ވިދާޅުވެފައިވެއެވެ.

ހަމައެހެންމެ އިސްމެޖިސްޓްރޭޓް ޢަލީ އާދަމް ކޮށްފައިވާ މެސެޖުތައް ހުރި ގޮތަށް ބަލާއިރު، އޭނާ މަސައްކަތްކޮށްފައި ވަނީ ނުނިޔަތެއްގައި ނުރަނގަޅު މަޤުސަދެއް އޮވެގެން، އެ ޚަސްމު އެ ވަގުތު ހުރި ނާޒުކު ޙާލަތުގެ ނާޖާއިޒު ފައިދާ ނެގުމުގެ ގޮތުންކަން ސާބިތުވާކަމަށްވެސް ޖޭ.އެސް.ސީން ވިދާޅުވެފައިވެއެވެ.