ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާގެ ތުހުމަތުގައި ހައްޔަރުކުރި އަބްދުﷲ އަލިމަނިކު 5 އަހަރަށް ޖަލަށްލުމަށް ކްރިމިނަލްކޯޓުން ހުކުމްކޮށްފިއެވެ.
އަލިމަނިކުގެ މައްޗަށް ދައުލަތުން އުފުލީ ޓެރަރިސްޓް ޖަމާއަތަކަށް ތާއީދުކުރުމުގެ ކުށުގެ ދައުވާއެވެ. އެ ކުށް އޭނާގެ މައްޗަށް ސާބިތުވާކަމަށް ދަށުކޯޓުން ކަނޑައަޅާފައިވަނީ އޭނާގެ އަތުން ފެނުނު ލިޔުންތަކާއި ވީޑިއޯތަކުގެ އިތުރުން ހެކިންގެ ހެކިބަހަށް ރިއާޔަތްކުރުމަށްފަހުއެވެ.
މި މައްސަލާގެ ބަންދުގައި އަލިމަނިކު ހޭދަކުރި މުއްދަތު ކެނޑުމުން އޭނާ ދެން ތަންފީޒުކުރަންޖެހޭނީ 2 އަހަރާއި 9 މަހުގެ އަދަބެކެވެ. އަލި މަނިކު އަކީ 2007 ވަނައަހަރު އއ. ހިމަންދޫގައި ހިންގި ހަމަނުޖެހުންތަކާއި ގުޅިގެންވެސް ކުށްސާބިތުވެ ޖަލަލަށް ލީ މީހެކެވެ.
ރައީސް ނަޝީދަށް ހަމަލާ ދިން މައްސަލާގައި އަލިމަނިކުގެ އިތުރުން ހއ. ހޯރަފުށީ އަލަނާސިގޭ މުހައްމަދު ތަސްލީމުގެ މައްޗަށްވެސް ދައުލަތުން ޓެރަރިސްޓް ޖަމާއަތަކަށް ތާއީދުކުރުމުގެ ކުށުގެ ދައުވާ އުފުލިއެވެ. އެހެންނަމަވެސް އެކަށީގެންވާ ހެކި ނެތުމުގެ ސަބަބުން ކްރިމިނަލްކޯޓުން ނިންމެވީ އޭނާގެ މައްޗަށް މައްޗަށް ކުށް ސާބިތުނުވާކަމަށެވެ.
2021 ވަނަ އަހަރުގެ މޭމަހުގެ 6 ވަނަދުވަހުގެ ރޭ ރައީސް ނަޝީދު އަވަހާރަކޮށްލަން ދިން ބޮމުގެ ހަމަލާއާއި ގުޅިގެން އިތުރު 3 މީހެއްގެ މައްޗަށް ވަނީ ދައުވާކޮށްފައެވެ. މި މީހުންގެ ތެރެއިން ނަޝީދަށް ހަމަލާދިން ބޮން ގޮއްވާލުމުގައި އަމަލީ ގޮތުން ބައިވެރިވި އަދުހަމް އަހްމަދު ކުށަށް އިއުތިރާފުވުމުން އޭނާގެ 23 އަހަރަށް ޖަލަށްލުމަށް 2021 ވަނައަހަރުގެ ޑިސެމްބަރުމަހުގެ 14 ވަނަދުވަހު ކްރިމިނަލްކޯޓުން ވަނީ ހުކުމްކޮށްފައެވެ.