ބޭރު ޤައުމުތަކުން ނަގާ އެއްވެސް ލޯނެއް ސިއްރުނުކުރަން: އަމީރު

ބޭރު ޤައުމުތަކުން ނަގާ އެއްވެސް ލޯނެއްގެ މައުލޫމާތު މިހާތަނަށް ސިއްރުކޮށްފައި ނުވާނެކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ. މިނިސްޓަރ މިފަދައިން ވިދާޅުވީ، ބޭރު ގައުމުތަކުން ނަގާ ލޯނުތަކުގެ އިންޓްރެސްޓް ރޭޓްފަދަ މައުލޫމާތުތައް މި ސަރުކާރުން ސިއްރުކުރާކަމަށާއި، އެއީ އެކަން ހިނގަންވާނެ ގޮތެއް ނޫން ކަމަށް ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ވިދާޅުވުމާއި ގުޅިގެންނެވެ.

ބ.ކަމަދޫގައި ރޭ ބެއްވި ޖަލްސާގައި މުޢިއްޒު ވަނީ ސަރުކާރުން ނަގާ ލޯނުތަކުގެ ތަފްސީލު ހާމަނުކުރާކަމަށް ތުހުމަތުކުރައްވާފައެވެ. މުޢިއްޒު ވަނީ ލޯނުތަކާއި އޭގެ އިންޓަރެސްޓް ރޭޓްގެ މައުލޫމާތު އެމްއެމްއޭގެ ގަވަރުނަރަށްވެސް އެނގިވަޑައިނުގަންވާ ކަމަށް ވިދާޅުވެ، ލޯނު ނެގުމަށްޓަކައި ރާއްޖޭގެ ބައެއް ސްކޫލްތައް ވެސް މިސަރުކާރުން ރަހުނުކޮށްފައިވާކަމަށް ތުހުމަތުކުރައްވާފައެވެ.

އެވާހަކަތަކަށް ރައްދު ދެއްވައި ފިނޭންސް މިނިސްޓަރ އިބްރާހީމް އަމީރު ވިދާޅުވީ، ބޭރު ޤައުމުތަކުން ނަގާ އެއްވެސް ލޯނެއްގެ މައުލޫމާތު ސިއްރުކޮށްފައި ނުވާނެކަމަށެވެ. ޤާނޫނުގައި ވާ ގޮތުގެމަތިން މިހާރުވެސް، ރައްޔިތުންގެ މަޖިލީހާއި، އެމްއެމްއޭ އަށް އެ މައުލޫމާތުތައް ހިއްސާކުރައްވާކަމަށާއި، އެހެނިހެން މައުލޫމާތު މިނިސްޓްރީ ވެބްސައިޓްގައި ފެންނަން ހުންނާނެކަމަށްވެސް މިނިސްޓަރ އަމީރު ވިދާޅުވިއެވެ.

މިނިސްޓަރ އަމީރު ވިދާޅުވީ ލޯނާއި އޭގެ މަޢުލޫމާތުތައް ރައްޔިޔުންނާއި ކަމާއި ބެހޭ އިދާރާތަކަށް ސިއްރުކުރީ ކުރީ ސަރުކާރުގަކަމަށެވެ. އެގޮތުން 2013އިން 2018 އަށް މަޖިލިހަށް ދަރަންޏާއި، މާލީ ހާލަތާއި، ބެހޭ ރިޕޯޓްތައް ފިނޭންސްއިން ފޮނުވުމުން، އެފޮރުވައިގެން އުޅުނު ބޭފުޅުން އެވާހަކަ ދެއްކުން ރަނގަޅު ނުވާނެކަމަށްވެސް މިނިސްޓަރ އަމީރު ވިދާޅުވިއެވެ. މިނިސްޓަރ ވަނީ އަބަދު އޮޅުވާލުމާއި މަކަރު ހެދުން އެހާ ރަނގަޅުކަމެއްނޫންކަމަށް ވިދާޅުވެ މުޢިއްޒަށް ރައްދު ދެއްވާފައެވެ.

ރާއްޖެއިން ބޮޑު ލޯނެއް ހޯދަން އިންޑިއާ ސަރުކާރުގައި އެދިފައިވާކަމަށާއި، އަދި އެކަމާއި ގުޅޭ ބައްދަލުވުންތައްވެސް ބާއްވާފައިވާކަމަށް ބުނެ ރާއްޖޭގެ މީޑިއާއަކުން ފެތުރި ޚަބަރުވެސް މިނިސްޓަރ ވަނީ ދޮގުކުރައްވާފައެވެ. މިނިސްޓަރ އަމީރު ވިދާޅުވީ ދިވެހި ސަރުކާރުން 3 ބިލިއަން ރުފިޔާގެ ލޯނެއްް ނަގަން އިންޑިއާއަށް ހުށަހަޅާފައިވާކަމަށް ފަތުރަމުންދަނީ ހަޤީޤަތާއި ހިލާފު ވާހަކަތަކެއްކަމަށެވެ. އަދި އެފަދަ އެއްވެސް މަޝްވަރާއެއް، އެއްވެސް ފަރާތަކާއެކު ކުރިއަށް ނުގެންދާނެކަމަށްވެސް އަމީރު ވިދާޅުވިއެވެ.

ކޮވިޑަށްފަހު ރާއްޖޭގެ އިޤްތިޞާދަށް ބޮޑެތި ކުރިއެރުންތަކެއް އަންނަމުންދާއިރު ރާއްޖޭގެ އިޤްތިޞާދާއި މާލީ ކަންކަމާއި ގުޅޭގޮތުން ހަޤީޤަތާއި ހިލާފު ވާހަކަތައް ނުފެތުރުމަށް ސަރުކާރުން މީގެކުރިން ވެސް ވަނީ އިލްތިމާސްކޮށްފައެވެ. އަދި އެފަދަ ހަޤީޤަތާއި ހިލާފު ވާހަކަތަކުގެ ސަބަބުން، ރާއްޖޭގެ އިޤްތިޞާދަށް ލިބެމުންދާ ކުރިއެެރުންތަކަށް އޭގެ ނުރަނގު އަސަރުކުރާނެކަން ތަޖުރިބާކާރުންވެސް ފާހަގަކުރައްވައެވެ.

އިޤްތިޞާދީގޮތުން ރާއްޖެއިން މިހާރު ހޯދަމުންދާ ކުރިއެރުންތައް ބައިނަލްއަޤްވާމީ މާލީ އިދާރާތަކުންވެސް ފާހަގަކުރެއެވެ. އިޤްތިޞާދީ ކުރިއެރުންތަކާއެކު، ދައުލަތުގެ އާމްދަނީ އިތުރުވަމުންދާއިރު، ރާއްޖެއިން ދައްކަންޖެހޭ ލޯނުތައް، މިހާރުވެސް ޤަވާއިދުން ދައްކަމުންދާކަމަށާއި، އަދި ކުރިއަށް އޮތްތަނުގައިވެސް އެއްވެސް ދައްޗެއް ނެތި ދެއްކޭނެކަމުގެ ފުރިހަމަ ޔަގީންކަން ދިވެހި ސަރުކާރުން ދެއްވައެވެ.